Read gen Ezayà 40 Bible Online

Ezayà 40 - gen bible

Ezayà 40

¹Mìabe Mawu gblɔ̃ be àkɔ ne fa na wò, àkɔ ne fa na wò, dùkɔ̃ nyè.

²Mì do ŋusɛ̃ Yèruzàlɛm. Mì do àpa lelele gblɔ̃ na ɛ̀ be: “Kluvi be èdɔwɔ̀wɔ wòa tɔtè fifì, wo tu àgɔ̀jèje wòa be èfɛ̃ vɔ̀ eye Tɔhonɔ̀ ɖè àpo èvuɛ̃wo kpata jo.”

³Ègbè ɖe ɖì lelele gblɔ̃ be: “Lè zògbè jia, mì jrà èmɔ̃ ɖo na Tɔhonɔ̀. Lè ànyigbã pupuia jia, mì jɔ̀ àfɔ̀mɔ na miabe Mawu.

⁴Mì ɖɔ bàlìwo kudo èkɔ eye, mì gbã èto kudo ètokɔ̃ɛwo. Mì trɔ bàlìwo wɔ̀ tèpe gbàjàwo eye mìa jɔ̀ èkpoviwo kpata.

⁵Nène a ye Tɔhonɔ̀ be gogo la ze glãlã eye àmè sia àmè la kpɔ ɛ̀. Tɔhonɔ̀ ŋutɔ ye gblɔ̃ ɛ̀.”

⁶Ègbè ɖe gblɔ̃ be: “Do àpa!” Eye ɖetɔa ɖo e ŋuti be: “Nukɛ be àpa mù la do ò?” E gblɔ̃ be: “Àgbètɔwo lè sìgbè ègbe nène, wo mu ɖo ŋusɛ̃ sɔ wu ègbemè be flawàwo ò.

⁷Ègbe puna, flawà yrɔ̀nà wàlɛbɛ kè Tɔhonɔ̀ be àya pò to wo ji va yìa. Ɛ̃ɛ, àgbètɔwo cã flà sìgbè ègbe nène.

⁸Ègbe puna, flawà yrɔ̀nà, vɔ̀a, miabe Mawu be ènyà lè tɛ̀gbɛ̀dò.”

⁹Yèruzàlɛm, lia èto yì ji gã ɖe ji. Ziɔ̀n be èdù, do àpa ku ègbè lelele. Èwò kè hɛ̃ àŋɛ̀ nyuɛ̃ ɖe vaa, kɔ ègbè yì ji, mù gbà vɔ̃ ò. Gblɔ̃ na Yudà be èdùwo be: “Mì kpɔ mìabe Mawu a ɖa!

¹⁰Kpɔ Tɔhonɔ̀ Mawu gbãnà ku hɔ̃hlɔ̃. Yebe àbɔ la ɖùfìɔ ɖo dùkɔ̃wo ji. Yebe fɛ̃tu lè e simè. Eye yebe èdɔ be fɛ̃tu lè ŋùkɔ̀ na ɛ̀.

¹¹Sìgbè gbɔkplɔ̀tɔ nènea, e kplɔ̀nà yebe àlɛ̃awo yì ènuɖùpe. E bɔ̀nà wo kudo yebe àbɔ. E kɔkɔna àlɛ̃viwo ɖo yebe àbɔwo mè eye e kplɔ̀nà àlɛ̃nɔ kèwo jì èvia ku àdòdò.”

¹²Àmè kɛ ye jije àpù be èsìwo lè yebe àlɔ̀ be globoe mè ò? Àmè kɛ la kèkè àlɔ̀vitomè sɔ bù jiŋùkusiwo be kèke mè ò? Àmè kɛ le jije ànyigbã be hũhũ lè tɔ̀ka mè, la dà ètowo ku ètokɔ̃ɛwo kpɔ lè sìkelì ji ò?

¹³Àmè kɛ la ŋɔjè Tɔhonɔ̀ be gbɔ̃gbɔ̃a mè eye Mawu la sɔ yebe ɖoɖo do àsi na ò?

¹⁴Àmè kɛ ye Mawu hiã na ètopòɖo sɔ ŋɔjè ènu mè, sɔ kpla ènu so kòjoɖoɖo ŋuti, sɔ fiɔ ɛ̀ ènunya eye bèa fiɔ ɛ̀ ènunya be èmɔ̃ ò?

¹⁵Dùkɔ̃wo lè kpò sìgbè èsì jàja ɖèka kè gɛ̃ jè tɔ̀ka mèa nène, sìgbè èkɔkui ɖèka lè sìkelì ji nène. Dùkɔ̃ lè àzɔ̀gewo flà sìgbè hũhũ nène.

