Read gen Ezayà 46 Bible Online

Ezayà 46 - gen bible

Ezayà 46

¹Àdɔ̃ jègũ na vòdu Bɛl, wo mù vòdu Nebò gblòo. Wo sɔna woabe tatawo dànà ɖo èlãwo ji sɔ ɖìnàsà lè àzã ɖùɖuwo be gàmè. Jìjɔɛ donu kèa ye va zũ àgbã na èlã kèwo ènu tìkɔ̀ na a fifì.

²Vòduawo xa gòbà eye wo mù gblò ɖodu. Wo mu teŋu hlùɛ̃ woabe tatawo gã ò eye wo kplɔ̀ wo ŋutɔ yì gàtɔnugbe.

³Mì ɖoto mù, mìa Yakɔb be àxuedo, Izràɛl-dùkɔ̃ be àmè kpɔ̀tɛawo. Mù lebè na mì so kaka mìa nɔ̀ be àdɔ̀ mè. Eye mù le hɛ̃ mì so kaka kè mì va xixea mèa.

⁴Nène a kpò mù la nɔ wɔ̀ na mì kaka va ɖo mìabe sĩsĩ mè. Mù la nɔ hɛ̃ mì kaka mìabe èɖàwo la ɣe tìì. Ènyè ye wɔ̀ mì, mù la kpɔ mìa ji. Ɛ̃ɛ, mù la lebè na mì eye mù la na mì vòvo.

⁵Àmè kɛ ye mì sɔ mù le sɔ̀ ku ò eye àmè kɛ ye mù le ɖì na mì ò? Àmè kɛ be wɔ̀na mì le kpɔ lè ènyè mè àlo ènyè kudo àmè kɛ ye ɖo nɔ̀nɔmè ɖèkaa ò?

⁶Àmè ɖewo ɖènà sìka sùgbɔ to lè woabe àdɔ̀kùnuwo mè sɔ gũna, wo dànà klòsalòkɔ̃wo lè sìkelì ji. Wo sɔ nana gosìmitì be ne sɔ wɔ̀ vòdu tata na yèwo. Eye wo yì jènà èɖɛ̀ na vòdua, sumɔna ɛ̀.

⁷E yomè a, woa ŋutɔ kɔkɔna ɛ̀ ɖo àbɔta sɔ yìnà fikè wo jro a, eye wo yì dànà ɛ̀ ɖo tèpe kè jè ŋùmè na woa. E nɔ̀nà tèpe ɖèka kè mu hùãnà òa. Ne àmè ɖe do àpa sɔ gblɔ̃ ènyà na ɛ̀ cã, mu ɖona e ŋuti ò. Mu teŋu hlùɛ̃nà àmè ɖe lè gbledo mè ò.

⁸Mì ɖo ŋùku ekèa ji ne mìa gbɔ̀ àgbè mìabe vevedonu. Mì nɔ bù ekèa ŋuti, mìa èvi mà wɔ̀ ànùkuawo.

⁹Mì ɖoŋùku èsɔ̀, ènu kèwo jɔ̀ va yì so kaka gbè ɖe gbè. Ènyè ye nyi Mawu, èbu ɖekpe mu gbà lè ò. Mawu bu mu lè sɔ̀ ku mù ò.

¹⁰So gɔ̃mèjèje a ye mù ɖè ènu kè la va jɔ̀ a, gblɔ̃. Xoxo jè ŋùkɔ̀a, mù gblɔ̃ ènu kè mu kpɔ jɔ̀ òa be ŋutinyà. Mù gblɔ̃ be “Àpe ɖoɖo nyèa la va e mè godo godo” eye mù la wɔ̀ ènu sia ènu kè mù jro a.

¹¹So kaka àzɔ̀ge, so èwèzɛ̃pe mù yɔ ŋusù sɛ̃sɛ̃ sìgbè àvàkò nène va. E ye la va wɔ̀ ɖo àpe ɖoɖowo ji. Mù wɔ̀nà ɖo ènu kè mù gblɔ̃a ji. Ɖoɖo kè mù wɔ̀a, kpɔna e mè vava godo godo.

¹²Mì ɖoto mù, mìa èjì tìtritɔwo, mì àmè kèwo lè boo lè ènu jɔ̀jɔɛ gbɔa.

¹³Mù na jɔ̀jɔɛ wɔ̀wɔ nyèa gbãnà, mu gbà lè dìdìpe ò. Hlùɛ̃gã gogo. Nyè ŋutɔ, mù hɛ̃ ɛ̀ gbãnà Ziɔ̀n. Ɛ̃ɛ, mù la na Izràɛl àpe ènu ɖìnyi.