Read gen Ezayà 49 Bible Online

Ezayà 49 - gen bible

Ezayà 49

¹Mì ɖoto mù, mì èdù sò ci àzɔ̀ge boo; mì kè èto nyuɛ̃ ɖe ètɔ̀dòmèkɔ̃ɛ̃wo! Tɔhonɔ̀ yɔ mù so kaka àdɔ̀ mè ke, e ɖoŋù àpe nyikɔ eye be yɔ ɛ̀ so ènɔ̀ nyè be àdɔ̀ mè.

²E ɖa àpe ènyà sìgbè èwui ɖaɖa nène. E wla mù ɖo yebe àlɔ̀ be vɔ̃vɔ̃lì gɔ̃mè. E sɔ mù wɔ̀ àŋùti kè ènu ɖa na ŋutɔ, eye e sɔ do yebe àku mèa.

³E gblɔ̃ na mù be: “Izràɛl, wò nyi àpe sumɔ̃vi. Mù la to èji wò sɔ ɖè àpe gogo fiɔ.”

⁴Eye mù gblɔ̃ be: “Mù jè àgbàgba gbalo, mù zã ŋusɛ̃ nyè kpò, àkɔ̃ŋùta ɖe mà wɔ̀.” Co Tɔhonɔ̀ ye la sò jɔ̀jɔɛ nyèa, yebe àsi mè fɛ̃tu nyèa lè.

⁵Eye fifìa, Tɔhonɔ̀ pò nupo, e sɔ mù so kaka àdɔ̀ mè ke ne ma nyi yebe sumɔ̃vi. Yebe jro ye nyi be ma kplɔ̀ Yakɔb be viwo va e gbɔ, ne ma bɔ̀ Izràɛl be dùkɔ̃a. Tɔhonɔ̀ dojì ɖo ŋuti nyè eye Mawu ŋutɔ nyi àpe ŋusɛ̃.

⁶E gblɔ̃ na mù be: “Mu nyi sumɔ̃vi kpò wò nyi na mù sɔ jo Yakɔb be kɔ̀tawo eye wòa kplɔ̀ Izràɛl be àmè kèwo ci àgbèa gbɔ̀ ò, vɔ̀a, ne wòa nyi dùkɔ̃wo be kɔ̀kɔ̀ɛ eye ne kɔ̀kɔ̀ɛ kèa bèa teŋu sùtè ànyigbã be nukpòpewo.”

⁷Ènu kè Tɔhonɔ̀, Izràɛl be hlùɛ̃tɔ, yebe Mawu kɔ̀kɔ̀ɛ gblɔ̃a ye kè. E gblɔ̃ na wò ètamèsɛ̃tɔwo be kluvi, kè ŋuti wo ɖè èkɔ̀ lè eye wo crìa be: “Ne èfìɔwo kè ɖo ŋuti wòa, wo la sitè lè woabe èfìɔzìkpea ji. Ne ègawo kpɔ wòa, wo la do ènu-gũ lè ŋùkɔ̀ na wò.” Ekèa la va e mè ɖo Tɔhonɔ̀ be ànùkua wɔ̀wɔ ŋuti, ɖo Mawu Izràɛl be àɖèsã kè cã wòa ŋuti.

⁸Tɔhonɔ̀ gblɔ̃ be: “Mù tɔ̀ na wò lè àmèhùenu, Mù do wò àlɔ̀ lè hlùɛ̃gã be hùenu. Mù wla wò dà ɖɛ eye mù la jrà wò ɖo na èzòɖùɖu kudo dùkɔ̃a. Mù la trɔ fɔ̃ Izràɛl be ànyigbã a, mù la trɔ gbìgbɔ̀ ma ànyigbã kèa na wo.

⁹Mù le gblɔ̃ na àmè kèwo lè vìvìti mè lè gàkpawo mèa be: “mì to va kɔ̀kɔ̀ɛa nu!” Wo la kpɔ ènuɖùɖu lè èmɔ̃wo to, wo la teŋu ɖù ènu lè ètokɔ̃ɛwo kpata ji.

¹⁰Àdɔ̀ mu la gbà wù wo ò, sìkɔ mu la gbà tì wo ò. Zògbè ji be àya sɛ̃sɛ̃ mu la gbà pò do wo kaka ye dɔ̃ŋùkusu la va ɖù wo ɖe ò. Ɖo mù la kplɔ̀ wo kudo àdɔ̀mè nyuɛ̃ yì jɛ̃gbɔ̃pe be èsìdo fàfawo to.

¹¹Mù la trɔ ètomè be èmɔ̃wo kpata wɔ̀ èmɔ̃ bɔ̀bɔɛwo, mù la trɔ ta èmɔ̃wo kpata.

¹²Kpɔ wo ɖa, wo gbãnà so àzɔ̀ge boo: èɖewo so èvègo, èbuwo so èwèɖoxɔ̀pe eye èbuwo cã so àpùgo na Ejiptè.”

¹³Jiŋùkusiwo, mì pò àsikpe! Eye ànyigbã ne kpɔ jìjɔɛ. Ètowo, mì do jìjɔɛ be àpa. Tɔhonɔ̀ trɔ na ŋùɖo yebe dùkɔ̃a, e ku ŋuzĩzĩ na ènuwɔ̀donɔ̀wo.

