Read gen Ezayà 47 Bible Online

Ezayà 47 - gen bible

Ezayà 47

¹“Èwò Babɛ̀l be èdù, ɖì so fìɔzìkpe wòa ji ne wòa nɔ̀ ànyi ɖo ɖiɖɔɛ mè. Ɖiɖi nɔ̀ ànyi ɖo èkɔ mè ke, èwò Kaldeatɔwo be èdù. Ɖo so fifì sɔ yìa, wo mu la gbà yɔ wò ke be “Babɛ̀l àmè trɛlɛ”, “Babɛ̀l kè sènà vivi” ò.

²Sɔ ètetùnua ne wòa tù èblìa. Ɖè ètablanu wòa ne wòa ŋlɔ àwù wòa be gɔ̃mè eye wòa sò ètɔ̀wo kudo àpo àtati ci àmawo.

³Àmèwo la kpɔ àpo àma mè eye wo la gbà kpɔ àpo ŋùkpɛ̃ tèpe. Mù la biɔ èhlɔ̃ eye àmè ɖekpe mu la xe èmɔ̃ na mù ò.”

⁴Àmè kè le hlùɛ̃ mia ye nyi xixea be Tɔhonɔ̀. E ye nyi Mawu, Izràɛl be àɖèsã.

⁵Ɖiɖi nɔ̀ ànyi kpoo ènyà ɖe mà gblɔ̃, wla ɖo vìvìtia mè, Babɛ̀l be èdù. Ɖo so fifì sɔ yìa, wò mu la gbà sè wo la yɔ wò be “fìɔduwo be èfìɔsrɔ̃” ò.

⁶Mù do àdɔ̀mèze ɖo dùkɔ̃ nyèa ŋuti va yì. Mù ɖè yebe bùbua jo eye mù ɖè è do àsi na wò. Vɔ̀a, wò mu ku ŋuzĩzĩ ɖekpe na ɛ̀ ò. Wò zĩ ì ɖo ànyi sìgbè lekè èkɔ̀kuti zĩna ɖo àmè sĩsĩwo jia nène.

⁷Wò gblɔ̃ be: “Mù la nɔ̀ àgbè tɛ̀gbɛ̀, mù la nyi èfìɔsrɔ̃ kaka sɔ yì.” Wò mu bù ènu kèawo ŋuti kpɔ ò eye wò mu bù èsɔ̀mè cã kpɔ ò.

⁸Vɔ̀ fifìa, ɖoto ekèa, èwò kè jìjɔɛ kpɔkpɔ jɔ̀nàjì na a. Wò nɔ̀ ànyi kpo le bù èta mè be: “Mù nyi àmè nyuɛ̃ eye àmè bu ɖe mu gbà lè sìgbè ènyè nène ò. Nyè mu la trɔ zũ àhòsì gbèɖe ò, eye èvi ɖekpe mu la ku na mù kpɔ ò.”

⁹Nyàwo, jɔ̀gbè vuɛ̃ èvè kèawo la jɔ̀ ɖo èji wò kpàtà. Lè ŋùkèkè ɖèka mèa, wò la bu èvi wòwo eye wò la trɔ àhòsì. Bòkɔnɔ ku majikìwɔ̀tɔwo be kpajije ɖekpe mu la teŋu xe èmɔ̃ na ekèa be e mè vava ò.

¹⁰Wò sɔ àpo jìdo dà ɖo àpo àyè be wɔ̀nawo ji eye wò sùsu be: “àmè ɖe mu le kpɔ mù ò” Àpo nunya kudo àyèjèjewo flù wò eye wò sùsu be: “mù nyi àmè nyuɛ̃ eye àmè bu ɖe mu gbà lè sìgbè ènyè nène ò.”

¹¹Kpɔɖa jɔ̀gbè vuɛ̃ ɖe la va èji wò, wò mu la teŋu glɔ̃ èmɔ̃ na ɛ̀ ò. Kpɔɖa àhovì ɖe la jè e ji wò, ènu ɖekpe mu la teŋu xe èmɔ̃ na ɛ̀ ò. Ɛ̃ɛ, sukpa ɖe ye la va tù wò kpàtà kè mu le ja nɔ̀ ŋùɖo mè na wò òa.

¹²Eŋuã kpɔ̀tɔ̀ nɔ ji àlɔ̀do so bòkɔnɔ kudo majikìwɔ̀tɔwo gbɔ. Kaka àpo ɖèkajɛ mè ke ye wò lè ku wo. Wò teŋu yì kè ɖo gomèkpɔkpɔ ɖe ŋuti sɔ nɔ do vɔ̃vɔ̃ na àmèwo.

¹³Wò xɔ̀ ètopòɖo gbogbowo kaka e tìkɔ̀. Wo ne va hlùɛ̃ wò gã, àmè kèwo kpɔna jiŋùkusi, eye wo hlɛ̃nà ènu lè wètriviwo mèa. Wo gblɔ̃nà wètri sia wètri be ènu kèwo la ɖɛ vaa be ŋutinyà.

¹⁴Wo la nɔ̀ sìgbè bèyɔɛ nène eye èzò la bì wo. Wo mu la teŋu si lè èzò be àɖe vlàvlàwo nu ò. Ɛ̃ɛ, mu la nyi àka-zo sɔ ɖà ènu lè àdòkpo nu àlo ànakè-zo viɖe kpò sɔ ɖo èsì ò.

¹⁵Wò jè àŋùvòsi sɔ sã to woa ji so kaka àpo ɖèkajɛ mè. E nyɔ! Kpɔ ènu kè be èbònu wo lè na wòa ɖa! Fifìa wo keŋu kã gble wò ɖɛ eye ɖekpe mu lè kè la hlùɛ̃ wò gã ò.