Read gen Ezayà 41 Bible Online

Ezayà 41 - gen bible

Ezayà 41

¹Mìa ètɔ̀dòmèkɔ̃ɛ̃wo, mì bɔ̀ ènu kpoo lè àpe ŋùkɔ̀ ne ŋusɛ̃ yeye ne gɛ̃ jè dùkɔ̃wo dòmè. Eye wo ne dɔ̃ va ne woa pò nupo. Mì na mia yì kòjo mè ne mia kpɔ.

²Àmè kɛ na ye kòjoɖotɔ sitè lè èwèzɛ̃pe ò? E le do àfɔ̀ yebe àfɔ̀dowo mè, le ɖù dùkɔ̃wo ji, e le na èfìɔwo le jè ànyi lè ŋùkɔ̀ na ɛ̀. Yebe èwuia le flì àmèwo sìgbè hũhũ nène, yebe àŋùtia le nyà wo do ègbe sìgbè àya kè kplɔ̀ èbè yìnàa nène.

³Àmè kèa ɖè wo ɖo ènu, nyà wo àfɔsi-àfɔsi kè mu ɖo àfɔ̀ ànyigbã ŋutɔ cã ò.

⁴Àmè kɛ ye ɖo e eye e gbà wɔ̀ ekèa ò? Àmè kè ɖo ènuwo so gɔ̃mè jèjea ye. Ènyè Tɔhonɔ̀ ye. Mù nyi cucugbã eye mù gbà lè kòɖòo. Ènyè ye nyi Tɔhonɔ̀.

⁵Ètɔ̀dòmèkɔ̃ɛwo kpɔ ɛ̀ eye wo tɔ vɔ̃vɔ̃, ànyigbã be nukpòpe kèwo le ŋùku ɖo e ŋutia, tètè gogo, è le hũhũ tìtìtì.

⁶Àmè sia àmè le do àlɔ̀ nɔ̀via le gblɔ̃ be: “Likè goŋu!”

⁷Àtikpàtɔ le do ŋusɛ̃ gosìmitì. Àlɔ̀nudɔwɔ̀tɔ kè do ègà èzò mè le pò è kpàbàa, le do ŋusɛ̃ èzògbɛ̀dɛ. E le gblɔ̃ so e ŋuti be: “E nyɔ!” Eye kudo àɖàŋù wo jɔ̀ àtikpàkpaa sɔ plɛ̃gò sɔ le è ɖotè.

⁸Vɔ̀ èwò, Izràɛl àpe sumɔ̃vi, èwò ye nyi dùkɔ̃ kè mù cã a, Yakɔb, wò nyi xlɔ̃ nyè be jìjimèvi.

⁹Èwò kè mù le so kaka ànyigbã be nukpòpewoa, èwò kè mù yɔ so yebe lipòwo nu kea, èwò kè mù gblɔ̃ na be: “Wò nyi sumɔ̃vi nyèa, mù cã wò eye nyè mu gbe wò ò”.

¹⁰Mù gbà vɔ̃ ò, ɖo mù lè ku wò. Mù gbà ci jojojoe ò, ɖo mù nyi àpo Mawu. Mù le do wò ŋusɛ̃, ɛ̃ɛ mù kpe ɖo ŋuti wò eye mù hlùɛ̃ wò ku àpe àbɔ sɛ̃ŋu kè nana jiɖùɖua.

¹¹Àmè kèwo le do àdɔ̀mèze ɖo ŋuti wòa, la ɖù ŋùkpɛ̃. Àmè kèwo le wɔ̀ àjrè kudo wòa, la crɔ̃ eye wo la ku.

¹²Wò la ji àmè kèwo le wɔ̀ àvũ kudo wòa, vɔ̀ wò mu la kpɔ wo ò. Àmè kèwo sɔ àhùa ɖo ŋuti wòa, la crɔ̃ vɔ̀ keŋu-keŋu.

¹³Ɖo ènyè Tɔhonɔ̀ ye nyi àpo Mawu. Mù le àpo ɖùsi-lɔa eye mù le gblɔ̃ na wò be: “Mù gbà vɔ̃ ò, mù la do wò àlɔ̀.”

¹⁴Mù gbà vɔ̃ ò, Yakɔb be dùkɔ̃, àvlɔkui, èwò Izràɛl be àmè gbɔjɔ kè kpɔ̀tɔ̀a. Tɔhonɔ̀ gblɔ̃ be: Ènyè ye la do wò àlɔ̀, Izràɛl be àɖèsã ye hlùɛ̃ wò gã.

¹⁵Mù la trɔ wò sɔ wɔ̀ dɔwɔ̀nu yeye, èkpogbãnu kè ŋuti àɖuwo la nɔ̀. Wò la gbã ètowo, la tùkù wo. Wò la trɔ wo ku èkpowo wɔ̀ èkɔ gbalo.

