Read gen Ezayà 43 Bible Online

Ezayà 43 - gen bible

Ezayà 43

¹Fifìa Izràɛl, Tɔhonɔ̀ kè ɖo wò gbà wɔ̀ wòa le pò nupo na wò be: “Mù gbà vɔ̃ ò, ɖo mù hlùɛ̃ wò plè, nyikɔ wò ye mù yɔ, tɔ̀ nyè ye wò nyi.

²Ne wò le sò èsì wɔ̀gũa, mù lè kudo wò, ne wò le to ètɔ̀ sàsrawo jia, wò mu la crɔ̃ ò. Ne wò le zɔ̃ lè èzò be dòdòmèa, wò mu la fiɔ̃ ò. Èzò be àɖewo mu la fiɔ̃ wò koɖi koɖi ò.

³Ɖo ènyè Tɔhonɔ̀ ye nyi àpo Mawu, Izràɛl be àɖèsã ye nyi àpo hlùɛ̃tɔ. Mù ɖè Ejiptè na ɖo èta wò, Ètiopìa kudo Sebà, mù sɔ ɖɔ̀lì wò.

⁴Ɖo wò ɖo àsìxɔ̀xɔ tɔ̀hɛ lè àpe ŋùmè. Wò ɖo kpɛ̃kpɛ̃ lè gbɔ nyè eye mù lɔ̃ wò, Ekèa ŋuti mù sɔ àmè sùgbɔ sɔ ɖo tèpe wò, dùkɔ̃ sùgbɔ sɔ ɖɔ̀lì wò ɖo.

⁵Mù gbà vɔ̃ ò, ɖo mù lè kudo wò. Mù la trɔ kplɔ̀ jìjimèvi wòwo so kaka èwèzɛ̃pe gbɔ̀ eye mù la bɔ̀ wo so èwèɖoxɔ̀pe ke.

⁶Mù gblɔ̃ na èvègo be “Jo wo kɔ̀ ɖɛ!” Na àpùgo be “Mù gbà le wo ɖɛ ò!” Mì trɔ kplɔ̀ èvi nyèwo gbɔ̀ so èdù mà-sɔɛ ŋuawo mè ne tùgbɛ̀jɛvi nyèwo nɔ gbɔ̀ so ànyigbã be nukpòpewo.

⁷Mì kplɔ̀ àmè kèwo ŋuti wo yɔ àpe nyikɔ ɖo eye mù wɔ̀ wo gbà ɖo wo na àpe gogoa.

⁸Mì ɖè dùkɔ̃ kè ɖo ŋùku co, mu le kpɔ ènu ò; kè ɖo ètowo vɔ̀, mu le sè ènu òa, to va.”

⁹Dùkɔ̃wo ne bɔ̀ ɖo èdu ne èdùmètɔwo kpata ne bɔ̀bɔ̀ nɔ̀ ànyi gòdò. Àmè kɛ lè woa dòmè teŋu gblɔ̃ ènu kè la jɔ̀ a ò? Àmè kɛ la teŋu gblɔ̃ ènu kè jɔ̀ va yì ò? Eŋuã, wo ne sɔ woabe ɖaseɖùtɔwo va fiɔ, kèwo la ɖo èkpe e ji be woabe ènyà jɔ̀. Wo ne ɖoto wo eye woa gblɔ̃ ku èjìɖèɖe be “Nyàwo ye!”

¹⁰Tɔhonɔ̀ gblɔ̃ be: “Mìawo ye nyi àpe sumɔ̃vi kè mù cã a, ne to xɔ̀se ɖoɖo ɖo ji nyèa, mìa gbà sè e mè be ènyè ɖèka kpò ye nyi Mawu. Mawu bu ɖekpe mu jè ŋùkɔ̀ na mù kaka èbu la jè yo nyè mè ò.

¹¹Ènyè ɖèka pɛɛ kpò ye nyi Tɔhonɔ̀. To vò lè ŋuti nyèa, hlùɛ̃tɔ ɖe mu lè ò.

¹²Ènyè ye hɛ̃ hlùɛ̃gã va. Mù ɖè yebe ègbèfã eye mù ɖè e fiɔ. Ènyè ye wo la kpɔ lè mìa gbɔ, mu nyi vòdu buwo ò.” Tɔhonɔ̀ gbà gblɔ̃ ke be: “Mì nyi àpe ɖàseɖùtɔwo eye mù nyi Mawu.

¹³Ɛ̃ɛ, nène mù lè so tɛ̀gbɛ̀dò: 'Àmè ɖekpe mu la teŋu xɔ̀ ènu kè mù lè ɖo àsi ò. Àmè ɖekpe mu lè la gble ènu kè mù wɔ̀a cã ò'.”

