Read gen Ezayà 56 Bible Online

Ezayà 56 - gen bible

Ezayà 56

¹Tɔhonɔ̀ gblɔ̃ be: “Mì wɔ̀ ènu kè jɔ̀ a eye mìa le jɔ̀jɔɛ wɔ̀wɔ ɖo àsi. Hlùɛ̃gã kè mù hɛ̃ gbãnàa gogo, eye mì la nya be mù wɔ̀nà ɖo fìãfiã nyèa ji nyàwo.

²Sìtuɖèɖe ye la nyi na àmè kè lebè na ènu kè mù le gblɔ̃ eye e le wɔ̀ ɖo e jia. Sìtuɖèɖe ye la nyi na àmè kè le kpɔ jɛ̃gbɔ̃zãa ji, gbà na àsà ènu drã ɖekpekpe wɔ̀wɔa.”

³Àmèjro kè sɔ ye ɖokoe tɛ ɖo Tɔhonɔ̀ ŋutia, mu gbà yì gblɔ̃ be: “Tɔhonɔ̀ la ɖè mù jo lè yebe dùkɔ̃ dòmè kòkòkò ò.” Kobonɔ̀a mu gbà gblɔ̃ be: “Àti pupu kpò mù nyi ò.”

⁴Nyàwo, Tɔhonɔ̀ ŋutɔ ye gblɔ̃ be: “Kobonɔ̀ ɖewo le kpɔ jɛ̃gbɔ̃zã nyuɛ̃wo ji. Wo le wɔ̀ ènu kè jɔ̀nàjì na mù a eye wo le zòɖùɖu nyèa ɖo àsi.

⁵Mù la na wo tèpe lè mawuxɔ nyèa mè eye mù la ŋlɔ̀ woabe nyikɔwo ɖo funu. Nyikɔ kèwo la nɔ̀ ànyi tɛ̀gbɛ̀dò eye wo la xɔ̀asì wu èvi ŋusù kudo nyɔ̃nùwo ŋutɔ klua.”

⁶Àmèjro ɖewo jo woa ɖokoewo na Tɔhonɔ̀. Wo bɔ̀bɔ̀ woa ɖokoe na ɛ̀, le lɔ̃ ɛ̀ eye wo nyi yebe sumɔ̃viwo. Tɔhonɔ̀ gblɔ̃ so woa ŋuti be: “Àmè kèwo kpata le jɛ̃gbɔ̃zãa ɖo àsi eye wo le kpɔ zòɖùɖu nyèa jia,

⁷mù la kplɔ̀ woa kpata va èto kɔ̀kɔ̀ɛ nyèa ji. Mù la do jìjɔɛ na wo lè kuefã-xue nyèa mè. Mù la xɔ̀ woabe vɔsa kudo ènu nanawo lè vɔsakpea ji. Ɛ̃ɛ, wo la yɔ àpe àxuea be “Dùkɔ̃wo kpata be kuefã-xue.”

⁸Tɔhonɔ̀ Mawu, kè bɔ̀ Izràɛl be àmè-siahùawoa, gblɔ̃ be: “Mù bɔ̀ àmèwo sɔ trɔ do wo gòdò eye mù la gbà bɔ̀ àmè buwo ke.”

⁹Mìa ègbemèlã kudo àvemèlãwo kpata, mì va ɖùnu!

¹⁰Izràɛl be kplɔ̀tɔwo kpata nyi ŋùvìnɔ̀wo. Wo mu le nya ènu ɖekpe ò, wo ci bòlìmè. Wo le sìgbè àvũ àmumuiwo nène. Wo mu teŋu gbona cã tètè ò. Wo vlũna lòmì, la nɔ ku èdrɔ̃. Àlɔ̃ dɔ̃dɔ̃ jɔ̀nàjì na wo.

¹¹Vɔ̀a, wo gbà lè sìgbè àvũ kèwo ènuɖùɖu mu sùnà òa nène. Co, wo nyi dùkɔ̃ nyèa be kplɔ̀tɔwo gãke wo mu ŋɔnajè ènu mè ò. Àmè sia àmè le wɔ̀ ènu kè jè ŋùmè na ɛ̀a, sɔ le ji ye ŋutɔ be àlè ɖèɖe kpò.

¹²Wo gblɔ̃nà be: “Mì va ne mia yì kù vɛ̃. Mi la nù vɛ̃ kaka la sìɔ̃ ɛ̀. Eye èsɔ̀ la gbà nɔ̀ kpò sìgbè egbè ke nène: vɛ̃ la kpɔ̀tɔ̀ sùgbɔ.”