Read gen Levìwo 11 Bible Online

Levìwo 11 - gen bible

Levìwo 11

¹Tɔhonɔ̀ pò nupo na Mosè ku Arɔ̀n, eye be gblɔ̃ na wo be:

²“Mì to na Izràɛlviwo be[17]: “Lè ànyigbã ji be èlãwo keŋu dòmèa, ekèwo mì la teŋu ɖùawo ye nyi ekèa:

³Èlã kèwo be fèsu mè fɛ̃, eye wo gbìgbɔ̀ ɖùnà ènu kè wo mìa, mì teŋu ɖù wo.

⁴Gãkea, lè èlã kèwo gbìgbɔ̀ ɖùnà ènu kè wo mìa, eye wo ɖo fèsua dòmèa, mì mu ɖo la ɖù ekèwo be nyikɔwo gbãnàa ò: èkpovè-sɔ, ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.

⁵Èkpetomè be èxɔ̀[18], ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.

⁶Àzũi, ɖoa, e gbìgbɔ̀ ɖùnà ènu kè be mìa, vɔ̀a, mu ɖo fèsu ò. Mì kpɔ ɛ̀ be e lè màkɔ̀ màkɔ.

⁷Èhã, ɖoa, e ɖo fèsu kè mè fɛ̃ ɖo èvèa, vɔ̀a, mu gbìgbɔ̀ ɖùnà ènu kè be mìa ò. Mì kpɔ ɛ̀ be e lè màkɔ̀ màkɔ.

⁸Mì mu la ɖù woabe èlã ò, eye mì mu la tɔ àsi woabe kuku ŋutɔ cã ŋuti ò. Mì kpɔ wo be wo lè màkɔ̀ màkɔ.

⁹Lè èlã kèwo ye lè ètɔ̀ mèawo dòmèa, ekèwo mì teŋu ɖùawo ye nyi ekèa: èlã ɖekpekpe kè so àpù mè, àlo, ètɔ̀ mè, kè ɖo àwà ku ècroa, mì teŋu ɖù wo.

¹⁰Vɔ̀a, mì mu la ɖù ekèwo kpata mu ɖo àwà, àlo, ècro, ku ètɔ̀mè be èlãklìviwo ku èlã, àlo, ènu àgbè àgbè kèwo keŋu lè èsì mè, lè ètɔ̀ mè, àlo, lè àpù mèawo ò. Wo nyi èkɔ̀ na mì.

¹¹Eye, e nyi èse na mì be mì mu la ɖù wo ò; mì mu la ɖù woabe èlã ò, eye mì mu la tɔ àsi woabe kuku ò:

¹²ètɔ̀mèlã ɖekpekpe kè mu ɖo àwà, àlo, ècro ò a nyi èkɔ̀ na mì.

¹³Lè xèviwo dòmèa, ekèwo nyi èkɔ̀ na mìawo ye nyi ekèwo be nyikɔwo gbãnàa: mì mu la ɖù wo ò: èhɔ̃, àklàsu, àpùmè-hɔ̃,

¹⁴àvàkò be hati vòvòvòwo,

¹⁵àkpàfiɔ̃ ku yebe hati vòvòvòwo,

¹⁶tatabòli, fãvihũto, àpùmè-hɔ̃ne, àmlãkoe be hati vòvòvòwo,

¹⁷àzexe, àpù-kpakpa, fãvihũto-vi,

¹⁸àxomè-zexe, èzã-mlãkoe, àklàsu,

¹⁹èglò ku èglò be hati vòvòvòwo, àgùtɔ, àwàwàvi.

²⁰Èlãklìvi ɖekpekpe kè to àwàda, vɔ̀a le zɔ̃ lè àfɔ̀ ènè jia, nyi èkɔ̀ na mì.

²¹Gãkea, lè èlãklìvi kèwo to àwàda, vɔ̀a, zɔ̃nà lè ànyigbãawo dòmèa, ekèwo mì teŋu ɖùawo ye nyi ekèa: woawo ye nyi ekèwo gbà ɖo àta, kpe ɖo àfɔ̀awo ŋuti, ne woa sɔ nɔ tìkpo, lè ànyigbã pupui jia.

