Read gen Ezayà 65 Bible Online

Ezayà 65 - gen bible

Ezayà 65

¹Tɔhonɔ̀ gblɔ̃ be: Mù ɖè ɖokoe nyè fiɔ àmè kèwo mu jina mù kpɔ òa; eye mù na àpe èsìkɔ tì àmè kèwo mu biɔna mù ènyà ɖe sè òa. Mù gblɔ̃ na dùkɔ̃ kè mu yɔna àpe nyikɔ òa be: “Mù lè fikèa, ènyè ye kè!”

²Mù kè àpe àlɔ̀wo ɖotè na dùkɔ̃ mà-wɔ̀ ànùkua, na àmè kèwo kpɔ̀tɔ̀ lè èmɔ̃ bàɖà ji eye wo le wɔ̀ ènu kè jro woa.

³Dùkɔ̃ kèa le tè mù kpɔ lè gàglàgbè. Wo le wɔ̀ vɔsa lè àbɔwo mè. Wo le tɔ èzò lifiwo lè èkpewo ji na vòduwo.

⁴Wo nɔ̀nà ànyi ɖo èyɔ̀dowo mè, wo nɔ̀nà àkpãdowo mè. Wo ɖùnà èhãlã eye woabe àgbãwo mè ɖɔ kudo ènuɖùɖu pòɖiwo.

⁵Wo gblɔ̃ be: “Mì mu gbà gogo mi ò, mì mu gbà tɔ mi àsi ò. Àfɔ̀ku lè e mè na mì ɖo mù nyi àmè ɖè ɖovò na Mawu.” Ne mù ɖèkɔ̀ kpɔ ènu kèawoa, àpe àdɔ̀mèze lena èzò kaka bìnà mà jìjɔ.

⁶E nyɔ, mù ŋlɔ̀ ekèa kpata dà ɖɛ. Nyè mu la bɔ̀nu kpɔ wo ò eye mù la va ɖo e tèpe na wo.

⁷Ɖo woabe àgɔ̀jèjewo ŋutia, àmè kèwo tɔ èzò lifi lè ètowo tamè eye wo zũ mù lè ètokɔ̃ɛwo jia. Ɛ̃ɛ, mù la tu ènu kèwo wo wɔ̀ va yì sã be èfɛ̃ na wo kòkòkò. Ènyè Tɔhonɔ̀ ye gblɔ̃ ɛ̀.

⁸Tɔhonɔ̀ gblɔ̃ be: “Ne àmèwo kpɔ vɛ̃kusɛ̃sɛ̃ be èkpò lòlò ɖo èsì nyuɛ̃ ɖe a, wo gblɔ̃nà be 'mi mu gbà sò è ò ɖo e la na vɛ̃ àdodoe'.” Mù la wɔ̀ nènea ke na àpe sumɔ̃viwo ne nyè mu gbà crɔ̃ wo kpata ò.

⁹Mù la na jìjimè ɖe la to so Yakɔb mè. Ɛ̃ɛ so Yudà be kɔ̀ta mè ye mù la yɔ àpe ètowo be crɔ̃ɖùtɔa lè. Àmè cãcã nyèwo la sɔ ɛ̀ ɖù crɔ̃ eye sumɔ̃vi nyèwo la sò nɔ̀pe ɖo funua.

¹⁰Sarɔ̀n be gbàmè la trɔ zũ ègbɔviwo be ènuɖùpe eye Akɔ̀r be bàlìa la nyi ènyìwo be èkpa na dùkɔ̃ nyè kè la ji àpe ŋùmèa.

¹¹Vɔ̀a mì àmè kèwo trɔ ŋùgbe do mù eye mì ŋlɔ̀be àpe èto kɔ̀kɔ̀ɛa, mì àmè kèwo le na ènuɖùɖu Gadò vòdu kè nana èta nyuɛ̃a, eye mì pònà èɖɛ̀ lè èsɛ vòdu Menì gbɔa!

¹²Nyè cã, mù la hlɛ̃ mì lè èwi nu eye mìabe kɛ̃tɔwo la ɖè èta lè mìa nu lè mìabe èklòwo ji. Mù yɔ mì, vɔ̀a mì mu tɔ̀ na mù ò, mù pò nupo, vɔ̀a mì mu ɖoto ò. Mì wɔ̀ ènu kè mu jè òa, eye mì yì sɔ ènu kè mù crìa.

¹³Ekèawo ŋuti Tɔhonɔ̀ gblɔ̃ be: Àpe sumɔ̃viwo la ɖùnu vɔ̀a mìa ya, mì la kuàdɔ̀ ku. Àpe sumɔ̃viwo la nù, vɔ̀a mìa ya èsìkɔ la tì mì. Àpe sumɔ̃viwo la nɔ̀ jìjɔɛ mè, vɔ̀a mìa ya mì la ɖɔ kudo ŋùkpɛ̃.

