Read gen Ezayà 54 Bible Online

Ezayà 54 - gen bible

Ezayà 54

¹Èwò kè nyi èkònɔ̀ sãa eye wò mu le jì èvi òa, sò àyo. Kpɔ jìjɔɛ ne wòa do àpa, èwò kè mu gbà le le èku ke òa. Tɔhonɔ̀ gblɔ̃ be: “Nyɔ̃nù kè ŋuti wo ɖè àsi lè va yìa, be èviwo va sùgbɔ wu nyɔ̃nù kè kpɔ̀tɔ̀ lè àsuxuea tɔ̀.”

²Kèkè àpo gòxɔ kè mè wò nɔ̀nàa ɖo ji. Vlũ nɔ̀pe wòa be àvɔwo kpe è. Mù gbà vɔ̃ ègà zãzã ò, vɔ̀ vlũ àpo gòxɔa be èkàwo kpe è, ne wòa gbà ɖì àtiawo sɛ̃sɛ̃ɖe kpe è.

³Ɖo wò la kãkã ɖo àgowo kpata ji, èvi wòwo la sùgbɔ kaka yì kɔ̀ ɖo èdù kèwo trɔdo mìa mè.

⁴Mù gbà vɔ̃ ò, ɖo wò mu la ɖù ŋùkpɛ̃ ò. Mù gbà hũhũ ò, ɖo wo mu la gbà zũ wò ɖe ò. Eye wò la ŋlɔ̀be ŋùkpɛ̃ kè wo do wò va yìa. Wò mu la gbà ɖoŋù lekè wo zũ wò wàlɛbɛ kè wò nɔ̀ àhòxɔmèa ò.

⁵Ekèa ŋuti ye àmè kè wɔ̀ wòa, la nyi èsrɔ̃ wò ŋusù, àhùadù Tɔhonɔ̀ ye nyi yebe nyikɔ. Izràɛl be àɖèsã ye na wò vòvo. Wo yɔna ɛ̀ be “ànyigbã kpata be Mawu”.

⁶Wò gbɔjɔ sìgbè nyɔ̃nù kè ŋuti wo ɖè àsi lèa nène, vɔ̀a Tɔhonɔ̀ trɔ xɔ̀ wò. Kòkò Mawu wòa gblɔ̃ be: “Àmè ɖe la teŋu gbe yebe ɖekajɛmè-srɔ̃ kè ye ŋutɔ jro ɖèa?

⁷Mù ɖè èkɔ̀ lè ŋuti wò na gàmè viɖe kpò. Vɔ̀a mù jro la trɔ xɔ̀ wò nɔ kebe wò àdodoemètɔ̀.

⁸Mù bijì do wò sã ŋutɔ eye mù gbe la kpɔ ŋùku mè na wò àɖàbà pòpo ɖèka kpò. Vɔ̀a fifìa, mù la kebe wò lè lɔ̃lɔ̃ mà-vɔ ɖe mè. Ènyè Tɔhonɔ̀a ye le gblɔ̃ ɛ̀ Ènyè kè le ɖègà wòa.

⁹Mù la wɔ̀ sìgbè lè Nɔà be hùenu nène. Mù fìã gà ŋua mè be èsì ɖɔɖɔ gbɛ̀lu mu la gbà va ànyigbã ji ò. Nène a ke mù le fìã na wò fifìa be nyè mu la gbà do àdɔ̀mèze kaka la tɛ̃ ŋùku do wò ɖe ò.

¹⁰Ne ètowo gbà le hɔ̃ lè woabe èkè ji eye ètokɔ̃ɛwo le hũhũ cã, lɔ̃lɔ̃ kè mù ɖo na wòa mu la trɔ kpɔ ò. Èzò kè mù ɖù kudo wò ne ma tu sì na wòa, mu la hùã kpɔ ò. Ènyè Tɔhonɔ̀a ye gblɔ̃ ɛ̀ kudo lɔ̃lɔ̃.”

¹¹Yèruzàlɛm, ŋuzĩzĩme, èjiya sɛ̃sɛ̃ pò wò wù, eye àmè ɖekpe mu lè, la na wò ŋùɖo ò. Mù la trɔ tù wò kudo èkpe xɔ̀asìwo. Dodoe kè ji mù li wò ɖoa, la nyi àzàgbà[10] ɖèɖe.

¹²Ma ɖo èkpe xɔ̀asìwo ɖo àpo èglìkpawo ji, wò la nyi gblɛ̃ti ɖèɖe, eye kristalò kpe ɖèɖe ye la nyi àpo àgbowo. Mù la tù àpo àgbògbòwo kpata kudo èkpe xɔ̀asìwo.

¹³Èvi wòwo kpata la nyi Tɔhonɔ̀ be nukplaviwo eye ŋuti fàfa la sù woa si drì.

¹⁴Wò la li àpo ɖoɖowo ɖo jɔ̀jɔɛ wɔ̀wɔ ji. Àmè ɖe mu la gbà ɖiki wò ɖe ò, wò mu la gbà vɔ̃ ènu ɖekpe ò. Eye àmè ɖe mu la gbà tɛ̃ ŋùku do wò ɖe ò.

¹⁵Àpo èkplixɔ̀nu ɖekpe mu la so gbɔ nyè ò, ɖo àmè kè la xɔ̀ èkpli na wòa, la jè ànyi dodo lè àpo ŋùkɔ̀.

¹⁶Ènyè ye wɔ̀ àlɔ̀nudɔwɔ̀tɔ, èzògbɛ̀dɛ kè le pò èzò do àka zòzo sɔ le wɔ̀ èlãnu kè e jro a. Ènyè ke gbà wɔ̀ àmè kè la teŋu crɔ̃ èlãnu ŋuawo kpataa.

¹⁷Èlãnu ɖekpekpe kè wo la sɔ ɖo èji wòa, mu la teŋu wɔ̀ ènu ɖekpe na wò ò. Eye ne àmè ɖe kplɔ̀ wò yì kòjo mèa, wò la teŋu ɖèfiɔ be yebe ènyà mu jɔ̀ ò; Ekèa ye le nyi ɖoɖo kè mù wɔ̀ ɖo sumɔ̃vi nyèwo nua. Nène a ye mù la sò ènyà na wo yeŋu. Ènyè Tɔhonɔ̀ ye gblɔ̃ ɛ̀.