²²Ekèwo mì gbà teŋu ɖùawo ye nyi: èbɔ̀ be hati vòvòvòwo, tìkpotìkpowo ku woa hatiwo, kpe ɖo hùesuviwo ŋuti.

²³Vɔ̀a, èlãklìvi ɖekpekpe kè ɖo àwàda, sɔ zrònà, eye àfɔ̀ ènè kpò ye lè e sia, nyi èkɔ̀ na mì.”

²⁴Sɔ kpe èa, èlã ŋuawo keŋu nana be mìa ŋuti mu kɔ̀nà ò. Àmè ɖekpekpe kè tɔ àsi woabe kukua la nɔ̀ màkɔ̀ màkɔ, kaka na fìɛ̃si mè.

²⁵Àmè ɖekpekpe kè kɔkɔ woabe kukua la nɔ̀ màkɔ̀ màkɔ, kaka na fìɛ̃si.

²⁶Èlã kèwo keŋu be fèsu mè mu fɛ̃ ò, àlo, kèwo mu gbìgbɔ̀ ɖùnà ènu kè wo mìa ò a, mìa kpɔ wo be wo lè màkɔ̀ màkɔ. Àmè ɖekpekpe kè tɔ àsi woa ŋutia la nɔ̀ màkɔ̀ màkɔ.

²⁷Nène a kea, èlã kèwo kpata ɖo àfɔ̀ ènè, eye wo zɔ̃nà lè àfɔ̀xòmè jiawo keŋu ŋuti mu kɔ̀ na mì ò. Àmè ɖekpekpe kè tɔ àsi woabe kuku ŋutia, la nɔ̀ màkɔ̀ màkɔ, kaka na fìɛ̃si mè,

²⁸eye àmè ɖekpekpe kè kɔkɔ woabe kukua ɖo la nyà yebe àwùwo, eye be la nɔ̀ màkɔ̀ màkɔ, kaka na fìɛ̃si mè, ɖo wo lè màkɔ̀ màkɔ na mì.

²⁹Lè èlã wliwli kèwo ye le ta lè ànyigbã jiawo dòmèa, ekèwo lè màkɔ̀ màkɔ na mìawo ye nyi: àdɔ̀, àfĩ, àdòŋùglo gã vòvòvòwo,

³⁰hɔ̃miyàtre, àdòŋùglo, àdibòlò, ève ku àgàmà.

³¹Ekèawo ye nyi èlã wliwli kèwo tana lè ànyigbã jiawo dòmètɔ kèwo lè màkɔ̀ màkɔ na mìawo. Àmè ɖekpekpe kè tɔ àsi woabe kukua la nɔ̀ màkɔ̀ màkɔ kaka na fìɛ̃si mè.

³²Ne èlã vi kèawo dòmètɔ ɖe ku, eye be gɛ̃ jè ènu ɖe jia, ènu kèa la nɔ̀ màkɔ̀ màkɔ; ne e nyi ènu ɖùɖu be ènuzãzã kè wo sɔ àti wɔ̀, àlo, àwù, àgbàze, àlo, kpɛtɛa, ne e gbe nyi ènu ɖùɖu wɔ̀nu kè wo zãna na ènu ɖekpe kpòa, wo la sɔ èsì klɔ ɛ̀, vɔ̀a, e la nɔ̀ màkɔ̀ màkɔ kaka na fìɛ̃si mè.

³³Ne èlã vi kèa gɛ̃ jè àgbã ɖekpekpe kè nyi èkɔgbãa mèa, ènu kè kpata lè àgbãa mèa trɔ màkɔ̀ màkɔ, eye mì la gbã àgbã ŋua.

³⁴Ne èsì kèa kɔ̀ ɖo ènu ɖùɖu jia, ènu ɖùɖua la trɔ màkɔ̀ màkɔ, eye ne èsì bu, àlo ènunùnu mè be kɔ̀ ɖoa, ènu ɖekpekpe kè mè be lèa mèa, e la trɔ màkɔ̀ màkɔ.

