Read gen Ezayà 50 Bible Online

Ezayà 50 - gen bible

Ezayà 50

¹Tɔhonɔ̀ gblɔ̃ be: “Mì le gblɔ̃ be mù gbe mìa nɔ̀ Yèruzàlɛm, eŋuã fikɛ gbègbe-xoma a ɖe? Mì le gblɔ̃ be mù sɔ mì do àwòba ne ma teŋu tu èfɛ̃ kè mù ɖù a, Àmè kɛ mù sɔ mì do àwòba na ò? Mìabe àgɔ̀jèjewo ŋuti ye wo sɔ mì do àwòba ɖo. Mìabe èkɔ̀ lìalia ŋuti ye wo gbe mìa nɔ̀ ɖo.

²Wàlɛbɛ kè mù vaa, nyè mu kè ɖo àmè ɖekpe ŋuti ò. Nukɛ ye le jɔ̀ ò? Nyè mu sù la teŋu hlùɛ̃ mì gãa? Nyè mu ɖo ŋusɛ̃ la sɔ ɖè mìa? Co ègbè viɖe kpò mù ɖè ye àpùa ŋutɔ pu kpakplakpla, eye mù trɔ ètɔ̀ sàsrawo sɔ wɔ̀ zògbè-nyigbã. Eye èsì be dɛ̃dɛ̃a na be ètɔ̀mèlãwo ku èsìku kaka wo le huɛ̃.

³Gbà wua, mù na jiŋùkusi do vìvìti eye mù do èfũlòvɔ na ɛ̀.

⁴Tɔhonɔ̀ Mawu na mù nukplavi be àɖe ne ma nya lekè wo la do ŋusɛ̃ àmè kè gbɔjɔ ɖoa. E fɔ̃na mù xoxo ŋùdekɛ̃nyɛ ne ma sɔ sè ènu sìgbè àlekè nukplavi sènà ènua nène.

⁵Tɔhonɔ̀ Mawu hũ èto na mù, eye nyè mu do àɖìkà ku ì kaka la yì ŋùgbe ò.

⁶Mù trɔ àpe ŋùgbedòmè na àmè kèwo le pò mù a, àlɔgo nyèwo na àmè kèwo le nyɔ̀ ègɛ̃ na mù a. Nyè mu trɔ ŋùmè do àmè kèwo le zũ mù gbà le tu ètã kɔ̀ ɖo ŋùmè na mù a ò.

⁷Tɔhonɔ̀ Mawu va do mù àlɔ̀, eŋuã na be woabe èzũwo mu gbà wɔ̀ ènu ɖekpe na mù ò. Mù ŋlɔ̀ ŋùkumè sɛ̃sɛ̃ɖe sìgbè èkpe nène. Ɖo mù nya be nyè mu la ɖù ŋùkpɛ̃ ò.

⁸Mawu kè dɔ̃ gogo mù a ye la sò jɔ̀jɔɛ na mù. Àmè ɖe jro la sɔ ènyà ɖo ŋuti nyèa? Ne va mia yì kòjo mè. Àmè kɛ la nyi kɛ̃tɔ nyè lè kòjoɖoɖo mè ò? Ne dɔ̃ gogo mù.

⁹Ɛ̃ɛ, Tɔhonɔ̀ Mawu ye nyi àpe àlɔ̀do, àmè kɛ ye la sɔ àgɔ̀ na mù ò? Kɛ̃tɔ nyèwo la be sìgbè àvɔ nène. Èŋɔ la ɖù wo keŋu-keŋu.

¹⁰Àmè ɖe lè mìa dòmè kè vɔ̃na Tɔhonɔ̀a? Àmè kèa ne ɖo èto yebe sumɔ̃via. Àmè ɖe lè kè le zɔ̃ lè èzã mè, mà kè ɖo kɔ̀kɔ̀ɛ ɖekpe ŋutia? Àmè kèa ne sɔ yebe jìdo ɖo Tɔhonɔ̀ ji eye bèa gba ɖo yebe Mawu a ŋuti.

¹¹Vɔ̀a mì àmè kèwo le tɔ èzòa, mì àmè kèwo sɔ àŋùti kèwo le bìzòa, trɔ do mìa ɖokoea, mì yì èzò kè mì do a be dòdòmè lè àŋùti kèwo le bìa mè ke. Nyè ŋutɔ ye la na mì la crɔ̃ lè vevesèse kaɖi kaɖi mè.