¹⁶Wò la fu wo eye àya la kplɔ̀ wo yì. Àya kè sɔa, la kãkã wo pòxla. Vɔ̀ wò ya, wò la do jìjɔɛ be àpa ɖo Tɔhonɔ̀ ŋuti. Wò la kpɔ jìjɔɛ ɖo Izràɛl be àɖèsãa ŋuti.

¹⁷Ènuwɔ̀donɔ̀wo kudo wɔ̀amènɔ̀wo le ji èsì eye wo mu kpɔ ò. Sìkɔ le tì woabe àɖewo. Ènyè Izràɛl be Mawu a, mù la tɔ̀ na wo eye nyè mu la ɖèkɔ̀ lè woa ŋuti kpɔ ò.

¹⁸Mù la na èsì la srà lè èto mà-ɖo àtiwo ji, èsì la nɔ̀ bàlìwo mè. Mù la trɔ zògbè sɔ wɔ̀ tɔ̀gba, eye ànyigbã pupuia la trɔ èsìdo.

¹⁹Mù la do àti vòvòvòwo ɖo zògbè ji, wuwlui kudo gãgãwo[6]. Lè ànyigbã kè mè èsì mu lè òa, mù la do àti hamè-hamè ɖo funu[7].

²⁰Ne àmèwo kpɔa, woa nya be Tɔhonɔ̀ ye wɔ̀ ènu kèawo, be Izràɛl be àɖèsãa ye ɖo wo. Wo la le ŋùku ɖo e ŋuti sɔ sè e gɔ̃mè.

²¹Tɔhonɔ̀, Yakɔb be èfìɔa gblɔ̃ be mìa dùkɔ̃ buwo be mawuwo mì va gblɔ̃ mìabe ènyàa, mì va ɖù mìabe ɖàsea.

²²Mì dɔ̃ va ne mìa va gblɔ̃ ènu kè la va jɔ̀ a. Leke ènua jɔ̀ va yì ò? Mì gblɔ̃ ɛ̀ na mi ne mia bù e ŋuti kpɔ. Àlo mì kã èsɔ̀ kè gbãnàa be àseŋu na mi ne mia nya ènu kè la va jɔ̀ a.

²³Ɛ̃ɛ, mì gblɔ̃ ènu kè la ɖɛ vaa na mi. Eŋuã mi la nya be mì nyi mawuwo. Yɔ! Mì wɔ̀ ènu nyuɛ̃ àlo ènu bàɖà kudo mi, mì wɔ̀ ènu ɖe jro! Nène a mi la kpɔ ɛ̀ eye mi la na mì bùbu tɔ̀hɛ.

²⁴Vɔ̀a, mì mu nyi ènu ɖekpe ò. Ènu kè mì nyia, mu ɖo àsì xòmè ɖekpe ò. Àmè kè cã mìa nyɔŋu na mi.

²⁵Mù na àmè ɖe to so èvègo gbãnà, eye e va ɖo; e sè wo yɔ yebe nyikɔ so kaka èwèzɛ̃pe ke; e la fãnyà ŋùkɔ̀nɔ̀tɔwo sìgbè lekè wo fãnyànà bàbaa nène, sìgbè lekè èzemètɔ fãnyànà bàba kudo yebe àfɔ̀wo nène.

²⁶Àmè kɛ ɖè ènyà kèa gblɔ̃ sãa so gɔ̃mèjèje, ne mia nya ɛ̀ ò? Àmè kɛ ye sìa mi ɖɛ sãa, ne mia gblɔ̃ be: “Nyàwo ye ò?” Gbèɖe, àmè ɖekpe mu gblɔ̃ ɛ̀ sã ò, àmè ɖekpe mu kè ènu ò, àmè ɖe mu sè ènyà ɖekpe so mìa nu ò.

²⁷Ènyè Tɔhonɔ̀ ye gblɔ̃ jè ŋùkɔ̀ lè Yèruzàlɛm. Nyàwo, mù dɔ̃ àmèdɔ̃dɔ̃ ɖoɖa Ziɔ̀n ne bèa sɔ àŋɛ̀ nyuɛ̃ ɖe yì.

²⁸Mù ɖè ŋùku eye kpɔɖa àmè ɖèka tètè mu lè ò, lè woa dòmèa ètopòɖotɔ ɖèka mu lè ò. Mu nyi nène òa, mù kè biɔ wo ne woa ɖè àɖàŋù na mù.

²⁹Wo mu nyi ènu ɖekpe ò, wo mu le wɔ̀ ènu ɖekpe ò. Woabe èkpe tatawo nyi ènu gbalo, àya ɖèɖe.