Read gen Ezayà 60 Bible Online

Ezayà 60 - gen bible

Ezayà 60

¹Sitè, Yèruzàlɛm ne wòa klɛ̃. Ɖo kɛ̃klɛ̃ wòa gbãnà, Tɔhonɔ̀ be gogoa kɔ̀ ɖo ji wò.

²Kpɔɖa èzã do ɖo ànyigbã ji eye àhũ jàja cɔ̃ dùkɔ̃wo kpata ji. Vɔ̀a, Tɔhonɔ̀ le klɛ̃ na wò eye yebe gogoa le kɔ̀ ɖo ji wò.

³Dùkɔ̃wo la zɔ̃ va kɔ̀kɔ̀ɛ wòa gbɔ eye èfìɔwo la ɖota àpo kɛ̃klɛ̃ be totoa mè.

⁴Kɔ ŋùkumè yì ji ne wòa kpɔ ènu pòxla ɖokoe wò gòdò. Àmèwo kpata bɔ̀ gbãnà gbɔ wò. Èvi wò ŋusùwo la gbɔ̀ so dìdìpe, wo la kɔkɔ èvi wò nyɔ̃nùwo ɖo àbɔwo mè va.

⁵Ne ekèa jɔ̀ a, wò la kpɔ be wò la klɛ̃ ku jìjɔɛ, àpo èjì la ɖɔ ku jìjɔɛ. Ɖo wo la lɔ àpù mè be àdɔ̀kùnuwo va na wò, dùkɔ̃wo be àdɔ̀kùnuwo kpata la va zɛ̃ gbɔ wò.

⁶Èsɔ èkpovènɔ̀wo be ha la va cɔ̃ wò, Madìan ku Efà be èsɔ èkpovènɔ̀-viwo. Woa kpata la so Sabà[13] va. Wo la hɛ̃ sìka kudo lifi eye wo la kafu Tɔhonɔ̀ lè àmèwo be ŋùkɔ̀.

⁷Wo la bɔ̀ Kedàr be èlãha kpata na wò. Wò la teŋu zã Nèbayɔtè be àgbòwo na àpo vɔ̀sawo. Wo la sɔ wo dà ɖo àpe vɔsakpea ji eye woabe vɔsa la jè ŋùmè na mù. Ɛ̃ɛ mù la do bùbu mawuxɔ nyèa ŋuti.

⁸Àmè kɛwo ye nyi àmè kèwo le zrò sìgbè lilikpowo nène, sìgbè àhɔ̃ne kèwo zrò le yì woabe nɔ̀pewo nène ò?

⁹Ɛ̃ɛ, ètɔ̀dòmèkɔ̃ɛ̃wo kudo èdù lè àzɔ̀ge boo le kpɔ àpe àsinu kudo ŋùɖo gã ɖe. Tarsò be àpùjihũwo jè ŋùkɔ̀. Wo hɛ̃ èvi wòwo gbãnà so èdù mà-sɔɛwo mè ku woabe sìka kudo klòsalò. Wo gbãnà la va na mù gogo, ènyè àpo Mawu, Izràɛl be àɖèsãa ye.

¹⁰Àmèjroviwo ye la trɔ tù àpo èglìwo eye woabe èfìɔwo la nɔ̀ àpo ŋusɛ̃ gɔ̃mè. Ɖo mù pò wò lè àpe àdɔ̀mèze mè sãa, vɔ̀a, lè àpe àdɔ̀mè nyuɛ̃ wɔ̀wɔ mèa, mù la ɖè lɔ̃lɔ̃ nyèa fiɔ wò.

¹¹Àpo àgbowo la nɔ̀ hũhũ ɖotè gbàa èzã kudo ŋùkèkè, eye àmè ɖe mu la tu wo ò. Nène a ye wo la lɔ dùkɔ̃wo be àdɔ̀kùnuwo va na wò eye woabe èfìɔwo ŋutɔ ye la nɔ̀ ŋùkɔ̀ na wo va.