¹⁴Ziɔ̀n gblɔ̃nà sã be: “Tɔhonɔ̀ ɖè èkɔ̀ lè ŋuti nyè, Tɔhonɔ̀ nyè ŋlɔ̀be mù!”

¹⁵Vɔ̀ Tɔhonɔ̀ ɖo e ŋuti be: Ènɔ̀ la teŋu ŋlɔ̀be èvi kè ta e gbã èhũ ɖoa? E la teŋu ɖè èkɔ̀ lè èvi kè ye ŋutɔ na ànɔ a ŋutia? Ne e gbà ŋlɔ̀be ŋutɔ cãa, nyè ya nyè mu la ŋlɔ̀be wò kpɔ gbèɖe ò.

¹⁶Kpɔ, mù ŋlɔ̀ àpo nyikɔ ɖo àpe àlɔ̀wo mè. Àpe ŋùkuwo lè àpo èglìkpo gbãgbãwo ji gà sia gàmè.

¹⁷Yèruzàlɛm, èvi wò kèwo la trɔ va tù èdùa, lè èbla ji gbãnà eye àmè kèwo gbã wò, gbà ɖiki wòa, la tètè yì ɖaa lè gbɔ wò.

¹⁸Ɖè ŋùku kpɔ àpo àhàwo ji, èvi wòwo bɔ̀ gbãnà gbɔ wò. Ènyè Tɔhonɔ̀ ye gblɔ̃ ɛ̀. Kaka kè mù kpɔ̀tɔ̀ lèa, wo la nɔ̀ na wò sìgbè èkɔ̀-jònu àlo àtrɛvi kè tùgbɛ̀jɛvi àgɔ̀sɔa sɔ bla ègojia nène.

¹⁹Wò lè èglìkpowo mè eye wo gbã àpo èkɔwo kpe do, àpo ànyigbã trɔ zũ zògbè. Vɔ̀a, zãɖe yèa, e la hùe ŋutɔ na àpo dùkɔ̃a bèa teŋu nɔ̀ e ji. Eye àmè kèwo crɔ̃ wò va yìa, la si yì àzɔ̀ge boo lè gbɔ wò.

²⁰Wò nɔ̀ sìgbè nyɔ̃nù èkònɔ̀ nène. Vɔ̀ gbè ɖèkaa, èvi wòwo la gblɔ̃ na wò be: “Mi mimi[8] akpa, na mi tèpe ne mia nɔ̀.”

²¹Eye wò la biɔ ɖokoe wò sè be: “Àmè kɛ ye na mù ɖèvi kèawo kpata ò? Nyè mu ɖo èvi sã ò, eye nyè mu teŋu jì sã cã ò. Mù yì sò ci àmèjro-nyigbã ji eye wo ɖè èkɔ̀ lè ŋuti nyè. Àmè kɛ ye hɛ̃ ɖèvi kèawo ò? Nyè ɖèka pɛ ye nɔ̀ ànyi sã. Fikɛ ye wo so va ò?”

²²Tɔhonɔ̀ Mawu gblɔ̃ be: “Mù la kɔ àlɔ̀ yì ji ɖoɖa dùkɔ̃ pòpuwo, mù la hũhũ àplãŋuga nyè ɖo dùkɔ̃wo gbɔ. Yèruzàlɛm, wo la trɔ kplɔ̀ èvi wò ŋusù ku nyɔ̃nùwo gbɔ̀. Wo la kɔ wo ɖo àbɔwo ta va.

²³Èfìɔwo la kpɔ èvi wòwo ji, èfìɔ be vi nyɔ̃nùwo la na wo ènu wo la ɖù. Wo la jèɖɛ̀ lè ŋùkɔ̀ na wò. Wo la do ènugũ lè ŋùkɔ̀ na wò. Eye wò la nya be mù nyi Tɔhonɔ̀, ɖo àmè kèwo le ɖoŋù ɖo ŋuti nyèa, mu la ɖù ŋùkpɛ̃ gbèɖe ò.

²⁴Wo la teŋu gbĩ àmɔ̀nyɔ̀nu lè kãlì sia? Àlo wo la teŋu xɔ̀ àhùale ɖe lè àhùawɔ̀tɔ sia?

²⁵Tɔhonɔ̀ gblɔ̃ be: “Ɛ̃ɛ, nyàwo mù la xɔ̀ àhùalea lè àhùawɔ̀tɔ si, la gbĩ àmɔ̀nyɔ̀nua lè kãlìsu si. Yèruzàlɛm, nyè ŋutɔ mù la kpãŋùkɔ̀ àmè kèwo va xa wòa eye mù la nyi ɖèvi wòwo be hlùɛ̃tɔ.

²⁶Mù la na àpo kɛ̃tɔwo la ɖù woa ŋutɔwo be ŋutilã. Wo la nù woa ŋutɔwo be èhũ kaka la mu sìgbè vɛ̃ yeye wo nù nène. Nène a ye àmè sia àmè la nya ɛ̀ be ènyè Tɔhonɔ̀ ye nyi àpo hlùɛ̃tɔ, mù na wo vòvo, ènyè Yakɔb be Mawu ŋusɛ̃ kpatatɔa.”