Read gen Ezayà 8 Bible Online

Ezayà 8 - gen bible

Ezayà 8

¹Tɔhonɔ̀ gblɔ̃ na mù be: “Sɔ ènuŋlɔ̀kpe gã ne wòa ŋlɔ̀ ɖo e ji be: “Kaba àɖùflui be àdɔ̀kùnuwo mu nɔ̀nàtè ò”.

²Eye mù sɔ ènuŋlɔ̀kpea sɔ fiɔ ɖaseɖùtɔ àdodoe èvè kèwo nyi hũbonɔ Urìa kudo Yèberekìa be vi Zakarìa.

³E yomè a, mù yì dɔ̃ kudo nyɔ̃nù gblɔ̃ɖɛtɔa. E fɔ èfu eye e jì èvi ŋusù ɖèka. Eye Tɔhonɔ̀ gblɔ̃ na mù be: “Ɖo nyikɔ na ɛ̀ be 'Kaba àɖùflui be àdɔ̀kùnuwo mu nɔ̀nàtè ò'”.

⁴Ɖo gbɔ̀xue ɖèvia la tɔ “mamã” “pàpa” gbɔ̃gblɔ̃a, wo la lɔ Dàmaskò be ènu xɔ̀asìwo kudo Sàmarìa be àdɔ̀kùnuwo va na Àsirìa be èfìɔa.”

⁵Tɔhonɔ̀ gbà gblɔ̃ na mù be:

⁶“Ekè dùkɔ̃ kèa gbe ènu lè Silò be èsì kè srànà blɛ̀wù, eye e gbɔjɔ lè èfìɔ Rɛsìn kudo Rèmalìa be via be wɔ̀nawo be ŋùkɔ̀a,

⁷eŋuã, Tɔhonɔ̀ la na Efratà be èsì gbogbo wɔ̀adã, la xa ɛ̀, ɛ̃ɛ Àsirìa be èfìɔa ku yebe ŋusɛ̃ gã ŋua. Efratà la sitè lùlùlù kaka e la gbã pòhla.

⁸E la gbã yì xa Yudà, e la ɖɔ ɛ̀ kaka yì èkɔ̀ gbɔ ke. E la gbã yì àzɔ̀ge boo kãkã ɖo àpo ànyigbã kpata ji, Oò Èmanuɛ̀l.”

⁹Dùkɔ̃wo mì vɔ̃ kaka mìa ku bèɖè. Mìa ànyigbã be nukpòpewo, mì ɖo èto mù. Mì teŋu bla àhùakpa co, vɔ̃vɔ̃ la jè mìa ji. Ɛ̃ɛ, mì la bla àhùakpa co, vɔ̃vɔ̃ la ɖo mì!

¹⁰Ne mì ɖo àɖàŋùa, e la gble, ne mì ɖo ègbè èdua, ma va e mè ò. Ɖo Mawu lè kudo mi.

¹¹Tɔhonɔ̀ dà àsi ɖo ji nyè eye e do ègbè àsi na mù be nyè mu gbà kplɔ̀ Yudà be dùkɔ̃a do ò. E gblɔ̃ na mù be:

¹²“Mì mu gbà gblɔ̃ sebla be ènyà wàlɛbɛ kè àmè kèawo le gblɔ̃ sebla be ènyà ò. Ènu kè le do vɔ̃vɔ̃ ji na woa mu gbà ɖo vɔ̃vɔ̃ na mì ò. Mì mu gbà vɔ̃ wo ò.

¹³Mì do è jèsi be Tɔhonɔ̀ ŋusɛ̃ kpatatɔa ye nyi àɖèsã. E ye mì ɖo la bù, e ye mì ɖo la vɔ̃.

¹⁴E la nyi tèpe kɔ̀kɔ̀ɛ kudo àfɔ̀klɛ̀kpe na Izràɛl be àxuedo èvèa. E la nyi gàmɔ kudo èɖɔ kèwo mè Yèruzàlɛmvi sùgbɔ la jè.

¹⁵E la na àmè sùgbɔ la klɛ̃ àfɔ̀, la jè ànyi eye wo la ŋɛ̃. Wo la gɛ̃ jè èmɔ̃ mè eye wo mu la teŋu ɖè woa ɖokoewo ò.”

¹⁶Mù la wla ènyà kèa ɖo ènu gɔ̃mè; mù la sɔ ènufiɔfiɔ kèa dà ɖo fikè àmè mu la teŋu kè ɖo e ŋuti lè kaba òa, lè ènukplavi nyèwo dòmè.

¹⁷Mù nɔ̀tè kpɔ Tɔhonɔ̀ sinu, e ye kè ɖè èkɔ̀ lè Izràɛl ŋuti gbɔ̀xuea. Vɔ̀a, mù le ɖoŋù ɖo e ŋuti.

¹⁸Ènyè ŋutɔ kudo ɖèvi kèwo Tɔhonɔ̀ na mù a, mi nyi jèsìdo ku àmèsìasia lè Izràɛl. Mi lè sìgbè dosia nène na Tɔhonɔ̀ ŋusɛ̃ kpatatɔ kè sò nɔ̀pe ɖo Ziɔ̀n be èto kɔ̀kɔ̀ɛa jia.

¹⁹Ne wo gblɔ̃ na mì be: “Mì yì ènukãtɔwo gbɔ ne mìa yì kã ènu, mì yì èxɔ̀yɔtɔwo ku èsɔ̀mèkpɔtɔwo gbɔ, ɖo e nyɔ be dùkɔ̃ ne yì kã biɔ lè yebe vòduwo gbɔ, ne biɔ ènukã sè lè tɔgbewo gbɔ na àmè kèwo lè àgbèa be nyɔna.”

²⁰Ne wo gblɔ̃ ekèa na mìa, mì ɖo e ŋuti be: “Ènyàa kudo ènufiɔfiɔa kpò gbɔ ye àgbètɔwo ɖo la va.” Àmè kè mu le wɔ̀ ekèa òa, mu la teŋu kpɔ gomè lè kɛ̃klɛ̃ kè gbãnà mè ò.

²¹Wo ɖìsà to ànyigbã kpata ji, wo zĩ wo ɖo ànyi eye àdɔ̀ le wù wo. Àdɔ̀wùamèa na kaka wo le sɛ̃kpɛ̃ na woabe èfìɔ ku woabe Mawu. Wo la trɔ ŋùmè ɖoɖa jiŋùkusi,

²²e yomè a, wo la trɔ kpɔ ànyigbã a. Gbledo, vìvìti cicri, vɔ̃vɔ̃ gã ɖe kudo èzãjiŋɔ ye wo la kpɔ.

²³Vɔ̀a, mu la gbà nyi vìvìti cicri na dùkɔ̃ kè vɔ̃vɔ̃ gã ɖe ɖɔ ò. Sãa, Tɔhonɔ̀ na àkpɔ̃ ɖɔ Zabulɔ̀n kudo Neftalì be èdùwo. Vɔ̀ sɔ̀sɔɛɖe kèa, e la sɔ bùbu tɔ̀hɛ na èmɔ̃ kè to àpù toa, lè Yɔrdàn be ètɔ̀a be èwèzɛ̃pe goji ku Galilea, àmèjrowo be àgowo ji.