¹⁴Izràɛl be àɖèsã, mìabe xɔ̀namètɔa gblɔ̃ be: “Mìawo ŋuti ye mù ɖo àhùakɔ̃ ɖoɖa Babɛ̀l. Mù la na woabe èdùgbowo la fo eye mù la kplɔ̀ àmè kèwo si àhùa kpata gbɔ̀, ɛ̃ɛ Kaldeatɔwo la do jìjɔɛ be àpa lelele lè àpùjihũwo mè.

¹⁵Mù nyi Tɔhonɔ̀, mìabe àɖèsã, Izràɛl be ɖotɔ, mìabe èfìɔa.”

¹⁶Nène a ye Tɔhonɔ̀ gblɔ̃, e ye kè ɖè èmɔ̃ to àpù be dòdòmè, e ɖè àfɔ̀mɔ to èsì gbɛ̀lua be dòdòmè ke.

¹⁷E ye na àhùakèkeviwo kudo èsɔwo, àhùakɔ̃ kudo àhùawɔ̀nu gbogbowo sɔ̀gbè, na àhùawɔ̀wɔ. Ha ɖèka, e mù wo pu ànyi gblò ne wo mu gbà fɔ̃ gbèɖe ò. E ci wo sìgbè kãligbɛ̃ be èkà nène.

¹⁸Tɔhonɔ̀ gblɔ̃ be: “Mì mu gbà ɖo ŋùku ènu kèwo jɔ̀ va yìa ji ke ò, mì ŋlɔ̀be ènu xoxoawo.

¹⁹Ɛ̃ɛ, mù la wɔ̀ ènu yeye ɖe, ènu ɖe kè jè egɔ̃mè vɔ̀. Mì mu le kpɔ ɛ̀ hàɖe òa? Mù la ɖè èmɔ̃ yeye ɖe to zògbè ji. Mù la na ètɔ̀wo la srà lè èkònɔ̀-nyigbã ŋua ji.

²⁰Ègbemèlãwo, ègbevũ kudo tatabòliwo la na mù gogo, ɖo mù na èsì, ètɔ̀ srà lè ànyigbã màsɛ̃ku nyuɛ̃a ji. Ɛ̃ɛ, mù la na èsì dùkɔ̃ nyè kè mù cã a.

²¹Dùkɔ̃ kè mù wɔ̀ na ɖokoe nyè ne bèa nɔ jì kafu-hawo na mù a.

²²Tɔhonɔ̀ gblɔ̃ be: “Yakɔb, ào, mu nyi ènyè ye wò fãyɔ ò, ɖo àpe ènu tìkɔ̀ na wò, Izràɛl.

²³Co wò mu hɛ̃ àlɛ̃wo va na mù lè vɔsa fiɔ̃fiɔ̃ wɔ̀wɔ mè ò. Wò mu na mù gogo lè vɔsa kèawo mè ò. Vɔ̀ nyè mu sɔ wò wɔ̀ kluvi, le biɔ wò ènu nana ò. Eye nyè mu ɖè èfũ na wò lè èzò tɔ lifi wɔ̀wɔ mè ò.

²⁴Wò mu zã àpo èci sɔ plè àmì huɛ̃huɛ̃ na mù ò. Wò mu na mù vɔsa-lãwo be àmì kaka e tìkɔ̀ na mù ò. Vɔ̀ àpo àgɔ̀jèjewo sɔ mù wɔ̀ èkluvi. Àpo èvuɛ̃wo na ènu tìkɔ̀ na mù.

²⁵Co ènyè ye le sɔ àpo àgɔ̀jèjewo kè wò sìgbè àlekè mù jro a nène. Eye nyè mu la gbà le wo ɖo sùsu mè ò.

²⁶Ɖoŋùku ènyà kè wò sɔ ɖo ŋuti nyèa ji na mù ne mia yì kòjo mè. Wò ŋutɔ gblɔ̃ ènyàa, ne bèa ɖè àpo ènyà jɔ̀jɔɛa fiɔ.

²⁷Xoxoa, tɔgbe wòa jè ànyi, eye àpo ènyà xɔ̀gblɔ̃tɔwo cã sitè ɖo ŋuti nyè.

²⁸Ekèa ye wɔ̀ be mù ɖìgbɔ àpo àgbònùglawo, xɔ̀ woabe àcɛ̀wo. Mù ɖè Yakɔb be àxuedo a do àsi, eye mù ɖè Izràɛl do àsi na kɛ̃tɔwo be woa dovlo è.