Read gen Ezayà 42 Bible Online

Ezayà 42 - gen bible

Ezayà 42

¹Kpɔɖa, àpe sumɔ̃vi kè mù le ɖotèa ye nyi ekèa. E ye mù cã lè jìjɔɛ mè. Mù sɔ gbɔ̃gbɔ̃ nyèa dà ɖo e ji. E la kplɔ̀ dùkɔ̃wo lè jìjɔɛ mè.

²Mu la do àpa ò, eye mu la kɔ ègbè yì ji cã ò. Mu la na wo la sè yebe ègbè lè èmɔ̃ to cã ò.

³Mu la ŋɛ̃ àplati kè xaa ò eye mu la ci kãligbɛ̃ be èkà kè le tù àzìzɔa ò. Tutu ye e la na kòjoɖoɖo, la sò àxue.

⁴Mu la gbɔjɔ àlo la va trɔ lè ènu ɖe yomè kaka ye jɔ̀jɔɛ la sò àxue ɖo ànyigbã ji ò. Eye ètɔ̀dòmèkɔ̃ɛ̃wo la nɔ̀tè kpɔ yebe èseawo.

⁵Tɔhonɔ̀ Mawu ɖo jiŋùkusi eye e vlũ ì. E wɔ̀ ànyigbã gbàjà kudo èkusɛ̃sɛ̃ kèwo kpata lè e jia. E na àgbè dùkɔ̃ kèwo kpata lè e jia. E gbɔ̃nà ɖo ènu sia ènu kè lè e jia mè. E gblɔ̃ na yebe sumɔ̃via be:

⁶“Ènyè Tɔhonɔ̀ ye yɔ wò lè ɖoɖo nyuɛ̃tɔ̀a mè. Mù la le àpo àlɔ̀tinu, ènyè ye wɔ̀ wò. Mù la to ji wò sɔ ɖùzò kudo dùkɔ̃a. Wò nyi dùkɔ̃wo be kɔ̀kɔ̀ɛ lè ànyigbã ji.

⁷Wò la hũ ŋùkuviwo na ŋùkugbãgbãnɔ̀wo. Wò la ɖè ègà àmè kèwo lè vìvìti mèa, to lè gàmè.

⁸Ènyè ye nyi Tɔhonɔ̀ kè wo yɔna. Nyè mu la sɔ gogo nyè na àmè bu ò, eye nyè mu la na kàfù kafu nyèa la yì vòdu be àtikpàkpawo gbɔ ò.

⁹Kpɔɖa, ènyà cucugbãtɔ̀wo va e mè vɔ̀ eye mù le ɖè ègbèfã yeye buwo gbɔ̀xue wo la va jɔ̀. Mù na ne mìa sè wo.”

¹⁰Mì jì èhà yeye na Tɔhonɔ̀. Mì jì kafu-ha na ɛ̀ so kaka ànyigbã be nukpòpewo, mì àmè kèwo le to àpù be èsì gã jia kudo ènu kèwo lè ètɔ̀dòmèkɔ̃ɛ̃wo jia.

¹¹Ne zògbè kudo yebe èdùwo ne kɔ ègbè yì ji, Kedàr be kɔpewo, àmè kèwo sò àxue ɖo àkpã mèa, mì do jìjɔɛ be àpa. Mì sò àyo ku àbòbo lelele so ètowo ji.

¹²Wo ne na gogo Tɔhonɔ̀, wo ne ɖè yebe kàfu-ha fiɔ lè ètɔ̀dòmèkɔ̃ɛ̃wo ji.

¹³Tɔhonɔ̀ la to va sìgbè kãlìsu nène. Yebe lɔ̃lɔ̃ be nuhuã na e sitè sìgbè àhùawɔ̀tɔ gã nène. E do àhùapa sɛ̃sɛ̃, eye e kpe àkɔ ku yebe kɛ̃tɔwo sìgbè kãlìsu nène.