¹²Dùkɔ̃ àlo fìɔdu kèwo la gbe be yèwo mu la sumɔ wò òa, la crɔ̃. Wo la crɔ̃ dùkɔ̃ kèawo keŋu-keŋu.

¹³Libàn be àti xɔ̀asì kèwo nana ɛ̀ gogoa kpata la va gbɔ wò. Wo la sɔ ɖo àcɔ na àpe Nɔ̀pe Kɔ̀kɔ̀ɛ; Eye mù la na gogo nɔ̀pe kè àfɔ̀ nyèwo zìɔ̃ ɖoa.

¹⁴Àmè kèwo ɖì wò gbɔa be viwo la sɔ èta do ègũ va gbɔ wò. Wo la va do ènu ègũ lè ŋùkɔ̀ na wò, àmè kèwo kpata ɖè èkɔ̀ lè ŋuti wò sãa. Eye wo la yɔ wò be “Tɔhonɔ̀ be èdù”, “Ziɔ̀n, Izràɛl be àɖèsãa”.

¹⁵Wo ɖèkɔ̀ lè ŋuti wò sã, wo crì wò eye àmè ɖekpe mu tona àpo èxɔ̀ gbàde nu ò. Vɔ̀a, mù la ɖo àcɔ na wò, ne woa kpɔ jìjɔɛ so ŋuti wò so jìjimè yì jìjimè.

¹⁶Wò la nù dùkɔ̃ kpɔ̀tɛawo be nyìnɔsi, wò la sɔ èfìɔwo be àdɔ̀kùnuwo ɖù ècrɔ̃. Nène a wò la nya ɛ̀ be: ènyè Tɔhonɔ̀ ye nyi àpo hlùɛ̃tɔ, be Yakɔb be Mawu ŋusɛ̃kpatatɔa ye na yè vòvo.

¹⁷Eye mù la hɛ̃ sìka va ɖo gàjɛ̃ tèpe, Klòsalò ɖo àti tèpe eye gàyìbɔ ɖo èkpe tèpe. Hàɖo ŋuti nyèa, mù la na ŋuti fàfa la ɖùfìɔ eye jɔ̀jɔɛ nyinyi ye la nɔ kplɔ̀ wò.

¹⁸Wo mu la gbà sè èkunyànyrã lè àpo ànyigbã ji, àlo ènugbãgbã ku tùkaɖawo lè àpo àgbowo mè ò. Wò la yɔ àpo glìkpowo be “Hlùɛ̃gã”, àgbo wòawo be “Gogo”.

¹⁹Dɔ̃ŋùkusu mu la gbà na wò kɔ̀kɔ̀ɛ lè kedè ò, wètri mu la gbà na wò kɔ̀kɔ̀ɛ lè èzã mè cã ò; Tɔhonɔ̀ ŋutɔ ye la nɔ na wò kɔ̀kɔ̀ɛ wè sia wè. Àpo Mawu a ye la nɔ na wò gogo tɛ̀gbɛ̀.

²⁰Gbèɖe-gbèɖe àpo èwèa mu la gbà ɖo èxɔ̀ ɖe ò. Àpo wètria mu la gbà bu ɖe ò, ɖo Tɔhonɔ̀ ŋutɔ ye la nyi àpo kɔ̀kɔ̀ɛ kaka sɔ yì; Eye èfũlòzã wòwo nu la ci.

²¹Àpo dùkɔ̃-mèviwo kpata la nyi àmè jɔ̀jɔɛwo eye wo la ɖù ànyigbã be crɔ̃. Wo nyi àpe àlɔ̀nudɔwo, ne woa ɖè gogo nyèa fiɔ. Nyè ŋutɔ mù na wo la nɔ̀ sìgbè àti kèwo le jèa nène.

²²Xòmè kè hùea, la sɛ̃ku fuu eye kè ŋuti ŋusɛ̃ mu lè òa, la trɔ zũ dùkɔ̃ sɛ̃ŋu sùgbɔ; Nyè ŋutɔ mù la na ekèa la va e mè kaba lè yebe hùenu.