Read gen Ezayà 63 Bible Online

Ezayà 63 - gen bible

Ezayà 63

¹Àmè kɛ ye nyi àmè kè so Edɔ̀m-nyigbã ji, so yebe èdùgã Bosrà mè ò? E lè àwù biɖi-biɖi jɛ̃-hɛ̀ kè mè fiɔ̃a mè. E zɔ̃ gbãnà kudo kãkã ɖo ji, le ɖè yebe ŋusɛ̃a fiɔ. Tɔhonɔ̀ gblɔ̃ be: “Ènyè ye! Mù ɖona kòjo jɔ̀jɔɛ, mù le pò àvũ sɔ hlùɛ̃ gã.”

²Nukɛ ŋuti ye àpo àwùwo bìa hɛ̀ ɖo ò, nukɛ ŋuti àwùawo bìa hɛ̀ sìgbè vɛ̃fiɔ̃tɔ be àwù nène ò?

³Ɛ̃ɛ, nyè ɖèka pɛ ye tùkù vɛ̃-kuawo lè vɛ̃fiɔ̃nua mè. Àmè ɖe mu lè èdùa mè, kpe ɖo ŋuti nyè ò. Nène a ye mù tùkù wo sɔ fiɔ̃ wo lè àpe àdɔ̀mèze gã mè. Èjìbibi ye mù sɔ fiɔ̃ wo. Woabe vɛ̃siawo ye hlɛ̃ kɔ̀ ɖo àpe àwùwo ŋuti eye wo bìa hɛ̀ nènea.

⁴Mù ɖo e lè àpe èjì mè be ma biɔ èhlɔ̃ ne ma na vòvo àpe dùkɔ̃a.

⁵Mù ɖè èkɔ̀ eye kpɔɖa àlɔ̀do ɖekpe mu lè ò. E wɔ̀ ŋùdã be àlɔ̀do ɖe mu lè ò. Ekèa na be mù dojì ɖo àbɔ sɛ̃sɛ̃ nyèa ŋuti eye àdɔ̀mèze nyèa ye do mù àlɔ̀.

⁶Lè àpe èjìbibi mèa, mù tùkù dùkɔ̃wo, mù na wo mu àhà lè èjìbi be àdã nyèa nu. Mù kɔ̀ woabe èhũwo ɖo ànyigbã.”

⁷Mù jro la gbà ɖoŋù Tɔhonɔ̀ be àdɔ̀mè nyuɛ̃ kèwo jè na kafua ji. Mi kpɔ nyɔna fuwo so Tɔhonɔ̀ si, e wɔ̀ àdɔ̀mè nyuɛ̃ màgũ na Izràɛl-dùkɔ̃a. E wɔ̀ ènu sùgbɔ na wo to lɔ̃lɔ̃ ji eye yebe nyɔnawo mu lè hɛ̃hlɛ̃ ò.

⁸E gblɔ̃ so woa ŋuti be: “Nyàwo, wo nyi àpe dùkɔ̃, àmèbèble-nu ɖe mu la nɔ̀ woa mè ò.” Eye e zũ woabe hlùɛ̃tɔ.

⁹Ekèa na be lè woabe àyàɖùɖuwo kpata mèa, mu nyi àmèdɔ̃dɔ̃ ɖe àlo àtikplɔtɔ ɖe ye hlùɛ̃ wo gã ò, vɔ̀a Tɔhonɔ̀ ŋutɔ ye va kudo lɔ̃lɔ̃, eye to ŋuzĩzĩkuku mè e na wo vòvo. E do wo àlɔ̀ gbà do wo ŋusɛ̃ lè hùenu ŋua.

¹⁰Co wo lìa woa ɖokoewo eye wo do vève sèse na yebe Gbɔ̃gbɔ̃ kɔ̀kɔ̀ɛa. Eye Tɔhonɔ̀ trɔ zũ woabe kɛ̃tɔ eye e sitè ɖo woa ŋuti.

¹¹Nène a ye dùkɔ̃a va ɖo ŋùku gbèɖegbè be àzãwo ji lè Mosè be hùenu yeŋu. Fikɛ àmè kè ɖè yebe dùkɔ̃a to lè àpùa mèa ɖe? Kè ɖè yebe àlɛ̃ha kudo àlɛ̃kplɔ̀tɔwo kpata toa ɖe? Fikɛ àmè kè sɔ yebe Gbɔ̃gbɔ̃ kɔ̀kɔ̀ɛa do woa dòmèa ɖe?

¹²E ye do ŋusɛ̃ Mosè lè àzɔ̃lìa be zɔ̃zɔ̃ mè ku yebe àbɔ sɛ̃sɛ̃a. E na àpùa ma ɖo èvè lè ŋùkɔ̀ na wo na yebe nyikɔa be gogo kaka sɔ yì.

¹³E ye na wo sò àpù titoa sìgbè lekè èsɔ tona zògbè jia nène. Wo mu klɛ̃ àfɔ̀ kaka la jè ànyi ò.

¹⁴Wo le yì kpò sìgbè èlãha kè le ɖì àbù a nène. Tɔhonɔ̀ be Gbɔ̃gbɔ̃ a kplɔ̀ wo yì jɛ̃gbɔ̃pe. Ɛ̃ɛ Tɔhonɔ̀, nènea ye wò kplɔ̀ àpo dùkɔ̃a sɔ na gogo àpo nyikɔa yeŋu.

¹⁵Tɔhonɔ̀ ɖè èkɔ̀ kpɔ ènu kè le jɔ̀ ɖo mia jia, so kaka nɔ̀pe wò lè èjihũi. Eŋuã fikɛ àpo lɔ̃lɔ̃ màgblà gbèɖe ku àpo àlɔ̀ sɛ̃ŋua lè ò? Àdɔ̀nu mu gbà le hùã na wòa, Mi mu gbà le sè àpo àlɔ̀ fàfa kè wò sɔ hɛ̃nà mia ke ò.

¹⁶Co èwò ye nyi mia tɔ. Mia tɔgbe Abràham mu nya mi ò, nènea ke Yakɔb cã mu jèsi mi ò. Vɔ̀ èwò Tɔhonɔ̀ ye nyi mia tɔ, èwò ye “xɔ̀ mi plè” tɛ̀gbɛ̀.

¹⁷Nukɛ ŋuti wò na mi le dã pòxla ò, Tɔhonɔ̀? Mi lè boo lè èmɔ̃ wòawo gbɔ eye wò trì èjì na mi kaka mi mu gbà le vɔ̃ wò ŋutɔ cã ò. Tɔ̀ wò jɔ̀, trɔ va, ɖo lɔ̃lɔ̃ kè wò ɖo na mia sumɔ̃vi wòwo, dùkɔ̃ kè nyi tɔ̀ wòa ŋuti.

¹⁸Mi àpo dùkɔ̃ kɔ̀kɔ̀ɛa, mi xɔ̀ miabe ècrɔ̃-nyigbãa na gàmè viɖe kpò. Miabe kɛ̃tɔwo tùkù àpo tèpe kɔ̀kɔ̀ɛa.

¹⁹So xoxo ke wò jìjɔ mi kpɔ̀kplɔ eye wo mu gbà le yɔ àpo nyikɔ ɖo mia ŋuti ò. Aò wò kè zɛ̃ jiŋùkusi ne wòa ɖiɖi va ànyigbã ji lè èdò. Eye ètowo la hũhũ lè ŋùkɔ̀ na wò.