³⁵Ne èlã vi kèawo dòmètɔ ɖe be kuku gɛ̃ jè ènu ɖe jia, ènua la trɔ màkɔ̀ màkɔ, ne ènua nyi àɖàdòkpo, àlo, ègà-dòkpoa, mì la kãkã wo, ɖoa wo trɔ màkɔ̀ màkɔ, eye mì la kpɔ wo ɖo màkɔ̀ màkɔ nu.

³⁶Vɔ̀a, ne vudo, àlo, èsìdo mè ye èlã via jè a, èsì kè lè e mèa kpata la nɔ̀ kɔ̀kɔ̀ɛ, gãkea, àmè kè tɔ àlɔ̀ èlã kukua ŋutia la nɔ̀ màkɔ̀ màkɔ.

³⁷Ne èlãviawo dòmètɔ ɖe be kuku gɛ̃ jè èlù, àlo, èbli kè wo la yì do jia, èbli, àlo, èlùa la nɔ̀ màkɔ̀ màkɔ.

³⁸Eye, ne wo kɔ̀ èsì ɖo èbli àlo, èlù ji, ne woa ɖù, gbɔ̀xue èlãviawo dòmètɔ ɖe be kuku gɛ̃ jè e mèa, èbli, àlo, èlùa la nɔ̀ màkɔ̀ màkɔ.

³⁹Ne mìabe èlã ɖe kè mì ɖùnàa kua, ne àmè ɖe tɔ àsi yebe kukua, àmèa la nɔ̀ màkɔ̀ màkɔ kaka na fìɛ̃si mè.

⁴⁰Ne àmè ɖe ɖù èlã ŋua, àmèa la nɔ̀ màkɔ̀ màkɔ, kaka na fìɛ̃si mè.

⁴¹Èlãvi kèwo kpata tana lè ànyigbãa nyi èkɔ̀ na mì. Wo mu la ɖù wo ò.

⁴²Èlãvi kèwo kpata tana lè ànyigbãa, ne wo tana lè pòdo ji, àlo, zɔ̃nà lè àfɔ̀ ènè ji, àlo, zɔ̃nà ɖo èbua, mì mu la ɖù wo ò, ɖoa, wo nyi èkɔ̀ na mì.

⁴³Mì mu gbà tɔ àsi woa ŋuti, àlo, la ɖù wo, àlo, la na, ne woa tɔ mìa ŋuti, ne mìa va nɔ̀ màkɔ̀ màkɔ ò.

⁴⁴Ènyè ye nyi Tɔhonɔ̀, mìabe Mawu. Mì la kɔ̀ mìa ɖokoewo ŋuti, ne mìa nɔ̀ kɔ̀kɔ̀ɛ, ɖoa, nyè ŋutɔ mù lè kɔ̀kɔ̀ɛ. Mì mu gbà gble mìa ɖokoe ku èlãvi kèwo tana lè ànyigbã kèa ji, ne mì mu gbà nɔ̀ kɔ̀kɔ̀ɛ ò.

⁴⁵Ènyè Tɔhonɔ̀ ye kplɔ̀ mì to jo lè Ejiptè-nyigbã ji, ne ma nyi mìabe Mawu. Ekèa ŋuti, mì ɖo la nɔ̀ kɔ̀kɔ̀ɛ, ɖoa, nyè ŋutɔ, mù lè kɔ̀kɔ̀ɛ[19].”

⁴⁶Ekèawo ye nyi èse kèwo kù ɖo èlã, xèvi ku ènu àgbè àgbè kèwo keŋu hùãnà lè èsì mè, zɔ̃nà lè ànyigbã jia ŋuti.

⁴⁷Èse kèawo la na be mìa jèsi èlã kèwo ŋuti kɔ̀a, lè kèwo ŋuti mu kɔ̀ ò a gbɔ, ne mìa nya ekèwo mì la ɖùa, lè ekèwo mì mu la ɖù ò a gbɔ.