Read gen Ezayà 45 Bible Online

Ezayà 45 - gen bible

Ezayà 45

¹Tɔhonɔ̀ gblɔ̃ na yebe àmèsìamìna èfìɔ Sìrus be: “Mù le àlɔ̀tinu na wò ne ma sɔ dùkɔ̃wo ɖo àpo àcɛ̀ gɔ̃mè. Mù jro la ɖè èfìɔwo be ŋusɛ̃ jo eye ma hũ èdù-gbo kèwo lè tutua, lè ŋùkɔ̀ na wò.

²Nyè ŋutɔ mù la zɔ̃ lè ŋùkɔ̀ na wò, nɔ ɖè àfɔ̀klɛ̃nuwo jo. Mù la gbã gàjɛ̃ be àgbowo. Mù la tùkù gàyìbɔ be sãfewo.

³Mù la sɔ àdɔ̀kùnu kèwo lè wawla mèa, na wò. Nène a ye wò la nya be ènyè ye nyi Tɔhonɔ̀. Ènyè Izràɛl be Mawu ye le yɔ wò Sìrus.

⁴Àpe sumɔ̃vi Yakɔb ŋuti ye, ɛ̃ɛ Izràɛl kè mù cã ŋuti ye mù yɔ àpo nyikɔ ɖo. Mù na wò àsìxɔ̀xɔ kèa, co wò mu nya mù ò.

⁵Ènyè ye nyi Tɔhonɔ̀, ɖekpe mu gbà lè ò. Mawu bu mu lè tovò lè ŋuti nyè ò. Wò mu kpɔ nya mù ò, vɔ̀ mù na wò ŋusɛ̃ wɔ̀ èdɔ.

⁶Nène a, wo la nya so èwèzɛ̃pe va yì èwèɖoxɔ̀pe be: “Tovò lè ŋuti nyèa, ènu ɖekpe mu lè ò. Ènyè ye nyi Tɔhonɔ̀a, èbu mu gbà lè ò.

⁷Mù ɖo kɛ̃klɛ̃ eye mù wɔ̀ vìvìti. Mù wɔ̀ nyɔna kudo gbledo. Ɛ̃ɛ, ènyè Tɔhonɔ̀ ye wɔ̀ ènu kèawo kpata.

⁸Jiŋùkusiwo, mì hlɛ̃ so èji sìgbè àhũ jàja nène eye lilikpo ɣewo ne nɔ ɖùɖù jɔ̀jɔɛ wɔ̀wɔ ɖoɖa sìgbè ètɔ̀ sàsra nène, ne ànyigbã ne hũ gbàa, ne hlùɛ̃gã ne kèkèta, ne jɔ̀jɔɛ wɔ̀wɔ ne mìɔ̃ zè ɖèka kpò. Ènyè Tɔhonɔ̀ ye ɖo ŋusù kèa.”

⁹Bàbà na àgbètɔ kè la va nɔ hɛ̃ ènyà ku àmè kè ɖo è a. Àgbètɔ lè sìgbè èkɔgbã nène, lè èkɔgbãwo dòmè. Ànyikɔ la teŋu gblɔ̃ na àmè kè le na ɛ̀ nɔ̀nɔmè a be: “Nukɛ ye wò le wɔ̀ ò?” Eye ènu kè wò wɔ̀ a, la teŋu gblɔ̃ be: “Wò mu ɖo àlɔ̀nu ò” a?

¹⁰Bàbà na àmè kè gblɔ̃ na ètɔa be: “Nukɛ mù nyi ye wò na àgbè ò?” Àlo la gblɔ̃ na ènɔa be: “Nukɛ mù nyi ye wò jì ò?”

¹¹Nène a ye Tɔhonɔ̀, Izràɛl be àɖèsã kè wɔ̀ yebe dùkɔ̃a, gblɔ̃ be: “Mì le biɔ mù ènyà so èvi nyèwo ŋutia, mì jro la do ègbè àsi na mù kùɖo ènu kè mù wɔ̀a ŋutia?

¹²Ènyè ye wɔ̀ ànyigbã eye mù ɖo ènu àgbèagbèwo ɖo e ji. Ɛ̃ɛ, àpe àlɔ̀wo ye vlũ jiŋùkusiwo eye mù ɖènà ègbè ɖo woabe àhùakɔ̃a kpata ji.

¹³Ènyè ye do ŋusù kèa ètòmè ɖo jɔ̀jɔɛ wɔ̀wɔ ŋuti. Mù la jɔ̀ èmɔ̃wo kpata lè ŋùkɔ̀ na ɛ̀. E ye la trɔtù èdù nyèa. E la trɔ kplɔ̀ àpe àmè kèwo ci gàtɔgbemèa, gbɔ̀ èfɛ̃ ɖe mà tu àlo àjɔ̀ ɖe mà na. Tɔhonɔ̀ ŋusɛ̃ kpatatɔa ye gblɔ̃ ɛ̀!”

