Read gen Ezayà 7 Bible Online

Ezayà 7 - gen bible

Ezayà 7

¹Lè hùe kè nu ye Àkaz kè nyi Yotàm be vi, Òzias be tɔgbeyɔvi ɖùfìɔ lè Yudà nyigbã jia, Aràm be èfìɔ Rèsin kudo Izràɛl be èfìɔ Pekà kè nyi Rèmalìa be via, wo yì do èxa na Yèruzàlɛm la sɔ wɔ̀ àhùa kudo è. Vɔ̀a, wo mu teŋu kpɔ xa ɛ̀ ò.

²Wo yì gblɔ̃ ɛ̀ na èfìɔ Àkaz kè lè David be fìɔzìkpea jia kudo yebe cãmìwo keŋu be: “Sirìa be àhùakɔ̃a yì ɖo àsàɖa ɖo Efràyim nyigbã ji.” Èfìɔa kudo yebe dùkɔ̃a tɔ̀zĩ[3] gbà hũhũ sìgbè àlekè àya hũhũna àtiwo lè àve mèa nène.

³Tɔhonɔ̀ gblɔ̃ na Ezayà be: “Kplɔ̀ èvi wò Ceà-Yàsuv ɖo ŋuti ne mìa yì kpɔ èfìɔ Àkaz lè èsìdo kè wo kùa be ètagbe lè èmɔ̃ kè yì ènunyàtɔwo be àgblè jia ji.

⁴Wò la gblɔ̃ na ɛ̀ be: “Dayè-xòmè ne wòa nɔ̀ kpoo. Mù gbà vɔ̃ ò. Èjì wò mu gbà hũhũ ɖo Rèsin so Aràm kudo Rèmalìa be via be àdɔ̀mèze dodo ŋuti ò. Ɖo èfìɔ èvè kèawo lè sìgbè èzòtikpo èvè kèwo kpɔ̀tɔ̀ le tù àzìzɔ kpòa nène.

⁵Nyàwo, Aràmviwo kudo Pekà gbàkudo Efràyim be àhùakɔ̃wo jro la crɔ̃ wò. Wo gblɔ̃ be:

⁶'Mì na mia yì xa Yudà nyigbã ne mia do vɔ̃vɔ̃ na wo. Mia tɛ̃ŋùku do wo ne woa wɔ̀ ɖèka kudo mi. Eye mia sɔ Tavɛ̀l be vi ɖo èfìɔ ɖo woa nu.'

⁷Vɔ̀a, ènu kè Tɔhonɔ̀ Mawu gblɔ̃a ye nyi be: 'ekèa mu la jɔ̀ ò, ekèa mu la va e mè kpɔ ò.

⁸Ɖo Arɔ̀n be èdùgã ye nyi Dàmaskò eye Dàmaskò ji kpò ye Rèsin ɖùfìɔ ɖo.' E gbà kpɔ̀tɔ̀ èpè èkà takpoci àtɔ̃ ne Efràyim be èdùa bèa crɔ̃ keŋu-keŋu

⁹Efràyim be èdùgã ye nyi Sàmarìa Efràyim ji kpò Pekà Rèmalìa be via ɖùfìɔ ɖo. Ne mì mu xɔ̀sè ɖo Tɔhonɔ̀ ji òa, mì mu la teŋu nɔ̀ àgbè ò.”

¹⁰Tɔhonɔ̀ gbà pò nupo na èfìɔ Àkaz gblɔ̃ be:

¹¹“Biɔ Tɔhonɔ̀ àpo Mawu a jèsìdo ɖe. Biɔ ɛ̀ so kaka èkuwode, àlo so kaka jiŋùkusi ke.”

¹²Vɔ̀ Àkaz ɖo e ŋuti gblɔ̃ be: “Aò, nyè mu la biɔ ènu ɖekpe ò, ɖo nyè mu ji la do Tɔhonɔ̀ kpɔ ò.”

