Read gen Levìwo 13 Bible Online

Levìwo 13 - gen bible

Levìwo 13

²“Ne ènu tɛ̃ àgbàze mè na àmè ɖe, ènu ɖe kɔ̀ ɖo e ŋuti, sìgbè èjì nène, eye yebe àgbàzea le dàzò, eye be va àgbàze mè be èdɔ̀ kè lè sìgbè èkpò-dɔ nènea, woa kplɔ̀ àmèa va hũbonɔ Arɔ̀n gbɔ, àlo, yebe ŋusùvi, hũbonɔ ɖe gbɔ.

³Hũbonɔa la le ŋùkuvi ɖo àgbàze mè-dɔ̀lelea ŋuti. Ne èfu kè lè àfi kè èdɔ̀lelea lèa trɔ ɣe, eye be do àbì àgbàzea ŋutia, eŋuã èkpò-dɔ̀lele xòmèvi be nyi; ne hũbonɔa kpɔ àmèa vɔ̀a, e la gblɔ̃ be àmèa ŋuti mu kɔ̀ ò.

⁴Ne àgbàzea be àfi kè le dàzòa ɣe, vɔ̀a mu wɔ̀ àbì ò, eye èfu kèwo lè funuawo cã mu ɣe ò a, eŋuã, hũbonɔa la ɖè dɔ̀nɔ̀a ɖovò, ŋùkèkè adrɛ̃.

⁵Ŋùkèkè adrɛ̃gɔ̃ a gbèa, hũbonɔa la gbà le ŋùku ɖo èdɔ̀nɔ̀a ŋuti ke: ne èdɔ̀lelea be nɔ̀nɔmè mu trɔ ò, eye tèpea lè àgbàzea ji mu kèkè ɖo e ji kpe è, lè ŋùkèkè adrɛ̃gɔ̃ a gbè ò a, hũbonɔa la gbà sɔ èdɔ̀nɔ̀a ɖovò, ŋùkèkè adrɛ̃ bu.

⁶Ŋùkèkè adrɛ̃gɔ̃ a gbèa, hũbonɔa la gbà le ŋùkuvi ɖo èdɔ̀nɔ̀a ŋuti ke: ne tèpe kè èdɔ̀lelea lèa pu, eye mu kèkè ɖo àgbàzea ji kpe è ò a, eŋuã, hũbonɔa la gblɔ̃ be àmèa be ŋuti kɔ̀: èjì kpò be nyi. Àmèa la nyà yebe àwùwo, ɖoa yebe ŋuti kɔ̀.

⁷Gãkea, ne wàlɛbɛ kè hũbonɔa kpɔ àmèa vɔ̀, ne bèa gblɔ̃ be yebe ŋuti kɔ̀a, èjìa gbà le kèkè lè àgbàzea jia, àmèa la gbà na hũbonɔa la gbà kpɔ ɛ̀ ke.

⁸Hũbonɔa la gbà le ŋùkuvi ɖo àmèa ŋuti ke: kè e nyi be èjìa gbà kèkè ɖo àgbàzea ji kpe èa, hũbonɔa la gblɔ̃ be àmèa be ŋuti mu kɔ̀ ò: àgbàze mè be èdɔ̀lele veve ɖe[21] ye be nyi.

⁹“Ne ènu tɛ̃ àgbàze mè na àmè ɖe, eye be lè sìgbè èkpò be èdɔ̀lele nènea, wo la kplɔ̀ ɛ̀ va hũbonɔa gbɔ.

¹⁰Hũbonɔa la le ŋùkuvi ɖo e ŋuti: ne àgbàzea ɣe, be wɔ̀ àbì, trɔ èfua zũ ɣe, eye èlãa le ze lè e mèa,

¹¹eŋuã èkpò-dɔ̀lele sɛ̃ŋu ɖe ye be nyi, lè àgbàze mè na àmèa. Hũbonɔa la ɖè è gblɔ̃ be àmèa be ŋuti mu kɔ̀ ò. Mu la xà la gbà ɖè è ɖo àkpa ɖèka ŋutɔ cã ò, ɖoa e ze be àmèa ŋuti mu kɔ̀ ò.

