Read gen Ezayà 51 Bible Online

Ezayà 51 - gen bible

Ezayà 51

¹“Mì àmè kèwo le ji jɔ̀jɔɛ wɔ̀wɔ ku vève do ènua, mì ɖoto. Mì àmè kèwo le ji Tɔhonɔ̀a, mì kpɔ àkpã kè mè wo ɖè mì to soa; wo lìɔ mì to so àkpãdo mè.

²Mì kpɔ mìa tɔgbe Abràham ku Sarà kèwo jì mìa. Abràham mu ɖo èvi ɖekpe wàlɛbɛ kè mù yɔ ɛ̀a ò. Co mù tu sì na ɛ̀ eye mù na e trɔ dùkɔ̃ sùgbɔwo be ètɔ.”

³Ɛ̃ɛ, Tɔhonɔ̀ do ŋusɛ̃ Ziɔ̀n, e ku ŋuzĩzĩ na yebe èglìkpowo, e la trɔ yebe zògbèa wɔ̀ èdù kè mè ènuwo keŋu nyɔ lèa. E la trɔ tèpe kèa wɔ̀ Edɛ̀n be àbɔ mè. Jìjɔɛ mà-ɖo kɔpe ye la nɔ̀ funua, wo la nɔ jì àkpedo-ha ku jìjɔɛ-hawo.

⁴“Dùkɔ̃ nyè, ɖoto mù, dùkɔ̃ pòpu nyè, wɔ̀ èto sè. Ènyè ye la na èsea, eye jɔ̀jɔɛ kè mù la ɖo ànyi a, la kɔ̀ èdùkɔ̃wo.

⁵Hlùɛ̃gã kè mù hɛ̃ gbãnàa, gogo; vòvo kpɔkpɔ gbãnà. Mù la ɖokòjo na dùkɔ̃wo kudo àbɔ sɛ̃sɛ̃. Dùkɔ̃ kèwo sò ci ètɔ̀dòmèawo la sɔ ŋùɖo dà ɖo ji nyè. Wo la dojì ɖo àpe ŋusɛ̃a ŋuti.

⁶Mì kɔ ŋùkuwo yì ji ne mìa kpɔ jiŋùkusi; mì trɔ kpɔ èdò lè ànyigbã ji. Jiŋùkusiwo la bu sìgbè àzìzɔ nène, ànyigbã la be sìgbè àvɔ nène eye àgbètɔwo la ku sìgbè tɔ̀bɔ̀suwo nène. Vɔ̀a, hlùɛ̃gã nyèa lè tɛ̀gbɛ̀dò eye jɔ̀jɔɛ wɔ̀wɔ nyèa mu la gũ gbèɖe ò.

⁷Mì ɖo èto, mì àmè kèwo nya jɔ̀jɔɛ wɔ̀wɔa, mì àmè kèwo ɖo èsea ɖo èjì mèa. Mì mu gbà ɖoàɖì àgbètɔwo be àmèkòkoe, eye mìa vɔ̃ woabe èzũwo ò.

⁸Ɖo èŋɔ la ɖù wo sìgbè àvɔ nène, èdɔ la ɖù wo sìgbè àlɛ̃ŋudà nène. Vɔ̀a, hlùɛ̃gã kè mù la na a, la nɔ̀ ànyi tɛ̀gbɛ̀dò, eye vòvo kpɔkpɔ la nɔ̀ ànyi so àkɔ ɖe na àkɔ bu.”

⁹Fɔ̃, Tɔhonɔ̀ sitè kplà ne wòa ɖè ŋusɛ̃ wòa fiɔ. Fɔ̃ ne wòa ɖè àbɔ sɛ̃sɛ̃ wòa fiɔ ɖo gbèɖegbètɔ̀a ji. Èwò ye flì ènu mlìgedea wuwli eye wò ŋɔ àpùmè be èhɔ̃ drìbàa.

¹⁰Èwò kè na àpùa pu kpakplakpla, àpù gã mà-ɖo sɛ̃pea be èsìa. Èwò ke gbà ɖè èmɔ̃ to àpùa be ègũ ji. Wò kplɔ̀ àmè kèwo wò hlùɛ̃gã, to èmɔ̃a ji.

