Read gen Ezayà 66 Bible Online

Ezayà 66 - gen bible

Ezayà 66

¹Tɔhonɔ̀ gblɔ̃ be: “Jiŋùkusi ye nyi àpe èfìɔzìkpe eye ànyigbã nyi àpe àfɔ̀ɖojinu. Àxue kɛ ye mì la tù na mù fifìa ò? Fikɛ ye mì susu be mù la sò nɔ̀pe ɖo ò?

²Àpe àlɔ̀ ye wɔ̀ ènu ɖoɖo kèawo eye wo nyi tɔ̀ nyè, nyè ŋutɔ ye gblɔ̃ ɛ̀. Vɔ̀a àmè kè mù le kpɔ ku àdɔ̀mè nyuɛ̃a, nyi àmè kè le ɖù àyà gbà gbɔjɔa, àmè kè le sè ègbè na mù a ye.

³Wo sɔ ènyì-su le wɔ̀ vɔsa, co gbà le do àmè èku. Wo le wù àlɛ̃, co gbà le tro èkɔ̀ na àvũ. Wo le wɔ̀ ènunana vɔsa, co gbà le kɔ̀ èhã be èhũ ɖo ànyi. Wo le tɔ èzò lifi na mù, vɔ̀ gbà le sumɔ vòduwo. Ɛ̃ɛ àmè kèawo cã woabe èmɔ̃wo eye wo le kpɔ jìjɔɛ lè woabe àfɛ̃nuwo wɔ̀wɔ mè.

⁴Nène a ye nyè cã mù jro la ɖè àsi lè woa ŋuti ne woa kpɔ emènu. Mù la na vɔ̃vɔ̃ jiŋɔ la jè woa ji. Ɖo mù yɔ, eye àmè ɖekpe mu ɖoto ò; Eye wo wɔ̀ ènu kè mu jè ŋùmè na mù ò; Wo dà àsi ɖo ènu kè mu jɔ̀nàjì na mù òa ji.”

⁵Mì ɖoto Tɔhonɔ̀ be ègbè, mì àmè kèwo le sè yebe ènyà ku bùbua: Mìa nɔ̀vi kèwo le hà mì ɖo ŋuti nyè eye wo le crì mìa, le ɖù fɛwu lè mìa ŋuti gblɔ̃ be: “Tɔhonɔ̀ ne ɖè yebe gogoa fiɔ, ne mia teŋu kpɔ mìabe jìjɔɛa!” Vɔ̀a, woawo ye la ɖɔ ku ŋùkpɛ̃.

⁶Ègbè ɖe le ɖì hòo, so èdùa mè, ègbèa le ɖì so mawuxɔa mè ke. Tɔhonɔ̀ kè la ɖo e tèpe na yebe kɛ̃tɔwoa be ègbè ye.

⁷Gbɔ̀xue be la tɔ èkulelea, e jì èvi vɔ̀. E jì ŋusùvi ɖèka gbɔ̀xue va tɔ vève sèse.

⁸Àmè kɛ ye sè àlo kpɔ ekèa kpɔ ò? Wo la teŋu jì èdù blibo lè ŋùkèkè ɖèka mèa? Wo la teŋu jì dùkɔ̃ zè ɖèkaa? Co, ekèa ye Yèruzàlɛm wɔ̀; gbɔ̀xue e la le èkua, e jì èviwo kɔ̀ ɖɛ.

⁹Tɔhonɔ̀ àpo Mawu a gblɔ̃ be: “Ne mù na nyɔ̃nù fɔfu, hɛ̃ ɛ̀ kaka na wètri àsiɖèkɛ sɔ̃ŋua, mù la va xe èmɔ̃ na ɖèvia be jìjia? Ne ènyè ye nana àgbèa, mù la jo gbe be ɖèvia mu gbà va xixea mè òa?”

¹⁰Mì àmè kèwo lɔ̃ Yèruzàlɛm be ènyà gbɔa, mì kpɔ jìjɔɛ gã ɖe so e ŋuti. Ɖo yebe gbledowo na mì nɔ̀ èfũ mè va yì, fifìa mì sò àyo kudo è.

¹¹Nène a, e la do mì ŋusɛ̃. Eye mì la ɖɔpò sìgbè ɖèvi lè ànɔ nu kèwo le kpɔ jìjɔɛ ɖo woa nɔ̀wo be ànɔ kèwo ɖɔ ku ànɔsi ŋutia nène.

¹²Ɖo Tɔhonɔ̀ gblɔ̃ be: “Mù la na ŋuti fàfa be nyɔna la srà yì Yèruzàlɛm sìgbè ètɔ̀ nène. Eye dùkɔ̃wo la ɖo àdɔ̀kùnuwo fuu sìgbè ètɔ̀ sàsra nène. Mù la kpɔ mìa ji sìgbè lekè ènɔ̀ wɔ̀nà na ɖèvi kè lè ànɔ nu a nène. Mù la kpã mì, eye mù la kɔ mì ɖo àta ji, la do èwè na mì.