¹²Vɔ̀a, ne èkpò-dɔ kèa va le wɔ̀ ènusɛ̃sɛ̃, kè xɔ̀ àmèa be ŋuti kpata, so èta, kaka va kɔ̀ ɖo àfɔ̀ gɔ̃mè, sìgbè lekè hũbonɔa kpɔ ɛ̀a, nènea,

¹³hũbonɔa la gbà le ŋùkuvi ɖo e ŋuti: kè èkpòa xɔ̀ àmèa be ŋuti keŋuã, hũbonɔa la gblɔ̃ be àmèa be ŋuti kɔ̀, ɖoa, àmèa be ŋuti kpata trɔ ɣe, eŋuã, yebe ŋuti kɔ̀.

¹⁴Gãkea, ne wo gbe kpɔ àbì, lè yebe ŋutilãa mè kpòa, àmèa be ŋuti mu kɔ̀ ò.

¹⁵Hũbonɔa la gbà le ŋùkuvi ɖo yebe ŋutilã ŋuti nènea, ku àbì a, nyuɛ̃ ɖe, eye be la gblɔ̃ be yebe ŋutilã ku àbì a mu kɔ̀ ò, ɖoa, èkpò-dɔ ye lè e ŋuti.

¹⁶Àlo, ne fikè àbì a lè gbà trɔ ɣe kea, èdɔ̀nɔ̀a la gbà yì kpɔ hũbonɔa ke.

¹⁷Hũbonɔa la le ŋùkuvi ɖo àmèa ŋuti; ekè àfi kè èdɔ̀lelea lèa trɔ ɣea, hũbonɔa la gblɔ̃ be èdɔ̀lelea kɔ̀, eŋuã, àmèa ŋuti kɔ̀.

¹⁸Ne ènu tɛ̃ àgbàze mè na àmè ɖe, eye ènutɛ̃tɛ̃a ku,

¹⁹gãkea, lè e tèpea, àbì ɣe ɖe ze, àlo, ènu ɣe bu kè ji la bìaa, àmèa la na hũbonɔa la le ŋùkuvi ɖo e ŋuti nyuɛ̃ ɖe.

²⁰Ne hũbonɔa kpɔ be ènu kè wɔ̀ ɖo àgbàze mè na ɛ̀a le kù èdo ɖo àgbàzea mè, eye, be le trɔ ɣea, hũbonɔa la gblɔ̃ be àmèa ŋuti mu kɔ̀ ò: èdɔ̀lele ɖe kè lè sìgbè èkpò-dɔ nènea ye le to ɖo ènutɛ̃tɛ̃a mè.

²¹Vɔ̀a, ne wàlɛbɛ kè hũbonɔa kpɔ ɛ̀a, èfu ɣe ɖekpe mu lè ò, mu ɖè èdo ɖekpe ɖo àgbàzea mè ò, eye be lè vĩa, hũbonɔa la ɖè àmèa ɖo vò, ŋùkèkè adrɛ̃.

²²Ne tèpea kèkè ɖo àgbàzea jia, hũbonɔa la gblɔ̃ be àmèa ŋuti mu kɔ̀ ò, ɖoa èdɔ̀lele ye lè e ŋuti.

²³Gãkea, ne tèpe kè le dàzò lè àgbàzea jia mu gbà kèkè kpe è ò a, ènutɛ̃tɛ̃a be àbìkpa ye be nyi; hũbonɔa la gblɔ̃ be àmèa ŋuti kɔ̀.

²⁴Ne èzò mè àgbàze ŋuti na àmè ɖe, eye èzòbia mè va ze ɣe, le dàzò, vɔ̀a le bìa, àlo le ɣea,

²⁵hũbonɔa la kpɔ àmèa nyuɛ̃ ɖe: ne èfua trɔ ɣe, lè àfi kè le dàzòa, eye àfi kè le dàzòa wɔ̀ sìgbè e le kù èdo ɖo àgbàzea mè nènea, èkpò-dɔ ye le wɔ̀ ènutɛ̃tɛ̃ ɖo èzò-bia mè; hũbonɔa la gblɔ̃ be àmèa ŋuti mu kɔ̀ ò. Ɖoa, èkpò-dɔ be hati ye àmèa le le.

