Read gen Levìwo 1 Bible Online

Levìwo 1 - gen bible

Levìwo 1

¹Tɔhonɔ̀, lè ègòdodo be gòxɔa mè, yɔ Mosè, eye be gblɔ̃ na ɛ̀ be:

²“Pò nupo na Izràɛlviwo, ne wòa to na wo be: Ne mìa dòmètɔ ɖe hɛ̃ ènu nana va na Tɔhonɔ̀a, ènu nana a ɖo la nyi ènyì, àlo àlɛ̃, àlo ègbɔ.

³'Ne ènumème vɔsaa nyi ènyìa, wo la na àsu kè ŋuti èvuɛ̃ ɖekpe mu lè ò a; wo la sɔ ɛ̀ va ègòdodo be gòxɔa mɔnu, ne Tɔhonɔ̀ ne xɔ̀ ɛ̀;

⁴wo la ɖo àlɔ̀ èta ji na èlãa, wo la wù ì, sɔ na àmè kè le wɔ̀ èkɔ̀nua, ne woa sɔ wɔ̀ èvuɛ̃ sɔ kè be èkɔ̀nua na ɛ̀.

⁵Wo la sò èhlò na èlãa, lè Tɔhonɔ̀ be ŋùkɔ̀; ekèa yomè a, hũbonɔ kèwo nyi Arɔ̀n be èviwoa la sɔ èhũa ɖo Tɔhonɔ̀ be ŋùmè, eye wo la wu èhũa, trɔ do vɔsakpe kè lè ègòdodo be gòxɔa be ŋùkɔ̀a;

⁶Wo la ɖè àgbàzea àlo la ko èlãa eye wo la flì ì.

⁷Ekèa yomè a, hũbonɔ Arɔ̀n be èviwo la dozò ɖo vɔsakpea ji, eye wo la fɔ̀ ànakè ɖo èzòa mè.

⁸Hũbonɔawo, Arɔ̀n be èviawo la ɖo èlã, ètaa ku àmì tèpeawo ɖo èzòti kèwo ye lè vɔsakpe be èzòa nua ji.

⁹Wo la sɔ èsì klɔ àdɔ̀mènuawo ku àfɔ̀awo, eye hũbonɔawo la sɔ woa kpata ɖo vɔsakpe be èzòa nu. Ènumème vɔsa kèa nyi ènu ɖùɖu kè la fiɔ̃, la hũɛ gbligbli, ne bèa jè ŋùmè na Tɔhonɔ̀.

¹⁰Ne ènumème vɔsaa nyi àlɛ̃, àlo ègbɔa, e la nyi àsu kè ŋuti èvuɛ̃ ɖekpe mu lè ò a;

¹¹wo la sò èhlò na èlãa, lè vɔsakpea be èvègo, lè Tɔhonɔ̀ be ŋùkɔ̀; e yomè a, hũbonɔwo, Arɔ̀n be èviawo la wu èhũa, trɔ do vɔsakpea;

¹²wo la flì èlãa; hũbonɔa la ɖo wo ku èta ku àmìa keŋu ɖo ànakè kè wo sɔ ɖo vɔsakpe be èzòa nua ji;

¹³Ènumème vɔsa kèa nyi ènu ɖùɖu kè la fiɔ̃, la hũɛ gbligbli, ne bèa jè ŋùmè na Tɔhonɔ̀.

¹⁴Ne e nyi xèvi be ènumème vɔsa ye wo jro la wɔ̀ na Tɔhonɔ̀a, woa sɔ peplelu, àlo àhɔ̃ne va;

¹⁵hũbonɔa la sɔ vɔsaa ɖo vɔsakpea ji; e la ɖè èta na èlãa, eye be la sɔ ɛ̀ ɖo vɔsakpe be èzòa nu; e la hlɛ̃ èhũa ɖo vɔsakpea ŋuti.

¹⁶Wo la ɖè xèvia be èkoa ku ènu kè lè e mèa, sɔ dãŋùgbe ɖo vɔsakpea be àxàdamè, lè èwèzɛ̃pe, lè àfi kè wo kɔ̀ àmì be àfia ɖoa.

¹⁷E yomè a, wo la fɛ̃ xèvia be àxàdawo mè, vɔ̀a, wo mu la flì ì ò; hũbonɔa la sɔ ɛ̀ ɖo èzòa nu, lè ànakè kèwo lè vɔsakpea jia ji.'”