¹⁶Libàn be àvewo mu la sù na vɔsasa be èzò ò. Eye yebe èlãwo kpata mu la sù na Tɔhonɔ̀ be vɔsa fiɔ̃fiɔ̃ kè jèa ò.

¹⁷Dùkɔ̃wo kpata mu nyi ènu ɖekpe lè Tɔhonɔ̀ be ŋùkɔ̀ ò. Wo mu ɖo àsìxɔ̀xɔ ɖe na ɛ̀ ò eye wo lè sìgbè àya nène.

¹⁸Àmè kɛ ye mì la sɔ Mawu sɔ̀ ku, eye nukɛ ye e la teŋu ɖì ò?

¹⁹Àti kpàkpa kè wo jɔ̀ a? Gbèɖe! Wo jɔ̀nà ɛ̀ eye gosìmitì fãnà sìka do è. E gbà wɔ̀nà klòsalò-wlɔ dona èkɔ̀ na ɛ̀.

²⁰Àmè kè ŋuti àgbàgba jèje fuu ɖe mu lè òa, yì jina èjèti. E gbà jina àtikpàtɔ àdodoe kè be àtikpàkpa jènà ègàa.

²¹Mì mu nyaa, mì mu sèa, wo mu gblɔ̃ ɛ̀ na mì so gɔ̃mè jèjea? Mì mu jèsi xixea be ɖotɔ a?

²²Tɔhonɔ̀ sò nɔ̀pe ɖo àvɔ kè cɔ̃ ànyigbã jia be tamè. Eye àgbètɔwo lè na ɛ̀ sìgbè tìkpotìkpowo nène. E vlũ jiŋùkusi sìgbè èxɔ̀mɔnuvɔ nène. Eye e kèkè e mè sìgbè gòxɔ nène sɔ wɔ̀ nɔ̀pe.

²³E crɔ̃ èdùkplɔ̀tɔwo eye e trɔ kòjoɖotɔwo wɔ̀ ènu gbalo.

²⁴Ɛ̃ɛ, wo ɖo wo trolo, àlo wo sɔ ɖo àzìkpe ji mu kpɔ dìdì ò, àlo wo mu kpɔ nɔ̀anyi likè hàɖe ò, zè ɖèkaa, Tɔhonɔ̀ pluna àya do wo. Wo puna eye àyapòpo sɔna, kplɔ̀nà wo yìnà sìgbè èbèyɔɛwo nène.

²⁵Àɖèsã Mawu a gblɔ̃ be: “Àmè kɛ ye mì sɔ mù le sɔ̀ kudo ò? Àmè kɛ mù la ɖì ò?”

²⁶Mì kɔ mìabe ŋùkuwo yì ji nyuɛ̃ ɖe ne mìa kpɔ. Àmè kɛ ye ɖo wètriviwo ò? Àmè kɛ ye na wo le zɔ̃ lè ɖoɖonu sìgbè gbãdãgbãwo nène ò? Àmè kè le yɔ wo zɔ̃ ɖo woabe nyikɔ jia be ŋusɛ̃ kudo àcɛ̀wo lòlò kaka be ɖekpe mu lè kè sĩnàkã lè yebe yɔyɔ mè ò.

²⁷Izràɛl, Yakɔb be àxuedo! Nukɛ ŋuti wò le na àle le gblɔ̃ be: “Tɔhonɔ̀ mu le kpɔ ènu kè le jɔ̀ ɖo ji nyè ò. Mu le xɔ̀ na mù ò.”

²⁸Co Tɔhonɔ̀ ye nyi Mawu so blèmà blèmà. Wò mu nyaa, wò mu sèa? E ye ɖo ànyigbã kpata. Ŋusɛ̃ mu hùenà do è kpɔ ò, ènu cã mu tìnàkɔ̀ na ɛ̀ ò. Àmè ɖekpe mu la ŋɔjè yebe ènunya be gũwɔ̀wɔ mè ò.

²⁹E gbìgbɔ̀ nana ŋusɛ̃ àmè kè ŋusɛ̃ dɛ̃a. E dona jìpo nana àmè kè ci àgbaa.

³⁰Ɖèkajɛ ku tùgbɛ̀jɛwo ŋutɔ cã va gbɔjɔna eye ènu va tìnàkɔ̀ na wo. Eye àmè kèwo ŋuti wo la dojì ɖoa, woa cã va jènà ànyi.

³¹Vɔ̀a, àmè kèwo sɔ woabe ŋùɖo dà ɖo Tɔhonɔ̀ jia, trɔ kpɔna ŋusɛ̃ ye yèwo. Wo zrònà sìgbè èhɔ̃wo nène. Wo punadù ètè màtɔ eye wo yìnà ŋùkɔ̀ kè ènu mu tìnàkɔ̀ na wo òa.