Read gen Ezayà 6 Bible Online

Ezayà 6 - gen bible

Ezayà 6

¹Lè èpè kè mè èfìɔ Òzias ku lèa, mù kpɔ Tɔhonɔ̀ nɔ̀ ànyi lè yebe fìɔzìkpe gãa ji. Yebe àwù vlàyà be gɔ̃mè ɖɔ mawuxɔa pɔpɔpɔ.

²Sèrafìwo lè àya mè lè èta mè na ɛ̀. Woa dòmètɔ ɖe sia ɖe ɖo àwàda àdɛ̃. Wo sɔna èvè cɔ̃na ŋùkumè, èvè sɔ wlana àma eye èvè kpɔ̀tɛawo sɔ zrònà.

³Wo le do àpa ɖoɖa woa nɔ̀nɔwo be: “Kɔ̀kɔ̀ɛ, kɔ̀kɔ̀ɛ, kɔ̀kɔ̀ɛ, ye nyi Àhùadù Tɔhonɔ̀a! Ànyigbã kpata ɖɔ kudo yebe gogo!”

⁴Èxɔ̀wo be dodoewo hũhũ lè àpa dodowo be ègbè ɖèɖe nu eye Tɔhonɔ̀ be àxuea ɖɔ kudo àzìzɔ gɛ̀ɛ.

⁵Nène a ye mù gblɔ̃ be: “Bàbà na mù! Mù crɔ̃ ɖo mù nyi àgbètɔ kè be ènu mu kɔ̀ ò, eye mù gbà lè dùkɔ̃ kè be nuyuwo mu kɔ̀ òa, dòmè. Àpe ŋùkuviwo kpɔ èfìɔ, àhùadù Mawu a!”

⁶Vɔ̀ Sèrafìwo dòmètɔ ɖèka zrò va gbɔ nyè. E le èzòka hɛ̀ kè be sɔ lè vɔsakpea ji kudo èzòkalenua[2] ɖo àsi.

⁷E sɔ ɛ̀ tɔ ènu na mù gblɔ̃ be: “Fifì kè èzòka kèa tɔ ènu na wòa, wo ɖè àgɔ̀jèje wòa jo, eye wo tutu èvuɛ̃ wòa keŋu.”

⁸Eye mù sè Tɔhonɔ̀ be ègbè gblɔ̃ be: “Àmè kɛ mù la dɔ̃ ò? Àmè kɛ ye la yì na mi ò?” Mù ɖo e ŋuti gblɔ̃ be: “Ènyè ye kè, dɔ̃ mù!”

⁹Tɔhonɔ̀ gblɔ̃ na mù be: “Yì gblɔ̃ na dùkɔ̃ kèa be: “Mì la ɖo èto nyuɛ̃ ɖe, vɔ̀ mì mu la sè ènu ɖe gɔ̃mè ò; mì la kpɔ ènu nyuɛ̃ ɖe, vɔ̀ mì mu la ŋɔjè ènu ɖe mè ò”

¹⁰Trì èjì na wo, woabe ètowo ne tu eye wo mu gbà kpɔ ènu cã ò. Cɔ̃ ènu woabe ŋùkuviwo ji ne wo mu gbà kpɔ ènu ò; woabe ètowo, ne wo mu gbà sè ènu ò, woabe èjìwo, ne wo mu gbà ŋɔjè ènu mè ò. Nène a, wo mu la teŋu trɔ va gbɔ nyè ne woa gã ò!”

¹¹Mù gblɔ̃ be: “Tɔhonɔ̀, kaka va na gà kɛ mè ò?” E gblɔ̃ be: “Kaka va na gà kè mè ye èdùgãwo la gbã, èglìkpowo ɖèɖewo la kpɔ̀tɔ̀ eye àmè be àgbè la bua. Ànyigbã la trɔ zũ ŋuzĩzĩ be zògbè.”

¹²Tɔhonɔ̀ la ɖo àmèwo ɖoɖa àzɔ̀ge boo. Eye àgblè sùgbɔ la ci gbalo lè ànyigbã ji.

¹³Ne e kpɔ̀tɔ̀ dùkɔ̃a be àkpa èwogɔ̃a lè ànyigbã jia èzò la bì wo sìgbè àti kè wo sò pu ànyi a nène. Àti be ègũnu kudo èkèawo kpò ye la kpɔ̀tɔ̀. Vɔ̀a, ègũnu kèa la trɔ jè ɖo Mawu be jro ji.