Read gen Ezayà 5 Bible Online

Ezayà 5 - gen bible

Ezayà 5

¹Mì na mù èmɔ̃ ne ma jìhà na èxlɔ̃ nyè. Lɔ̃lɔ̃tɔ nyè kudo yebe vɛ̃-gble be èhà ye. Èxlɔ̃ nyè ɖo vɛ̃-gble lè ètokɔ̃ɛ nyigbã nyuɛ̃ ɖe ji.

²E gùdù ànyigbã a, cã èkpewo kpata lè e ji e do vɛ̃ku àdodoewo ɖo ànyigbã ji. E tù èmɔ̃jikpɔxɔ ɖèka ɖo dòdòmè eye e gbà tù vɛ̃fiɔ̃nu ɖo e mè. Eye e le nɔ̀tè kpɔ vɛ̃kusɛ̃sɛ̃ àdodoewo vɔ̀a, vɛ̃kusɛ̃sɛ̃ gbegblewo sɔ̃ŋu ye be kpɔ.

³E gblɔ̃ be fifìa mìa Yèruzàlɛm kudo Yudà viwo, mì sò ènyà na nyè kudo vɛ̃-gble nyèa.

⁴Nukɛ kpɔ̀tɔ̀ ye mù ɖo la gbà wɔ̀ wu ekèa na vɛ̃-gblea ò? Co vɛ̃kusɛ̃sɛ̃ gbegblewo kpò be na mù.

⁵E nyɔ, mù nya ènu kè mù la wɔ̀ kudo vɛ̃-gble nyèa: Mù la gbã èkpa kè mù tɔ̃ trɔ do èa, jo ne èlãwo woa va ɖù yebe àmàkpawo. Mù la mù èglì kè trɔ do èa, eye àmèwo la zɔ̃ to e ji, eye wo la nyàmà ɛ̀.

⁶Mù la sɔ ɛ̀ wɔ̀ àve nyigbã. Àmè ɖe mu la yì sò yebe àtiwo be àlɔ̀zɛ̃wo kaka la gã ègbewo lè e ji ò. Àŋùja kudo àklãtiwo ye la mìɔ̃ ɖo e ji eye mù la do èse na lilikpowo be wo mu gbà na ne èsì ne jà kɔ̀ ɖo e ji ò.

⁷Tɔhonɔ̀ ŋusɛ̃kpatatɔa be vɛ̃-gble ye nyi Izràɛl. Yudà nyi àgblè kè dona jìjɔɛ na ɛ̀a. Tɔhonɔ̀ le nɔ̀tè kpɔ yebe ènyàsòso kè jèa vɔ̀a, màjɔ̀ màjɔ kpò be lebè na. E le nɔ̀tè kpɔ yebe jɔ̀jɔɛwɔ̀wɔ vɔ̀a, àmè mà-ɖo àmè be ènuxàxa sɔ̃ŋu ye bɔ.

⁸Bàbà na àmè kèwo le ca àxue ɖo àxue nu, àgblè ɖo àgblè nu. Wo le xɔ̀ àmèwo be nɔ̀pewo kaka èdù bliboa la trɔ zũ woa ɖèka pɛɛ tɔ̀.

⁹Àhùadù Tɔhonɔ̀a kã àtãŋu kèa na mù be: “Mù tà ènu kèa be àxue kèawo kpata la crɔ̃. Wo la gbã gudu-gudu ɖo, àmè ɖekpe mu la gbà nɔ̀ woa mè ò.

¹⁰Ànyigbã èbò èwo be vɛ̃-gble mu la na wu vɛ̃ lità èkàciwo ò. Ne wo do èlù kìlo èkàvè takpoa, wo mu la ɖè wu kìlo èwo ò.”

¹¹Bàbà na àmè kèwo la fɔ̃ ŋùdekɛ̃nyɛ fùtù, la nɔ̀ àhà sɛ̃sɛ̃ nùnu yomè kaka èzã la sĩa. Ɖo, e la sɔ vɛ̃ sɔ wɔ̀ àwù do.

¹²Wo ɖùnà gbà nùnà lè èhàjìnu vòvòvòwo: èkàsãŋùgu, àsihũvi, gàkokoe, àya, àsɔ̀goe, èkpɛ̃, èhɛ, be ègbè ɖèɖe mè. Vɔ̀, wo mu le nya ènu kè Tɔhonɔ̀ le wɔ̀ ò eye wo mu le kpɔ ènu kè yebe àbɔ sɛ̃sɛ̃a le wɔ̀ ò.

¹³Ekèa ŋuti ye Tɔhonɔ̀ gblɔ̃ be: “Wo la kplɔ̀ dùkɔ̃ nyèa yì àmèjronugbe, ɖo mu ji la sè ètonu ò. Àmè ŋùkutawo la ku àdɔ̀ku eye èsìkɔ la tì àmèha kaka e la crɔ̃.

¹⁴Eye èkuwode be èdowo la kè ènu mè bàa eye àmè ŋùkutawo kudo àmèhawo la yì ɖo e mè vlì vlì vlì lè woabe àzãɖùɖu mà-ɖokɔpea mè.

¹⁵Àgbètɔwo kpata ɖo la bɔ̀bɔ̀ woa ɖokoe sìgbè ɖèviwo nène eye ègòyitɔwo be àdɔ̃ la jè ègũ.