¹¹Tɔhonɔ̀ be àmè jojoawo la trɔ gbɔ̀, wo la gɛ̃ ɖo Ziɔ̀n to àpa dodo gã ɖe mè. Nyɔna mà-vɔ ɖe la klɛ̃ lè woabe ŋùkumè, jìjɔɛ mànya gblɔ̃ ɖe la kplɔ̀ wo do, eye àyàɖùɖu kudo èhùɛ jèjewo la bu.

¹²Tɔhonɔ̀ gblɔ̃ be: “Ènyè ye le do mì ŋusɛ̃. Ɛ̃ɛ, ènyè ye le wɔ̀ ɛ̀. Nukɛ ŋuti wò le vɔ̃ àgbètɔwo ò? Woa tɔ̀ ye nyi èku, wo vɔ̀nà sìgbè ègbe nène;

¹³wò ŋlɔ̀be àpo Tɔhonɔ̀ kè ɖo wòa. E ye vlũ jiŋùkusi eye e wɔ̀ ànyigbã. Wò hũhũna lè àmènyrãkua be àmè zĩzĩ ɖo ànyi a nu sìgbè e ɖo ŋusɛ̃ la teŋu crɔ̃ wò nène. Fifìa, fikɛ ye àmènyrãkua be èkunyànyrã lè ò?

¹⁴Gàmènɔ̀tɔ kè bu ŋùɖoa la kpɔ vòvo sɔ̀sɔɛɖe. Mu la jo gbɔ̃gbɔ̃a ɖɛ lè gàkpa mè ò eye nuɖùɖu cã mu la hiã ɛ̀ gbèɖe ò.

¹⁵Ènyè Tɔhonɔ̀ ye nyi àpo Mawu. Ènyè ye hũhũna àpù kaka yebe àsrɔ̀kewo ɖènà ègbe gbà mlìnà. Nyikɔ nyè ye nyi Tɔhonɔ̀ ŋusɛ̃ kpatatɔ.

¹⁶Mù sɔ àpe ènyàwo do ènu mè na wò. Mù wla wò ɖo àpe àlɔ̀ be lìhuɛ̃ mè wàlɛbɛ kè mù vlũ jiŋùkusi, gbà ɖo ànyigbã a. Mù gblɔ̃ na Ziɔ̀n be: “Èwò ye nyi àpe dùkɔ̃a!”

¹⁷Fɔ̃ Yèruzàlɛm, fɔ̃ ne wòa sitè kplà! Tɔhonɔ̀ na wò nù lè yebe àdòmèze be kogòa nu; Wò nù ì keŋu-keŋu kaka be le mu wò.

¹⁸Lè èvi kèwo kpata wò jìawo mè, kèwo kpata wò hɛ̃awo mèa, ɖekpe mu le àlɔ̀tinu na wò kpɔ, kplɔ̀ ò.

¹⁹Gbledowo va ji wò èvè-èvè fùnya-fùnya ku cɔ̃crɔ̃, àdɔ̀toto kudo àhùa. Vɔ̀a, àmè kɛ àpo ènu la bà kɔ̀bɛ na ò? Àmè kɛ ye la do wò ŋusɛ̃ ò?

²⁰Gbledo kèawo cɔ̃ èvi wòwo kaka wo ku bèɖè bèɖè ci èmɔ̃wo to sìgbè àvũgbɛ kèwo gàmɔ lea nène. Tɔhonɔ̀ be àdɔ̀mèze be àɖi sì wo. Àpo Mawu a do ŋùklɛ̃ na wo.

²¹Ekèa ŋuti ye wò la ɖoto, èwò kè wo dovloa. Wò mu, le kplà; vɔ̀a mu nyi vɛ̃ ye le mu wò ò.

²²Nène a ye Àpetɔ wò, Tɔhonɔ̀ àpo Mawu a gblɔ̃ be ye la xɔ̀ ènyà ɖo àkɔ na yebe dùkɔ̃a. E gblɔ̃ be: “Mù la trɔ xɔ̀ àdɔ̀mèze be kogò kè le mu wòa lè àsi wò. Àpe àdɔ̀mèze be kogòa, wò mu la gbà nù lè e mè gbèɖe ò.

²³Mù la sɔ ɛ̀ do àlɔ̀ mè na àmè kèwo le do àyà na wòa, kèwo le gblɔ̃ na wò sã be: “Mlɔ̃ ànyi ne mia zɔ̃ ji wò va yì.” Eye wò sɔ àpo ŋùgbedòmè wɔ̀ èmɔ̃ na wo be woa zɔ̃ e ji va yìa.”