Read gen Ezayà 44 Bible Online

Ezayà 44 - gen bible

Ezayà 44

¹Vɔ̀ fifìa, ɖoto Yakɔb be àxuedo, àpe sumɔ̃vi, Izràɛl dùkɔ̃ kè mù cã a.

²Nène a ye Tɔhonɔ̀ kè wɔ̀ wò, kè wò lè ènɔ̀ wò be àdɔ̀mè eye e le do wò àlɔ̀a, gblɔ̃ be: Mù gbà vɔ̃ ò, sumɔ̃vi nyè Yakɔb, èwò kè si mù xɔ̀ àmè fùflu lèa, ye mù cã.

³Ɖo nyàwo, mù la ɖùɖù èsì kɔ̀ ɖo ànyigbã kè mu gbà nù èsì kpɔ òa ji, èsì sàsra ɖo ànyigbã pupuia ji. Mù la ɖùɖù àpe Gbɔ̃gbɔ̃ ɖo jìjimè wòa ji, sìtu ɖo àpo tɔgbe-tɔ̀gbè yɔviwo ji.

⁴Wo la mìɔ̃ vɔ̀vlɔ̀ sìgbè ègbe nène, sìgbè àti kèwo mìɔ̃ ɖo ètɔ̀ toa nène.

⁵Ɖèka la gblɔ̃ be: “Tɔhonɔ̀ tɔ̀ wò ye mù nyi”. Èvègɔ̃a la gblɔ̃ be: “Yakɔb be xòmètɔ ye mù nyi”. Àmè bu la ŋlɔ̀ ɖo yebe àbɔ ŋuti be: “Mù nyi Tɔhonɔ̀ tɔ̀” eye e la gblɔ̃ be woa yɔ yè be “Izràɛl.”

⁶Tɔhonɔ̀, Izràɛl be èfìɔ ŋusɛ̃kpatatɔ kè xɔ̀ ɛ̀ plèa, gblɔ̃ be: “Mù nyi gɔ̃mèjèje kudo vɔ̀vɔnua. Tovò lè ŋuti nyèa, Mawu ɖekpe mu gbà lè ò.

⁷Àmè kɛ ye lè sìgbè ènyè nène ò? Ne kè ènu, ne bèa ɖè ègbè eye bèa ɖè ènyà gɔ̃mè na mù. Ne gblɔ̃ ènyà kèwo jɔ̀ so kaka àgbètɔxòmè be jɔ̀jɔmè, ɛ̃ɛ ne gblɔ̃ ènu kèwo la ɖɛ vaa, na mù.

⁸Mì mu gbà hũhũ ò dùkɔ̃ nyè, mì mu gbà vɔ̃ ò. Mù gblɔ̃ ɛ̀ na mì xoxo jè ŋùkɔ̀, mù ɖè è fiɔ mì sã. Mì nyi àpe ɖaseɖùtɔwo. Mawu ɖe lè tovò lè ŋuti nyèa? Gbèɖe, àkpã sɛ̃sɛ̃ ɖekpe mu gbà lè to ŋuti nyè ò.”

⁹Àmè kèwo jɔ̀nà vòduwo be èbocɔɛviwo mu nyi ènu ɖekpe ò. Woabe àtikpàkpawo mu ɖo àsì xɔ̀xɔ ɖe ò. Eye wo nyi woa ŋutɔ be ɖaseɖùtɔ kèwo mu le kpɔ ènu ɖekpe ò. Àtikpàkpa kèawo nyi woabe ŋùkpɛ̃nu, wo mu nya ènu ɖekpe ò.

¹⁰Woa jɔ̀ vòdu, woa wɔ̀ àtikpàkpa kèwo mu ɖè àlè ɖe òa, nyi sùkunɔ̀-dɔ wɔ̀wɔ.

¹¹Kpɔɖa woabe hũsìviwo kpata ɖɔ kudo ŋùkpɛ̃. Eye àgbètɔwo ye lina vòduwo kudo èbocɔɛawo. Wo ne bɔ̀ wo eye woa kpata be àfɔ̀wo ne sɔ̀gbè! Vɔ̃vɔ̃ la jè woa ji eye èŋù la kpɛ̃ wo ŋutɔ.

¹²Èzò-gbɛ̀dɛ kè sò ègà yìbɔ, ɖo èzò mè kaka be bìa hɛ̀a, la do hãmà na ɛ̀. Yebe àbɔ be ŋusɛ̃ ye e la sɔ do hãmà na ɛ̀ sɔ na ɛ̀ nɔ̀nɔmè kè jro èa. Vɔ̀ ne àdɔ̀ le wù ìa, ŋusɛ̃ ŋua mu la gbà nɔ̀ e si ò. Ne mu nù èsì òa, e la gbɔjɔ.

¹³Àtikpàtɔ la jije yebe àtia kudo jijeka eye e la tè èflì ɖo e ŋuti sɔ na ɛ̀ jèsìdo na ènu kè e le ji la taa, eye e la ɖè èpɛ ɖo àtia ji na yebe kpàkpa. E lìnà ɛ̀ gbà plɔna e ŋuti ne bèa zìɔ̃. Àtikpàtɔa kpànà àtia ɖo àgbètɔ be nɔ̀nɔmè nu, e gbà nana ɛ̀ ŋusù be jɔ̀jɔmè ne bèa kpɔ nɔ̀pe lè mawuxɔa mè.

¹⁴Wo na wo sò sedàtiwo. Eye wo ɖè èjèti sɛ̃sɛ̃wo ɖovò. Wo ji àti gãgãwo be èmɔ̃ ne woa trì kpe è, vɔ̀ èjisi jàja ye nana be sĩnà.