¹⁴So kaka gà ɖe mè ye mù bɔ̀ ènu kpoo le kpɔ ènu, nyè mu le gblɔ̃ ènyà ɖekpe ò, mù le ɖokoe nyè. Fifìa mù la do àpa. Mù le ŋɛ̃ sìgbè nyɔ̃nù kè le le èkua nène, eye gbɔ̃gbɔ̃ cipò na mù, ènu tìkɔ̀ na mù.

¹⁵Mù la gùdù èto kudo ètokɔ̃ɛwo gbàkudo ègbe do àmà kèwo lè woa jia. Mù la na wo la pu yùkpà. Mù la na èsì la pu lè tãkuwo mè eye ètɔ̀wo la pu, trɔ zũ ànyigbã pupui ɖèɖe.

¹⁶Mù la kplɔ̀ ŋùvìnɔ̀wo to èmɔ̃ kè wo mu nya òa ji. Mù la na wo la zɔ̃ to èmɔ̃ kè ji wo mu to kpɔ òa, ji. Mù la trɔ vìvìti cicri sɔ wɔ̀ kɛ̃klɛ̃ lè ŋùkɔ̀ na wo. Eye mù la jɔ̀ èmɔ̃ gɔ̃glɔ̃wo na wo. Ènu kèawo ye mù la wɔ̀ eye nyè mu la gble èɖe ɖɛ ò.

¹⁷Àmè kèwo le kã ɖo vòduwo jia, gblɔ̃ na woabe legbawo be “Mìawo ye nyi miabe mawuwo”. Àmè kèawo la yì ŋùgbe eye wo la ɖù ŋùkpɛ̃.

¹⁸Mìa ètokunɔ̀wo, mì ɖoto; mìa ŋùvìnɔ̀wo, mì ɖèkɔ̀ kpɔ.

¹⁹Àmè kè èto ku na, àlo ŋùku gbã na a, nyi àpe sumɔ̃vi. Ɛ̃ɛ, àmè kɛ èto ku na, àlo ŋùku gbã na sìgbè dùkɔ̃ nyèa nène ò?

²⁰Wò kpɔ ènu fuu be dò vɔ̀, wò mu mɔ̀nu jè ɖekpe ŋuti ò. Wò kènà èto co, wo mu sènà ènu ɖekpe ò.

²¹To yebe ènyà mè sòso jɔ̀jɔɛa mè ye Tɔhonɔ̀ jro la ɖè zè nène ye yebe èsea lòlò gbà nyɔ ɖoa fiɔ.

²²Vɔ̀ mì nyi dùkɔ̃ kè be ènuwo ye wo hlà eye wo lɔ joa. Wo yì wla wo ɖo àxuewo mè, lè gàkpawo mè keŋu. Wo ɖè wo do àsi, ne àmè ɖe mu gbà xɔ̀ na wo ò. Nène a ye àmè ɖekpe mu gblɔ̃ be: “Mì jo wo ɖɛ ò!”

²³Àmè kɛ ye lè mìa dòmè le ŋùku ɖo ènu kèa ŋuti ò? Àmè kɛ la sè ò? Àmè kɛ teŋu sè e mè fifì ò?

²⁴Àmè kɛ ye ɖè Izràɛl, Yakɔb be èdùa do àsi na àmè kèwo hlà yebe ènuwo gbà lɔ wo yì ò? Tɔhonɔ̀ Mawu kè ji mi jè àgɔ̀ lèa ye! Mi gbe yebe èmɔ̃ ji toto eye mi ɖèkɔ̀ lè yebe èsea ŋuti.

²⁵Eye Tɔhonɔ̀ ɖùɖù yebe àdɔ̀mèzea be àdã kudo àhùa be èhlɔ̃dãnuwo ɖo e ji. E na èzò le bì ènu trɔ do wo gòdò, vɔ̀, dùkɔ̃a mu sè ènu ɖekpe gɔ̃mè ò. Èzò fiɔ̃ wo koɖi koɖi co, wo mu sɔ ɛ̀ veveɖe ò.