¹⁶Àhùadù Tɔhonɔ̀a la ɖè yebe gãnyinyia fiɔ lè yebe jèna be ànyi ɖoɖo mè. Àɖèsã Mawu la ɖè yebe kɔ̀kɔ̀ɛnyinyi fiɔ to àmèwo be bèlele na jɔ̀jɔɛwɔ̀wɔ mè.

¹⁷Àlɛ̃wo la sɔ èdù kè gbã fɔtɔa, wɔ̀ ènuɖùpe eye wo la nyì gbɔgbɔɛ doàmìwo lè funu.

¹⁸Bàbà na àmè kèwo àjèɖàɖa gbà bla ɖo àgɔ̀jèje mèa, woabe vuɛ̃wo kplɔ̀ wo do sìgbè àlekè wo dɔ̃nà kèkevia nène.

¹⁹Wo gblɔ̃nà be: “Tɔhonɔ̀ ne wɔ̀ ènu kè be gblɔ̃a kaba. Yebe àlɔ̀ kpɛ̃kpɛ̃a ne ze kaba. Mi jro la nya yebe ŋusɛ̃a.”

²⁰Bàbà na àmè kèwo gblɔ̃nà be gbegble ye nyi gbegblea. Wo trɔna èzã vìtìa sɔ wɔ̀nà kɛ̃klɛ̃, eye kɛ̃klɛ̃ sɔ wɔ̀ vìvìti. Wo trɔna ènu kè vea, sɔ wɔ̀nà ènu vivi eye ènuvivia sɔ wɔ̀nà ènuveve.

²¹Bàbà na àmè kèwo le susu be yèwo ɖo ènunya eye wo gbà susu be yèwo sènà ènugɔ̃mèa.

²²Bàbà na àmè kèwo nùnà àhà muna kaka kuna ci e mèa, àmè kèwo cakana àhà sɛ̃sɛ̃wo lekè wo jro a.

²³Wo lɔ̃nà èzãnuɖùɖu sɔ ɖènà ègà àgɔ̀jètɔ. Vɔ̀a, wo gbena kòjo jɔ̀jɔɛ sòso na àmè mà-nyã ɖewo.

²⁴Ekèa ŋuti ye wo la nɔ̀ sìgbè èbèyɔɛ kè èzò le fiɔ̃a nène àlo ègbe pupu kè èzò be àɖe le fiɔ̃a nène. Wo la nyìnyɔ̀ so èkè nu ke, àya la sɔ woabe èsepòpowo yì sìgbè hũhũ nène. Ɖo wo trɔ ŋùgbe do àhùadù Tɔhonɔ̀a be ègbè do àsiwo. Wo crì Mawu Izràɛl be àɖèsã be ènyà.

²⁵Ènu kèa ŋuti ye Tɔhonɔ̀ be jìbi be àdã la sitè ɖo yebe dùkɔ̃a ŋuti. E kɔ yebe àbɔ sɛ̃sɛ̃a yì ji sɔ pò è. Ètowo hũhũ eye woabe ŋutilã kukuwo ci èmɔ̃wo to sìgbè ègbeɖiɖɔɛwo nène. Vɔ̀a, lè ekèa kpata be ŋùkɔ̀a, yebe jìbibia nu mu fa ò eye yebe àbɔ sɛ̃sɛ̃a gbà lè àya mè sɔ gblenu.

²⁶E kɔkɔ dùkɔ̃ lè àzɔ̀ge boa be àplãŋuga yì ji. E lìɔ àkui yì ànyigbã be nukpòpewo eye kpɔɖa, dùkɔ̃a ɖèbla va kɛɖɛ kɛɖɛ.

²⁷Lè woa dòmèa, ènu mu tìkɔ̀ na àmè ɖekpe ò, ɖekpe cã be àfɔ̀ mu ɖɔ̀lì ò. Àmè ɖe cã mu le dɔ̃ èkɔ̀lɔ̃ɛ̃ ò, woa kpata lè ŋùzɔ̃. Àmè ɖekpe cã mu tu yebe ègojiblakà kaka la va ɖè àfɔ̀kpawo ò.

²⁸Woabe àŋùtiwo be nu wɔ̀ piɖoe nyuɛ̃ ɖe eye woabe àŋùdàtiwo lè ègbèji. Woabe èsɔ be àfɔ̀kpawo sɛ̃ŋu sìgbè èkpe nène eye woabe àhùakèkevi be àfɔ̀kuwo le tro sìgbè àya sɔsɔ kè le troa nène.

²⁹Gbãdãgbãwo le do àpa sìgbè jãŋùta-nɔ nène. Wo le wo sìgbè jãŋùta viwo nène. Wo le wɔ̀ sìgbè ègbemèlã kè le yebe àdè be èlãa nène. Àmè ɖe mu lè kè la xɔ̀ ɛ̀ lè ènumè na ɛ̀ ò.

³⁰Vɔ̀, le gbèŋuãgbèa, ègbèɖèɖe ɖe la sitè ɖo dùkɔ̃a ŋuti sìgbè àpù be ègbèɖèɖe nène. Ne wo trɔ kpɔ ànyigbã a, vìvìti kudo gbledo sɔ̃ŋu ye ɖɔ ɛ̀. Lilikpo yìbɔwo cɔ̃ ŋùkèkè be kɛ̃klɛ̃a.