Read gen Ezayà 55 Bible Online

Ezayà 55 - gen bible

Ezayà 55

¹Kùwui! Mì, àmè kèwo kpata sìkɔ le tìa, mì va èsìa gbɔ. Mì va, ne mì mu gbà ɖo ègà la sɔ plè ènu ò cã, mì va kpò. Mì va plè ènu ne mìa ɖù yàkà, èfɛ̃ ɖekpe màtu. Mì va jè vɛ̃ ku nyìnɔsi ne mìa nù àsipuplu, ègà ɖe màna.

²Nukɛ ŋuti ye mì le zã ègà gbogbo ɖe na ènu ɖùɖu kè mu nyìnà àmè ò? Nukɛ be àgbàgba gbalo mì le jè na ènu kè mu ɖɔnapò ò? Mì ɖoto nyuɛ̃ ɖe, mì ɖoto mù ne mìa kpɔ ènu nyuɛ̃ ɖù. Eŋuã, mì la ɖɔ ènu viviwo kpɔ.

³Mì ɖoto ne mìa va gbɔ nyè. Mì sè ètonu, ne mìa nɔ̀ àgbè. Mù la wɔ̀ zòɖùɖu ɖe kè la nɔ̀anyi tɛ̀gbɛ̀a kudo mì. Ɛ̃ɛ, mù la sɔ nyɔna kè mù fìã na David be hɛ̃nua, na mì.

⁴Kpɔɖa, mù sɔ ɛ̀ wɔ̀ àpe ŋusɛ̃ be ɖaseɖùtɔ na dùkɔ̃wo, e la nyi èga na àmèhawo.

⁵Èwò Izràɛl, wò le yɔ dùkɔ̃ kè wò mu jèsi òa eye dùkɔ̃ kè wò mu jèsi sã òa, pu dù va gbɔ wò ɖo Tɔhonɔ̀ ye nyi àpo Mawu. Ɛ̃ɛ, wo la va, ɖo Izràɛl be àɖèsã kè do bùbu ŋuti wòa ŋuti.

⁶Mì ji Tɔhonɔ̀ wàlɛbɛ kè e gbà kpɔ̀tɔ̀ lèa. Mì yɔ ɛ̀ kaka kè e gbà kpɔ̀tɔ̀ gogo mìa.

⁷Àmè bàɖàwo ɖo la trɔ lè èmɔ̃ vuɛ̃ a ji. Àmè kè le wɔ̀ ènudrãa, ne trɔ lè yebe sùsu drãwo yomè. Wo ne trɔ va Tɔhonɔ̀ miabe Mawu a gbɔ, ɖo e la ku ŋuzĩzĩ na wo eye e la sɔ àgɔ̀ kè wo lè gbɔsùsu mè.

⁸Tɔhonɔ̀ gblɔ̃ be: “Mìabe sùsuwo mu nyi àpe sùsuwo ò, eye èmɔ̃ nyèwo mu nyi mìabe èmɔ̃wo ò.

⁹Sìgbè àlekè jiŋùkusi dìdì lè ànyigbã gbɔa, nèneake ye èmɔ̃ nyèwo dìdì boo lè mìabe èmɔ̃wo gbɔ eye àpe sùsuwo cã lè boo lè mìa tɔ̀awo gbɔ.

¹⁰Sìgbè àlekè ne èji àlo àhũ jànà so ji hũi, wuna èsì ànyigbã a eye e nana ènukuwo wɔ̀nà sɔ jina ènuɖùɖu gbɔ̀xue trɔ yìnà jiŋùkusia,

¹¹nèneake ye àpe ènyà cã lè yeŋu. Ne e to lè àpe ènu mèa, e la wɔ̀ yebe èdɔ do àsia godo gbɔ̀xue la trɔ va.”

¹²Nyàwo, mì la to lè jìjɔɛ gã ɖe mè so Babɛ̀l nyigbãa ji eye wo la kplɔ̀ mì va mìa de lè ŋuti fàfa mè. Èto ku ètokɔ̃ɛwo la wo ku jìjɔɛ eye àgblèji be àtiwo kpata la pò àsikpe sɔ do jàa na mì.

¹³Àti na fàfawo ye la mìɔ̃ ɖo àŋɔ̀kawo tèpe eye flawàti huɛ̃ gbigbliwo la mìɔ̃ ɖo àŋùjatiwo tèpe. Ekèawo la jɔ̀ sɔ do bùbu Tɔhonɔ̀ ŋuti. E la nyi ŋùkuɖojinu tɛ̀gbɛ̀.