¹³Nyàwo, sìgbè lekè ènɔ̀ kebena èvia sɔ dona ɛ̀ ŋusɛ̃a, nènea ke mù la ɖo àsi àkɔ na mì. Wo la ɖo àsi àkɔ na mì lè Yèruzàlɛm.

¹⁴Ne ekèa va e mèa, mì la ɖɔ ku jìjɔɛ eye mìabe àmètia la gbɔ̀ àgbè sìgbè àmàgbe kè ji èjisi kɔ̀ ɖoa nène.” Àmè kèwo le sètonua, la kpɔ Tɔhonɔ̀ be ŋusɛ̃, vɔ̀a yebe kɛ̃tɔwo la ɖɔ yebe àdɔ̀mèzea be kpɛ̃kpɛ̃ mè kpɔ.

¹⁵Nyàwo mì kpɔ Tɔhonɔ̀ ɖa: E gbãnà to èzò mè, yebe àhùakèkeviviwo lè sìgbè àya kè sɔa nène. E gbãnà la ɖè yebe jìbibi be àdãa fiɔ eye e la gbà tɛ̃ ŋùku do àmèwo to èzò be àɖewo ji.

¹⁶Dodo èzò kudo èwui ye Tɔhonɔ̀ la sɔ ɖo kòjo ku àgbètɔwo kpata. Eye àmè sùgbɔ la crɔ̃.

¹⁷Àmè kèwo wɔ̀nà woa ɖokoe kɔ̀kɔ̀ɛɖe tɔ̀hɛ gbɔ̀xue yìnà vòdu be àbɔwo mè. Wo nɔ̀nà ŋùgbe na hũnɔ̀a àlo trɔna do è gòdò. Wo ɖùnà èhã, zãtɔ kudo èlã jiŋɔwo. Woa kpata la crɔ̃. Tɔhonɔ̀ ye gblɔ̃ ɛ̀.

¹⁸Mù nya ènu kè wo le gblɔ̃ ku ènu kè wo le susua. Mù gbãnà ne ma bɔ̀ dùkɔ̃ kèwo dona ègbè vòvòvòwo kpata ɖodu ne woa kpɔ àpe gogo.

¹⁹Nyàwo mù la do jèsìdo ɖe woa dòmè. Mù la ɖo àmè kèwo la ci àgbè lè kòjoɖoɖo nyèa mèa, ɖoɖa àŋùtidàtɔwo lè Tarsò, Pulò kudo Ludò. Mù la ɖo wo ɖoɖa Tubàl, Yavàn kudo ètɔ̀dòmèkɔ̃ɛ̃ kèwo lè èdùtawo kaka yì fikè wo mu sè àpe ènyà lè kpɔ gbèɖe òa. Wo la yì fikè wo mu kpɔ àpe gogo lè kpɔ òa. Eye wo la yì ɖè gogo nyèa fiɔ lè funuawo.

²⁰Wo la kplɔ̀ miabe vi ŋusùwo va, wo la nɔ̀ èsɔwo ji, la nɔ̀ àhùakèkevivi kudo kèkewo mè, la nɔ̀ èsɔ-àkɛtɛwo ji kudo àfɛ̀kɛ̀wo mè va kaka èto kɔ̀kɔ̀ɛ nyèa ji lè Yèruzàlɛm. Tɔhonɔ̀ ye gblɔ̃ ɛ̀. Wo la va sìgbè lekè Izràɛlviwo la hɛ̃ ènunanawo ɖo àgbã kɔ̀kɔ̀ɛwo mè va Tɔhonɔ̀ be àxuea mèa nène.

²¹Woa dòmè mù la cã àmè ɖewo lè sɔ ɖo hũbonɔ kudo Levìwo. Tɔhonɔ̀ ŋutɔ ye gblɔ̃ ɛ̀.

²²E gbà gblɔ̃ ke be: Mìabe nyikɔ kudo mìabe jìjimèviwo la nɔ̀tè lè ŋùkɔ̀ na mù goŋu sìgbè lekè jiŋùkusi kudo ànyigbã yeye kèwo mù ɖoa, lè ŋùkɔ̀ na mù a nène.

²³Nène a ye, lè jɛ̃gbɔ̃zã sia jɛ̃gbɔ̃zã gbè kudo èpèsi-pèsia, ànyigbã ji be dùkɔ̃wo kpata la va jè èklò lè ŋùkɔ̀ na ènyè Tɔhonɔ̀a.

²⁴Eye ne wo to lè èdùa mèa, wo la teŋu kpɔ àmè kèwo sitè ɖo ŋuti nyèwo be ŋutilã kukuwo lè ànyi. Èŋɔvi kèwo la ɖù woawo mu la ku gbèɖe ò eye èzò kè mu cina òa, ye la bì wo. Ènu jiŋɔ ɖe be la nyi na ànyigbã ji dùkɔ̃wo kpata.