¹⁴Nène a ye Tɔhonɔ̀ gblɔ̃ be Izràɛl, Ejiptèviwo be àlɔ̀nu-dɔ, Ètiopìa be àjɔdo-gawo, Sebà be àmè jɔ̀ àsuwo, ekèawo kpata la va to gbɔ wò eye wo la trɔ tɔ̀ wò. Dùkɔ̃ kèawo la kplɔ̀ wò do, wo la tɔ wo ɖo kɔ̀sɔ̀kɔsɔwo nu. Wo la nɔ̀ èklò ji lè ŋùkɔ̀ na wò, eye wo la gblɔ̃ kudo ègbè sɛ̃sɛ̃ be: “Gbɔ wò kpò Mawu lè eye èbu ɖekpe mu gbà lè ò.”

¹⁵Vɔ̀, èwò ye nyi Mawu kè wla ye ɖokoea nyàwo, Izràɛl be Mawu kè hlùɛ̃nà àmè gãa.

¹⁶Àmè kèwo jɔ̀nà vòdu kudo àtiawo ɖɔ ku ŋùkpɛ̃ kudo èzũwo. Wo zũnà wo lè èmɔ̃wo ji ne wo va le yìa.

¹⁷Vɔ̀ Tɔhonɔ̀ hlùɛ̃ Izràɛl eye yebe hlùɛ̃gã lè tɛ̀gbɛ̀dò. Mìa yebe dùkɔ̃wo, mì mu la gbà kpɔ ŋùkpɛ̃ gbèɖe kaka la sè èzũ ke ò.

¹⁸Tɔhonɔ̀ ɖo jiŋùkusi. E nyi Mawu kè wɔ̀ ànyigbã eye e li ì ɖotè goŋu-goŋu. Mu ɖo è puplu ò, vɔ̀, e wɔ̀ ɛ̀ ne àmèwo woa nɔ̀ e ji. E gblɔ̃ be: “Ènyè ye nyi Tɔhonɔ̀, èbu mu gbà lè ò.

¹⁹Nyè mu pò nupo lè wawla mè, àlo lè ànyigbã be gòglòpe yìbɔ ɖe mè ò. Nyè mu gblɔ̃ na Yakɔb be àxuedo a be: “Mì yì ji mù lè fikè ènu ɖekpe mu lè òa ò. Ènyè ye nyi Tɔhonɔ̀. Mù gblɔ̃nà ènu kè sɔ̀gbèa, mù pònànu so ènu jɔ̀jɔɛ ŋuti.”

²⁰Mì bɔ̀ ne mìa va, mì dɔ̃ va ɖodu, mìa dùkɔ̃wo be àmè-ciagbèwo. Ètagbɔ ku na àmè kèwo ɖo àtikpàkpawo eye wo yɔna mawu kè mu la teŋu hlùɛ̃ wo gã òa.

²¹Mì pò nupo ne mìa ɖè mìabe ɖàsewo fiɔ. Mì na mia hɛ̃ ènyà ɖodu. Àmè kɛ ye ɖè ènu kè le jɔ̀ fifìa sia va yì ò? Àmè kɛ ye ɖè è gblɔ̃ so blèmà blèmà ò? Mu nyi ènyè Tɔhonɔ̀ ye à? Mawu bu mu gbà lè tovò lè ŋuti nyè ò. Mawu jɔ̀jɔɛ kè hlùɛ̃nà àmè gãa, èbu mu gbà lè ò.

²²Mì àmè kèwo lè ànyigbã be nukpòpewo, mì trɔ va gbɔ nyè eye mì la kpɔ hlùɛ̃gã. Ɖo mù nyi Mawu, èbu mu gbà lè ò.

²³Kaka kè mù gbà kpɔ̀tɔ̀ nyi Mawu a, mù le tànu be ènu kè mù la gblɔ̃a nyi nyàwo. Ekèa nyi ènyà kè nyè mu la trɔ gbèɖe ò be: èklò sia èklò la jègũ eye àɖe sia àɖe la hũ e mè lè ŋùkɔ̀ na mù be:

²⁴“Tɔhonɔ̀ ɖèka gbɔ kpò ye wo kpɔna jɔ̀jɔɛ wɔ̀wɔ kudo ŋusɛ̃ lè.” Àmè kèwo kpata wɔ̀ àvũ kudo mù a, la trɔ va gbɔ nyè ku ŋùkpɛ̃.

²⁵Izràɛl be jìjimèviwo kpata la xɔ̀ jɔ̀jɔɛ wɔ̀wɔ to ji nyè, eye wo la ɖɔ kudo jìjɔɛ.