¹⁴Àpe sumɔ̃viwo la do jìjɔɛ be àpa ku jìmè kɔ̀kɔ̀ɛ, vɔ̀a mìa ya, mì la do vève sèse be àpa ku ènu xàxa lè èjì mè. Ɛ̃ɛ àyè la gbãdo na mì eye mì la ŋɛ̃.

¹⁵Àpe sumɔ̃viwo la sɔ mìabe nyikɔ sɔ sɛ̃kpɛ̃ gblɔ̃ be “Ne ɖì mìa ŋuti sìgbè àmè kèa àlo àmè ŋua” nène. Vɔ̀a nyikɔ bu ye wo la yɔ ɖo àpe sumɔ̃viwo ya ŋuti.

¹⁶Ne àmè ɖe jro la tu sìa, ne tu sì lè ànùkua Mawu a be nyikɔ mè. Àmè kè la kã àtãŋu lè ànyigbã a jia ne kã ɛ̀ lè ànùkua Mawu a be nyikɔ mè. Nyàwo, xoxo be ènu xàxawo nu la sò. Wo la bu lè àpe ŋùku mè.

¹⁷Ɛ̃ɛ mù la gbìgbɔ̀ ɖo jiŋùkusi yeye kudo ànyigbã yeye. Nène a, ènu xoxowo mu la gbà nɔ̀ ànyi ò. Àmè ɖekpe mu la gbà ɖoŋùku e ji ò.

¹⁸Jìjɔɛ donu kudo jìjɔ̀jɔɛ tɛ̀gbɛ̀dò ye mù la sɔ ɖo woa tèpe na wò. Yèruzàlɛm la trɔ zũ jìjɔɛ be èdù eye yebe àmèwo kpata la ɖɔ kudo jìjɔɛ be àyosòso.

¹⁹Mù la kpɔ jìjɔɛ so Yèruzàlɛm ŋuti eye yebe dùkɔ̃a la nyi jìjɔɛ donu na mù. Wo mu la gbà sè àvi fãfã ku àpa dodo gbèɖe ò.

²⁰Vifɛ̃ hũkɔ̃ɛ̃ ɖe mu la gbà ku kpàtà ò, eye àmè sĩsĩ ɖe cã mu la gbà ku kpàtà ne mu wù yebe àgbèzãwo nu ò. Nyàwo, ɖèkajɛvi la ɖo èpè àlɔ̀ ɖèka (100) gbɔ̀xue la ku eye ne àmè ɖe mu ɖo èpè àlɔ̀ ɖèka (100) gbɔ̀xue ku òa, eŋuã kpɛ̃sɛ̃ ye ɖì e ŋuti.

²¹Wo la tù èxɔ̀wo, la nɔ̀ woa mè. Wo la dà vɛ̃-gblewo eye wo la ɖù woabe kusɛ̃sɛ̃wo.

²²Wo mu la gbà tù àxuewo ye àmè buwo la va nɔ̀ woa mè ò. Wo mu la gbà dà vɛ̃-gblewo ye àmè buwo la va ɖù woabe kusɛ̃sɛ̃wo ò. Ɛ̃ɛ àpe dùkɔ̃mèviwo la sĩ ŋutɔ sìgbè àtiwo nène. Àpe àmè cãcãwo la ɖù woabe àlɔ̀nudɔwo.

²³Wo mu la gbà jè àgbàgba gbalo ɖe ò. Wo mu la gbà jì èvi ye èku la sɔ ɖù kpàtà ke ò. Ɖo wo la nyi Tɔhonɔ̀ be sìtumewo be jìjimè eye woabe tɔgbe tɔ̀gbè yɔviwo la nɔ̀ kudo wo.

²⁴Keŋu gbɔ̀xue wo la kè ènu sɔ yɔ mù a, mù la tɔ̀ na wo. Eye kaka kè wo kpɔ̀tɔ̀ le pò nupo kea, mù la ɖoto wo xoxo.

²⁵Gbète kudo àlɛ̃vi la ɖù ènu lè àgbã ɖèka mè; Jãŋùta la ɖù ègbe sìgbè ènyì ke nène. Eye hũhũ la nyi èdã be ènuɖùɖu. Ènu bàɖà ku èkunyànyrã ɖekpe mu la gbà nɔ̀ àpe èto kɔ̀kɔ̀ɛa ji ò. Nène a ye Tɔhonɔ̀ gblɔ̃ yeŋu.