Read gen Ezayà 48 Bible Online

Ezayà 48 - gen bible

Ezayà 48

¹Mì ɖoto, Yakɔb be àxuedo, mìawo kè wo ɖo nyikɔ na be Izràɛl. Eye mì so Yudà be kɔ̀ta mè, mì kãna àtãŋu ku Tɔhonɔ̀ be nyikɔ eye mì yɔna Izràɛl be àɖèsã tèmàtɔ vɔ̀a, mì mu lè jɔ̀jɔɛ kaka la kã ɖo ènu kèwo mì le wɔ̀a ji ò.

²Co mì gblɔ̃nà be “Mi nyi èdù kɔ̀kɔ̀ɛa mè viwo” eye mì donajì ɖo Izràɛl be Mawu kè wo yɔna be “Tɔhonɔ̀ ŋusɛ̃kpatatɔa” ŋuti. Mì ɖoto sè:

³Mù ɖè ènyàjɔ̀jɔ cucugbãtɔ̀wo na mì xoxo ke. Mù fìã woabe àjɔ̀gbè na mì eye mù ɖo yebe àfɔ̀ àfɔ̀ ji na mì. Eye kpàtà, kè mù ɖè ègbèa, wo kpɔ e mè vava trolo.

⁴Mù nya be mì nyi dùkɔ̃ trì èto. Mì mu le ji la nya ènyà ɖekpe ò, eye mì sɛ̃na èta mè kaɖi kaɖi.

⁵Ekèa ŋuti ye mù ɖè ènyàjɔ̀jɔ kèawo na mì so xoxo ke. Mù sìa mì dàɖɛ gbɔ̀xue woa va jɔ̀. Nyè mu ji sã be mìa va gblɔ̃ be “Vòdu nyè ye wɔ̀ ɛ̀, àtikpàkpa àlo ègàjɔ̀jɔ nyè ye ɖè ègbè ò.”

⁶Mì sè ènu kè be ègbè mù ɖèa eye mì kpɔ ènu kè jɔ̀ a. Mì mu jro la do è jèsia? So fifìa, mù la na wò la sè ènyà ye yèwo. Mù wla wo dàɖɛ eye mì mu kpɔ nya wo hàɖe ò.

⁷Mu nyi blèmànu ye wo nyi ò, fifì ye mù le wɔ̀ wo. Kaka na egbè be ŋùkèkèa, Mì mu kpɔ sè woabe ŋutinyà ɖekpe ò. Nyè mu ji be mìa va gblɔ̃ be “Mi nya xoxo vò” ò.

⁸Ɛ̃ɛ, mì mu sè ènyà ɖekpe ò, mì mu nya ènyà ɖekpe ò, e dìdì ŋutɔ kè mì mu gbà lena èto ɖo ènu ɖe ŋuti òa. Mù nya nyuɛ̃ ɖe be mì nyi àmè sàtɔwo, eye wo le yɔ mì be “èvi jèagla so vifɛ̃mè ke.”

⁹Vɔ̀, Mawu kè mù nyia ŋuti ye mù ɖona àlɔ̀ àpe àdɔ̀mèzea ji ɖo. Mù jro be mìa nɔ̀ jì kafu-hawo na mù. Ekèa ŋuti mù le hɛ̃ mì blɛ̀wù ne nyè mu gbà crɔ̃ mì ò.

¹⁰Mù kɔ̀ mìa ŋuti lè èzò mè, mu nyi èzò kè kɔ̀nà klòsalò ŋuti ò vɔ̀a, lè gbledo be èzòa mè.

¹¹Mù wɔ̀ ɛ̀ nène ɖo ɖokoe nyè ɖèka kpò ŋuti. Gbèɖe nyè mu la lɔ̃ èzũwo ò. Nyè mu ji la ɖè àsi lè gogo kè nyi tɔ̀ nyèa ŋuti na àmè bu ò.

¹²Ɖoto mù Yakɔb be dùkɔ̃, mù yɔ wò Izràɛl. Nène kpò mù gbà lè: Ènyè ye nyi cucugbã, ènyè ke gbà nyi kpɔ̀tɛa.

¹³Àpe àlɔ̀ ye ɖo ànyigbã be dodoe ànyi, ènyè ye vlũ jiŋùkusia. Eye ne mù yɔ woa, wo sɔ̀nàgbè ɖo ŋuti nyè trolo.

¹⁴Mìa kpata, mì bɔ̀ ne mìa sè. Mù ɖo èxlɔ̃ ɖèka kè la va wɔ̀ ènu kè mù do àsi na ɛ̀ ɖo Babɛ̀l ŋutia. E la ɖè àpe ŋusɛ̃ fiɔ Babɛ̀l be dùmètɔwo. Vɔ̀ àmè kɛ nya ekèa jè ŋùkɔ̀ ò?

¹⁵Ènyè ɖèka pɛ ye pò nupo. Ɛ̃ɛ mù yɔ ŋusù kèa va eye mù la na yebe wɔ̀wɔwo la zɔ̃ sùu.

¹⁶Mì dɔ̃ gogo mù ne mìa ɖoto. So gɔ̃mè jèje kea, nyè mu pò nupo na mì lè bèbemè ò. Wàlɛbɛ kè ènu kèawo le jɔ̀ a, mù lè. Eye fifìa, Tɔhonɔ̀ Mawu ɖo mù ɖoɖa eye e sɔ yebe gbɔ̃gbɔ̃ do ètùmè na mù.

¹⁷Kpɔ ènyà kè Tɔhonɔ̀, àpo hlùɛ̃tɔ, Izràɛl be àɖèsã gblɔ̃ ɖa: “Ènyè Tɔhonɔ̀ ye nyi Mawu wò. Mù fiɔ wò ènu kè dɔ̃ àmè jia. Mù le kplɔ̀ wò to èmɔ̃ kè ji wò lèa.

¹⁸Oò, ne wò kè wɔ̀ ɖo àpe ègbèɖèɖewo jia, àpo ŋuti fàfa la nɔ̀ sìgbè ètɔ̀ sàsra nène, eye àpo jɔ̀jɔɛ wɔ̀wɔ la nɔ̀ sìgbè àpù srɔ̀kewo nène.

¹⁹Àpo jìjimèviwo la sùgbɔ sìgbè èkɔsawɛ nène. Woabe nyikɔ mu la gũ gbèɖe lè àpe ŋùkɔ̀ ò.”

²⁰Mì to lè Babɛ̀l, mì si lè Kaldea be èdùa mè. Mì do àpa lelele sɔ gblɔ̃ ɛ̀ na àmèwo woa sè, mì sìa wo. Mì gblɔ̃ ɛ̀ yì kaka ànyigbã be nukpòpe be: “Tɔhonɔ̀ hlùɛ̃ yebe sumɔ̃vi Yakɔb.”

²¹Sìkɔ mu tì wo lè zògbè-nyigbã ji fikè e kplɔ̀ wo yì ò. Àkpã mè be ɖè èsì to lè na wo, eye wo nù. E fɛ̃ àkpã ye èsì to, srà na wo.

²²Tɔhonɔ̀ gblɔ̃ be: “Ŋuti fàfa ɖekpe mu lè na àmè bàɖàwo ò.”