Read gen Ezayà 61 Bible Online

Ezayà 61 - gen bible

Ezayà 61

¹Tɔhonɔ̀ Mawu be gbɔ̃gbɔ̃a lè ji nyè. Nyàwo e ɖè mù ɖovò be ma sɔ àŋɛ̀ nyuɛ̃a yì na àmè gbɔjɔgbɔjɔwo. E dɔ̃ mù be ma yì ɖo àsi àkɔ na àmè kèwo be èjì gbãawo, ne ma to na àhùalewo be: “Mì vò!” Eye ma gbà to na àmè kèwo lè gàkpawo mèa be mì la trɔ kpɔ ŋùkèkè be kɛ̃klɛ̃.

²Ne ma do Tɔhonɔ̀ be ŋuzĩzĩkuku be èpèa be àŋɛ̀, ŋùkèkè kè ji miabe Mawu a la biɔ èhlɔ̃ miabe kɛ̃tɔwoa. Ne ma ɖo àsi àkɔ na àmè kèwo kpata le lòfũa.

³Ziɔ̀n ŋuti ye wo le lòfũ ɖo. Vɔ̀a mù la tà àvɔ na wo ɖo àfi kè wo sìa tèpe. Mù la sì àmì xɔ̀ èci na wo ɖo èfũlòlo tèpe. Eye mù la do àwù yeye na wo ɖo gbɔ̀jɔ̀ gbɔjɔ tèpe. Wo la sɔ wo sɔ̀ kudo àti kèwo ɖènà Mawu be gogo fiɔa ku àvesu kèwo dona bùbu Tɔhonɔ̀ ŋutia.

⁴Woawo ye la trɔ va tù gbèɖegbè be èglìkpo gbãgbãwo. Wo la trɔ fɔ̃ tɔgbewo be àxuewo ɖotè. Eye èdù kèwo ci gbalo so gbèɖegbèwo, la trɔ gbɔ̀ àgbè.

⁵Àmèjrowo ye la kplɔ̀ mìabe àlɛ̃ kudo ègbɔwo. Wo la so àzɔ̀ge boo la va dà àgblèwo na mì eye wo la gbà kpɔ mìabe vɛ̃-gblewo ji.

⁶Co wo la yɔ mì be “Tɔhonɔ̀ be hũbonɔwo”, wo la ɖo nyikɔ na mì be “miabe Mawu be sumɔ̃viwo”. Dùkɔ̃wo be àdɔ̀kùnuwo la trɔ zũ mìa tɔ̀ eye mì la sɔ woabe àcɔɖonuwo wɔ̀glo.

⁷Kè wo la kpɔ̀tɔ̀ nɔ do mì ŋùkpɛ̃ kudo èzũ vòvòvòwoa, mù la na mì àjɔ̀ àkpa èvè lè woabe ànyigbã ji eye mì la nɔ̀ àgbè lè jìjɔɛ mà-vɔ mè.

⁸Ɖo nyàwoa, ènyè Tɔhonɔ̀ Mawu, mù lɔ̃nà jɔ̀jɔɛ eye mù crì èfĩ kpòtoe. Mù la trɔ sɔ ènu kè wo tafu mì xɔ̀ lè mìa sia na mì. Eye mù la wɔ̀ zòɖùɖu kòkòɖàbì kudo mì.

⁹Mìabe viwo la trɔ zũ huɛ̃yiwo lè dùkɔ̃wo dòmè eye wo la jèsì mìabe tɔgbe tɔ̀gbè yɔviwo. Wo la nya be wo nyi Tɔhonɔ̀ be dùkɔ̃ cãcã.

¹⁰Ènu ku na mù ɖo Tɔhonɔ̀ ŋuti, Ɛ̃ɛ, èkla nyèa ɖɔ ku jìjɔɛ ɖo Mawu nyèa ŋuti. Ɖo e hlùɛ̃ mù gã, e sɔ jɔ̀jɔɛ be àwù do na mù sìgbè nyɔ̃nùkpetɔ àlo hũbonɔ kè cɔ̃ jègbàa nène. E lè sìgbè àgɔ̀sɔ kè wo ɖo àcɔ na a nène.

¹¹Ɛ̃ɛ, sìgbè lekè ànyigbã ɖènà àti kèwo le jèa be ènu toa, sìgbè lekè àbɔ nana ènuwo be èkusɛ̃sɛ̃ jènàa, nènea Tɔhonɔ̀ la na jɔ̀jɔɛ nyinyi kudo kàfù kafu la mìɔ̃ lè dùkɔ̃wo kpata be ŋùkɔ̀ yeŋu.