¹⁵Àti ye nana ànakè kè wo sɔ dona èzòa. Àmè ɖewo zãna ɛ̀ sɔ ɖona èsì zòzo. Wo sɔ dona èzò kè ji wo ɖànà ènu lèa. Wo gbà sɔna ɛ̀, kpànà vòdu àlo èbocɔɛ kèwo wo sumɔnaa. Wo sɔ jɔ̀nà àtikpàkpa kè wo yì jènà èɖɛ̀ na a.

¹⁶Wo sɔna àtia be àkpa ɖèka sɔ dona èzò. Wo la sɔ mè èlã eye wo la tɛ èkplɔ̃ sɔ ɖùnu, ɖɔpò. Wo gbà sɔna ɛ̀ dona èzò ɖo xɔ̀mè sɔ lena zòzo, gblɔ̃nà be: “Àti kèa nyɔ ŋutɔ, e bìnà nyuɛ̃ ɖe!”

¹⁷Àtia be àkpa èvègɔ̃a ye wo sɔ wɔ̀nà vòdu, àtikpàkpa. Eye wo jènà èklò ɖo ŋùkɔ̀ na ɛ̀ sɔ sumɔ na ɛ̀. Wo fãnàkue na ɛ̀ gblɔ̃ be: “Èwò ye nyi Mawu nyè, hlùɛ̃ mù gã!”

¹⁸Àmè kèawo mu nya ènu ɖekpe ò eye wo mu sè ènu ɖekpe gɔ̃mè ò Nyàwoa, woabe ŋùkuviwo ji cɔ̃ kaka wo mu le kpɔ ènu ò; woabe sùsuwo titɔ ne woa teŋu ŋɔjè ènuwo mè.

¹⁹Àmè ɖekpe mu bù èta mè sɔ do è jèsìdo kaka la sè e gɔ̃mè ne bèa teŋu kè ènu gblɔ̃ be: “Mù sɔ àtia be àkpa ɖèka do èzò, mù ɖà ènu kudo yebe àkawo eye mù mè èlã cã, sɔ ɖù. Àkpa èvègɔ̃a, ènu gbegble mù la sɔ wɔ̀a? Mù la jè èɖɛ̀ na àti kè wo kpàa?”

²⁰Ào, àmè kèawo le tɛ ɖo ènu kè nyi àfi ɖèɖe kpòa ŋuti. Wo blènà woa ɖokoe eye wo ɖènà sùsu bàɖàwo. Wo mu la teŋu hlùɛ̃ woabe àgbè gã ò. Ɖekpe mu lè kè la gblɔ̃ be: “Ènu kè lè àlɔ̀ mè na mù a, nyi vòdu àmè flùnu gbalo ye!”

²¹Yakɔb be àxuedo, ɖo ŋùku ekèa ji; Izràɛl, wò nyi àpe sumɔ̃vi. Mù wɔ̀ wò ne wòa nɔ sumɔ mù. Izràɛl dùkɔ̃, nyè mu la ŋlɔ̀be wò kpɔ ò.

²²Mù tutu àpo àglajèjewo jo sìgbè lilikpo nène, àpo àgɔ̀jèjewo jo sìgbè lilikpo ɣewo nène. Trɔ gbɔ̀ va gbɔ nyè, ɖo mù xɔ̀ wò plè.

²³Mì do jìjɔɛ be àpa lelele, jiŋùkusiwo, ɖo Tɔhonɔ̀ lè yebe èdɔ ji. Mìa ànyigbã ji be ègũwo, mì ɖè ègbè. Mìa ètowo kudo àve mè be àtisuwo kpata, mì do jìjɔɛ be àpa, ɖo Tɔhonɔ̀ hlùɛ̃ yebe dùkɔ̃a. E ɖè yebe gogoa fiɔ lè Izràɛl.

²⁴Tɔhonɔ̀ nyi àpo hlùɛ̃tɔ, Izràɛl. E ye wɔ̀ wò so kaka ènɔ̀ wò be àdɔ̀ mè ke. E gblɔ̃ be: “Mù nyi Tɔhonɔ̀. Ènyè ye wɔ̀ ènu kèwo kpata lèa. Ènyè ɖèka pɛɛ ye vlũ jiŋùkusi, mù kèkè ànyigbã àlɔ̀do ɖe mà xɔ̀ so àgbètɔ gbɔ.

²⁵Fifìa, mù xɔ̀ ŋusɛ̃ lè èsɔ̀mèkpɔtɔwo be ènyà si. Mù na ènukãtɔwo le gblɔ̃ ènyà mà-ɖotawo. Mù miɔ̃ ènu na ènunyatɔwo eye mù ɖèfiɔ be woabe ènunya nyi ènu gbalo.

²⁶Sumɔvi nyèwo be èdɔ kpò mù le wɔ̀ eye mù na àmèdɔ̃dɔ̃ nyèwo be àŋɛ̀wo le kpɔ e mè vava. Mù gblɔ̃ so Yèruzàlɛm be: “Àmèwo la gbà trɔ va sò nɔ̀pe ɖo funua, wo la trɔ tù yebe èglìwo.” Mù gblɔ̃ so Yudà be èdùwo ŋuti be: “Wo la trɔ tù wo!”

²⁷Mù ɖè ègbè na àpù wɔ̀ ègũa be: “Pu kpakpla, ne ètɔ̀ sàsra ɖekpe mu gbà va ɖo èwò mè ke ò.”

²⁸Mù gblɔ̃ so Sìrus ŋuti be: “E nyi dùkɔ̃ nyèa be àlɛ̃kplɔ̀tɔ. E la na ènu kèwo mù jro a kpata la kpɔ e mè vava. E la na ègbè be woa trɔtù Yèruzàlɛm, ne woa gbìgbɔ̀ trɔtù mawuxɔa.”