Read gen Ezayà 57 Bible Online

Ezayà 57 - gen bible

Ezayà 57

¹Wo le wù àmè jɔ̀jɔɛ kè àmè ɖe mu le biɔ ènyà ɖe sè òa. Wo le crɔ̃ ènu nyuɛ̃wɔ̀tɔwo eye àmè ɖekpe mu le nya ò. Ɛ̃ɛ, àmè kèwo le sè ètonu na Mawu a le crɔ̃ ɖo àgbètɔ be èkunyànyrã ŋuti.

²Vɔ̀a ŋuti fàfa la sò àxue godo eye àmè nyuɛ̃wo la dɔ̃ àlɔ̃ lè àgbɔ̃jèpò blibo mè.

³Mì dɔ̃ va mìa àzetɔ be viwo. Àhasìwɔ̀tɔ ku gbòlòme be jìjimèviwo ye mì nyi.

⁴Àmè kɛ ŋutɔ ye mì le kò ò? Àmè kɛ be ènyà mè mì le do ènu ò? Àmè kɛ ye mì le ɖè àŋɔ̀li mè na ò? Àglajèje be viwo kpò mì nyi, àmèblètɔwo be habɔ̀bɔ.

⁵Mìabe èjro wo tena mì nyànyànyà lè vòdu-ti gã vùdùwo kudo àti do àmàwo gbɔ. Mì sɔna mìabe èviwo sanavɔ lè ètɔ̀wo to ku àkpã fɛ̃fɛ̃wo mè.

⁶Ètɔ̀mèkpe kèwo ŋuti zìɔ̃a ye nyi tɔ̀ wò. Ekèa ye nyi tɔ̀ wò Izràɛl. Woawo ji ye wò kɔ̀nà èɖɛ̀pòsia ɖo. Wò nana ènu lè funu. Tɔhonɔ̀ gblɔ̃ be: “Mù teŋu bɔ̀nu ɖo ekèa jia?”

⁷Wò ɖo mlɔ̃pe ɖo èto yìji hũi ɖe ji. Wò yì wɔ̀nà vɔ̀sawo lè funua.

⁸Wò bla èbo wòa sɔ kù hɔ̃tru ŋuti lè àdɔ̀mè. Wò lia àba gbàjà wòa ji. Wò wɔ̀ ɖoɖo kplikpã kudo àzìãvi wòwo, èwò kudo wo be dɔ̃dɔ̃ jènà ŋùmè na wò. Eye wò glònà woabe ŋusùa be jɔ̀jɔ[11] kpɔ.

⁹Wò yì vòdu gã gbɔ kudo àmì ku ànùwɛtrɛ̀wo; wò ɖo àmèdɔ̃dɔ̃wo ɖoɖa àzɔ̀ge boo eye wò ɖiɖi yì kaka èkuwode ke.

¹⁰Wò wɔ̀ ekèa kpata kaka ènu tìkɔ̀ na wò; co wò mu gblɔ̃ be: “Ŋùɖo mu gbà lè ò!” Wò trɔ kpɔ àpo ŋusɛ̃; eŋuã, wò ɖù gbɔ̀jɔ̀ gbɔjɔa ji.

¹¹Àmè kɛ ye le do ŋɔji na wò kaka ye wò le ɖàjè ò? Wò ɖè àpo sùsu jo lè ji nyè. Wò mu gbà le bù èta mè ɖe so ŋuti nyè ò. Mù bɔ̀ ènu kpo so kaka gà ɖe mè ke. Ekèa ŋuti ye wò mu le vɔ̃ mù ò.

¹²Vɔ̀ mù la ɖè èha àpo “jɔ̀jɔɛ wɔ̀wɔ” kudo ènu kè wò nyia. Àpo àlɔ̀nudɔwo mu gbà la hɛ̃ nyɔna ɖekpe va na wò ò.

¹³Wàlɛbɛ kè wò la do àpa yɔ àpo ènuɖìkòkoewo[12] be wo ne xɔ̀ na yèa, àya ye la kplɔ̀ wo yì keŋu-keŋu. Àya puplu kpò ye la ɖè wo jo. Vɔ̀a, àmè kèwo la dojì ɖo ŋuti nyèa la sɔ ànyigbã ɖùcrɔ̃. Eye woa tɔ̀ ye la nyi àpe èto kɔ̀kɔ̀ɛa.

¹⁴Eye Tɔhonɔ̀ gblɔ̃ be: “Mì jrà èmɔ̃a ɖo kaba ne mìa tu èdoawo. Mì ɖè àfɔ̀klɛ̃nuwo jo lè dùkɔ̃ nyè be èmɔ̃a ji.”

¹⁵Ɖo nènea ye àmè kè lè èjihũia, kè ɖo nɔ̀pe kòkòɖàbì eye yebe nyikɔ nyi àɖèsãa, gblɔ̃ be: “Ènyè Àɖèsã Mawu a, mù lè èji hũi. Co mù lè kudo àmè kèwo wo le zĩ ɖo ànyi a, kudo àmè kèwo ɖo èjìmè bɔ̀bɔɛa. Mù jro la na àgbè àmè kè ci àgba lè gbɔ̃gbɔ̃ mèa, la na àgbè àmè kèwo wo le zĩ ɖo ànyi a.

¹⁶Nyàwo, nyè mu la nɔ kãŋùmè na àmè kaka sɔ yì àlo la nɔ bijì tɛ̀gbɛ̀dò ò. Ɖo mu nyi nène òa, àpe ènuɖoɖowo la bu woabe àgbèa.

¹⁷Izràɛl jè àgɔ̀ to yebe ŋùbianu hàhla ji eye mù do àdɔ̀mèze. Mù trɔ ŋùgbe do è lè àpe àdɔ̀mèzea mè, eye mù pò è. Nyè mu gbà jro la kpɔ ɛ̀ ò. Co èto trì na ɛ̀ kaka e kpɔ̀tɔ̀ le ye ŋutɔ be èmɔ̃ mà sɔ ɖe lè e mè.

¹⁸Mù kpɔ yebe èdɛ̃ nyuɛ̃ ɖe, vɔ̀a mù la dà èdɔ̀ na ɛ̀. Mù la kplɔ̀ ɛ̀ eye mù la do è ŋusɛ̃.

¹⁹Mù la sɔ kàfù kafu-hawo do ènu mè na àmè kèwo le lòfũa. Tɔhonɔ̀ gblɔ̃ be: “Fàfa na àmè kè lè àzɔ̀ge boa, fàfa na àmè kè lè àxuea. Ɛ̃ɛ, mù la dà èdɔ̀ na àpe dùkɔ̃a.”

²⁰Vɔ̀a, àmè bàɖàwo lè sìgbè àpù jè àdã nène, mu la teŋu nɔ̀ tèpe ɖèka ò. Yebe àsrɔ̀kewo kɔna bàba kudo ɖiɖɔɛ yìnà ji.

²¹Mawu nyèa gblɔ̃ be: “Fàfa ɖekpe mu lè na àmè bàɖàwo ò.”