Read gen Ezayà 62 Bible Online

Ezayà 62 - gen bible

Ezayà 62

¹Ɖo lɔ̃lɔ̃ kè mù ɖo na Yèruzàlɛm ŋutia, nyè mu la fɔ̀ àlɔ̀ ɖo àta mè ò. Ɖo lɔ̃lɔ̃ kè mù ɖo na Ziɔ̀n ŋutia, nyè mu la bɔ̀ ènu kaka ma na yebe jɔ̀jɔɛ nyinyia bèa ze glãlã ò. Mù la na yebe hlùɛ̃gã la kɔ̀ sìgbè èwè jàse nène.

²Dùkɔ̃ pòpuwo la kpɔ àpo jɔ̀jɔɛ nyinyi eye èfìɔwo la kpɔ àpo gogo. Nène a ye wo la yɔ nyikɔ yeye kè Tɔhonɔ̀ ŋutɔ ɖoa, na wò yeŋu.

³Wò la nɔ̀ sìgbè jègbà ɖìnyi nène lè Tɔhonɔ̀ be àlɔ̀ mè, sìgbè èfìɔwo be dàbla nène lè àpo Mawu be àlɔ̀ mè.

⁴Wo mu la gbà gblɔ̃ na wò be 'wo ɖèkɔ̀ lè ŋuti wò ò'. Wo mu la gbà yɔ àpo ànyigbã be 'èkònɔ̀-nyigbã ò'. Vɔ̀a, wo la yɔ wò be 'jìjɔɛ donu', eye wo la yɔ ànyigbã wòa be 'Èsrɔ̃ nyuɛ̃'. Ɖo wò nyi jìjɔɛ donu na Tɔhonɔ̀ eye e la na ànyigbã wòa la kpɔ èsrɔ̃ la ɖè.

⁵Nyàwo sìgbè lekè ɖèkajɛ ɖènà tùgbɛ̀jɛ àgɔ̀sɔa, nènea ye àmè kè la trɔ tù wòa, la nɔ̀ èsrɔ̃ tèpe na wò. Sìgbè lekè nyɔ̃nù yeye kè wo kplɔ̀a dona jìjɔɛ na èsrɔ̃a, nènea ye wò la do jìjɔɛ na àpo Mawu a yeŋu.

⁶Mù sɔ èdùɖiatɔwo dà ɖo àpo àgbògbòawo ji, Yèruzàlɛm. Wo le ɖia èdùa èzã ku kedè ètèmàtɔ. “Mìa èzãɖiatɔ kèwo le na ye Tɔhonɔ̀ le ɖoŋù Yèruzàlɛm jia, mì yì èdɔ ji kpoo!

⁷Eye mì mu gbà na ne Mawu ne nɔ̀tè, kaka bèa sɔ ètomè fàfa kè jèa na Yèruzàlɛm eye bèa gbà nyi kàfù kafu be ènu na ànyigbã kpata ò.”

⁸Tɔhonɔ̀ ŋutɔ ye kã àtãŋu kèa be: “Kaka kè mù kpɔ̀tɔ̀ ɖo ŋusɛ̃a, nyè mu la gbà na àpo kɛ̃tɔwo la ɖù àpo èlù ò. Gbèɖe àmèjroviwo mu la gbà nù àpo vɛ̃ kè ŋuti wò jè àgbàgba ɖo ò.

⁹Vɔ̀a àmè kèwo jè àde, lɔ èlùawo ɖo àvà jia ye la ɖù woabe àlɔ̀nudɔ. Àmè kèwo ye gbã vɛ̃kusɛ̃sɛ̃awo ye la nù vɛ̃a lè àpe mawuxɔ kɔ̀kɔ̀ɛa mè.”

¹⁰Mìa Yèruzàlɛm-tɔwo, mì to àgboawo mè yì, mì to wo mè yì! Mì yì jrà èmɔ̃a ɖo na dùkɔ̃a, mì do èmɔ̃a ne mìa tu èdowo. Eye mì ɖo èkpewo ɖo èmɔ̃a ji, ne mìa kɔ àplãŋuga yì ji lè dùkɔ̃wo be ŋùkɔ̀.

¹¹Tɔhonɔ̀ ɖè ègbè yì kaka ànyigbã be nukpòpewo be mì gblɔ̃ na Ziɔ̀n be èdùa be: “Kpɔɖa àpo hlùɛ̃gã be ŋùkèkèa gbãnà, yebe fɛ̃tu cã bɔ̀ ɖo e ŋuti eye yebe àlè jè ŋùkɔ̀ na ɛ̀.

¹²Wo la yɔ wo be: “Dùkɔ̃ kɔ̀kɔ̀ɛ”, “Tɔhonɔ̀ be àmè xɔ̀plèwo”, eye wo la yɔ wò be “Àmè jojo”, “Èdù kè jro àmèa”.