¹³Eye Ezayà gblɔ̃ be: “Mì ɖo èto, mìa David be àxuedo a, mì le do tùkaɖa na àmèwo kaka gbà le do tùkaɖa na àpe Mawu a?

¹⁴Eŋuã Tɔhonɔ̀ ŋutɔ la na mì jèsìdo ɖe be: Tùgbɛ̀jɛvi lè àlɔ̀jia la fɔ èfu eye e la jì èvi ŋusù ɖèka. E la yɔ ɛ̀ be Èmanuɛ̀l[4].

¹⁵E la nɔ nù ànɔsi kpɛ̃kpɛ̃ ku ànyisì kaka sɔ na gà kè mè be la nya èvuɛ̃ lè ènyuɛ̃ gbɔ eye be la cã ènyuɛ̃ wɔ̀wɔ.

¹⁶Fifìa, wò le vɔ̃ Arɔ̀n kudo Izràɛl be èfìɔwo. Vɔ̀a, gbɔ̀xue ɖèvi ŋusù kèa la nya èvuɛ̃ cìcri, eye e la cã ènyuɛ̃ wɔ̀wɔa, èdù èvè kèawo mètɔwo la si gble woabe ànyigbãwo ɖɛ.

¹⁷Vɔ̀a, Tɔhonɔ̀ la na àyàɖùɖu hùenu sɛ̃sɛ̃wo la va na wò, kudo àpo dùkɔ̃a gbàkudo àpo àxuedo a. Hùenu sɛ̃sɛ̃ kèawo ɖekpe mu va kpɔ so kaka kè ye Izràɛl be fìɔdua ma lè Yudà tɔ̀a ŋuti ò. Eye Aràm be èfìɔa ji be la to va fifì.”

¹⁸E la va e mè lè àzã ŋuawo ji be Tɔhonɔ̀ la plu tɔ̀bɔ̀su kèwo lè fikè ye Ejiptè be ètɔ̀gã do ènu àpù mè lèa kudo ànyi kèwo lè Aràm nyigbã jia.

¹⁹Woa kpata la va jè ɖo bàlì wɔ̀ èkpewo mè, lè àkpã fɛ̃fɛ̃wo mè, lè ègbe do àmàwo ji, gbà jè ɖo èsìnùpewo kpata.

²⁰Gà ŋuã mèa, Tɔhonɔ̀ la dà ègɛ̃plɔnu so ètɔ̀ Efratà be àgo ɖèa ji. Ɛ̃ɛ, e la plɔ èta na mì, la plɔ èfuwo lè mìa ŋuti kaka jè mìabe ègɛ̃wo ji.

²¹Gà ŋuã mè kèa, àmè sia àmè la nyì ènyìnɔ ɖèka kudo ègbɔnɔ èvè.

²²Wo la nɔ na ànɔsi sùgbɔ kaka be wo la teŋu nɔ ɖù ànɔsi kpɛ̃kpɛ̃. Ɛ̃ɛ, àmè kèwo keŋu la kpɔ̀tɔ̀ ci ànyigbã jia, la nɔ ɖù ànɔsi kpɛ̃kpɛ̃ kudo ànyisì.

²³Gà ŋuã mè ke ye vɛ̃-gble kè mè ye vɛ̃ka hotu hotuwo bɔ lèa, la ci gbalo ye àŋùja la vũ cɔ̃ e ji.

²⁴Àŋùja la vũ cɔ̃ ànyigbã a eye àmèwo la va dà àdè lè funu ku àŋùtiwo kudo àŋùdàti.

²⁵Eye haɖo àŋùjawo ŋutia, àmè ɖe be àfɔ̀ mu la teŋu gbà jè ètokɔ̃ɛ kèwo ji wo dènà àgblè lè sãwoa ji ò. Wo la trɔ zũ ènyìwo be ènuɖùpewo kudo àlɛ̃wo be èkpamè.