Read gen Ezayà 9 Bible Online

Ezayà 9 - gen bible

Ezayà 9

¹Dùkɔ̃ kè le zɔ̃ lè vìvìti mèa kpɔ kɛ̃klɛ̃ gã ɖe. Kɛ̃klɛ̃ be èŋù ɖe kè na àmè kèwo lè vìvìti be ànyigbã jia.

²Tɔhonɔ̀, wò ɖɔ wo kudo nyɔna eye woabe jìjɔɛa gbãgo. Wo le kpɔ jìjɔɛ lè àpo ŋùkɔ̀ sìgbè àlekè wo kpɔna ɛ̀ lè nukuyàya àlo àmɔ̀nyɔ̀nuwo be mamã hùenu nène.

³Ɖo wò ɖè àpo dùkɔ̃a to lè àmè zĩ ɖo ànyi mè, lè èkpò kè le do àbì àbɔta na ɛ̀a si, lè èba kè le pò èa si. Wò gbã ekèawo sìgbè àlekè wò wɔ̀ ɛ̀ lè Madìantɔwo be ètèsisi mèa nène.

⁴Kɛ̃tɔwo be àfɔ̀kpa kèwo na ànyigbã hũhũ kudo àwù kèwo pò èhuãwo kpata nyɔ ne woa tɔ wo èzò. Wo nyi èzò be nuɖùɖu.

⁵Ɖo wo jì èvi ɖe na mi, wo na mi ɖèvi ɖèka. Wo na ɛ̀ jiɖùɖu. Wo dà nyikɔ ɖo e ji be: “Ètopòɖotɔ nyuɛ̃, Mawu ŋusɛ̃tɔ, ètɔ mà-vɔ, fàfa be fìɔvi.”

⁶Yebe àcɛ̀a la kèkèta eye yebe fàfa la nɔ̀ ànyi tɛ̀gbɛ̀. E la ɖùfìɔ lè David be fìɔzìkpea ji eye e la le fìɔdua ɖotè. E la na bèlele la nɔ̀ jèna kudo jɔ̀jɔɛwɔ̀wɔ ŋuti kaka sɔyì. Tɔhonɔ̀ ŋusɛ̃ kpatatɔ be lɔ̃lɔ̃ ye la wɔ̀ ekèa.

⁷Tɔhonɔ̀ gblɔ̃ ènyà ɖo Yakɔb be jìjimèviwo ŋuti, ènyàa yì jè Izràɛl be àkpa ɖèka ji.

⁸Dùkɔ̃a kpata nya ekèa. Efràyim ku Sàmarìatɔwo kpata gblɔ̃nà ègòyinya be:

⁹“Èkpe sòso be èglìwo mù, mi la tù èxɔ̀ kudo èkpe kpàkpawo, lokòti be èxɔ̀tiwo mù, mi la ɖɔ̀lì wo kudo èjèti be àtikpowo.”

¹⁰Nène a, Tɔhonɔ̀ na ŋusɛ̃ Rɛsìn be kɛ̃tɔwo ɖo Izràɛl ji. E do àdã ètamè na yebe kɛ̃tɔwo,

¹¹Aràmtɔwo sitè so èwèzɛ̃pe, Filistìtɔwo lè ŋùgbe na wo. Eye wo trɛ̃ Izràɛl keŋu-keŋu. Co Tɔhonɔ̀ be àdɔ̀mèzea nu mu ci ò eye yebe àbɔ sɛ̃sɛ̃a gbà lè àdã ji kòkò.

¹²Lè e mèa, dùkɔ̃a mu trɔ va àmè kè le pò èa gbɔ ò, eye Izràɛlviwo mu ji Tɔhonɔ̀ ŋusɛ̃ kpatatɔa be ŋùmè ò.

¹³Nène a, lè ŋùkèkè ɖèka pɛ mèa, Tɔhonɔ̀ gbã ènuwo kpata lè Izràɛl, so èta kaka va gɔ̃mè.

¹⁴E pò àgbònùgla ku cãmìwo pu ànyi so kaka èji, eye àjè gblɔ̃ɖɛtɔwo so gɔ̃mè.

¹⁵Kplɔ̀tɔwo kplɔ̀ dùkɔ̃ trãmɔ eye ŋùkɔ̀nɔ̀tɔwo gbà trã ɛ̀ ɖo ji.

¹⁶Ekèa ŋuti ye Tɔhonɔ̀ mu la sɔkè jìjimè kèa ò. Mu la kpɔ ɖo e mè na woabe àhòsìwo ku cɔɛviwo ò, ɖo àmè ɖekpe mu la nɔ̀ ègbèji ò, eye wo wɔ̀ ènuvuɛ̃. Ènu kè wo le gblɔ̃a keŋu nyi bùsunya. Co Tɔhonɔ̀ be àdɔ̀mèzea nu mu ci ò eye yebe àbɔ sɛ̃sɛ̃a gbà lè àdã ji kòkò.

¹⁷Ɖo èkunyànyrã le bì sìgbè èzò nène, le fiɔ̃ àklãti ku àŋùjawo eye e fiɔ̃na àve be àtiviviwo kaka èzòa yìnà èji boo ku àzìzɔ lìlìlì.

¹⁸Kù ɖo Tɔhonɔ̀ be jìbi be àdã ŋutia, èdùa kpata lezò eye dùkɔ̃a trɔ zũ èzò be èlã. Àmè ɖekpe mu hlùɛ̃ nɔ̀via gã ò.

¹⁹Wo hlà ènu ɖe ɖù lè ɖùsi mè co àdɔ̀ gbà le wù wo. Wo kã ènu ɖe ɖù lè èmìɔ̃ mè vɔ̀a, wo mu ɖɔpò ò. Àmè sia àmè le hlà nɔ̀via le ɖù.

²⁰Manasè kudo Efràyim wo le hlà woa nɔ̀nɔwo. Wo yì wɔ̀ ɖèka ɖo Yudà ŋuti. Co lè ekèa mèa, Tɔhonɔ̀ be àdɔ̀mèzea nu mu ci ò eye yebe àbɔ sɛ̃sɛ̃a gbà lè àdã ji kòkò.