²⁶Vɔ̀a, ne hũbonɔa kpɔ àmèa, eye èfu ɣe mu lè tèpea ò, tèpea mu kù èdo ò, eye tèpea lè vĩa, hũbonɔa la ɖè àmèa ɖovò, ŋùkèkè adrɛ̃;

²⁷Ŋùkèkè adrɛ̃gɔ̃ a gbèa, hũbonɔa la gbà kpɔ àmèa ke; ne tèpea gbà kèkè ɖo e ji kpe è, lè àgbàzea jia, hũbonɔa la gblɔ̃ be àmèa ŋuti mu kɔ̀ ò. Yebe èdɔ̀lelea nyi èkpò-dɔ hati ɖe.

²⁸Gãkea, ne àfi kè le dàzòa ci lekè be lè sã, eye mu kèkè ɖo e ji kpe è, lè àgbàzea ji ò a, eŋuã èzò-bia be tèpea ye tɛ̃. Hũbonɔa la gblɔ̃ be yebe ŋuti kɔ̀. Èzò-bia be àbìkpa ye.

²⁹Ne àgbàze mè be èdɔ̀lele ɖe ze, lè mìa dòmètɔ ɖe, ŋusù àlo nyɔ̃nù ŋuti, lè èta àlo àglãa,

³⁰hũbonɔa la le ŋùkuvi ɖo èdɔ̀lelea ŋuti: ne e wɔ̀ sìgbè e kù èdo ɖo àgbàzea mè nène, eye èfu kè bìa viɖea mè kãkã ɖo e mèa, hũbonɔa la gblɔ̃ be àmèa ŋuti mu kɔ̀ ò; àbaɖà ye wɔ̀ ɛ̀, e nyi àgbàze mè be èdɔ̀lele kè wɔ̀nà èta mè ku ègɛ̃ mèa.

³¹Vɔ̀a, ne hũbonɔa le ŋùkuvi ɖo àbaɖà a ŋuti, eye mu kù èdo ɖo àgbàzea mè ò, ne èfu mu nyrɔ̃ ŋutɔ cã lè e mè ò a, hũbonɔa la ɖè àmè kè àbaɖà wɔ̀a ɖovò, ŋùkèkè adrɛ̃.

³²Ŋùkèkè adrɛ̃gɔ̃ a gbèa, hũbonɔa la gbà le ŋùku ɖo àbaɖà a ŋuti: ne àbaɖà a mu gbà kèkè ɖo e ji kpe è ò, ne èfu jɛ̃ mu lè e mè ò, eye ne mu wɔ̀ sìgbè e kù èdo ɖo àgbàzea mè nène ò a,

³³àmèa la plɔ èta, vɔ̀a, mu la plɔ àbaɖà a ji ò; ekèa yomè a, hũbonɔa la gbà ɖè àmèa ɖovò, ŋùkèkè adrɛ̃ ke.

³⁴Ŋùkèkè adrɛ̃gɔ̃ a gbèa, hũbonɔa la le ŋùku ɖo àbaɖà a ŋuti nyuɛ̃ ɖe ke: ne àbaɖà a mu kèkè ɖo e ji kpe è, lè àgbàzea ji ò, eye mu ji la kù èdo ɖo àgbàzea mè ò a, hũbonɔa la gblɔ̃ be àmèa ŋuti kɔ̀. Ne àmèa nyà yebe àwùwo vɔ̀a, yebe ŋuti la kɔ̀.

³⁵Vɔ̀a, ne hũbonɔa gblɔ̃ be àmèa be ŋuti kɔ̀ vɔ̀, gãkea, àbaɖà a gbà le kèkè ɖo e jia,

³⁶hũbonɔa la gbà le ŋùkuvi ɖo e ŋuti ke: ekè e nyi be àbaɖà a gbà le kèkè ɖo àgbàzea jia, hũbonɔa mu la gbà ji èfu jɛ̃ ke ò: àmèa ŋuti mu kɔ̀ ò.

³⁷Vɔ̀a, ne àbaɖà a ci nènea, eye èfu yìbɔ to ɖo e mèa, eŋuã àbaɖà a ku, eye àmèa ŋuti kɔ̀. Hũbonɔa la gblɔ̃ be yebe ŋuti kɔ̀.

³⁸Ne ènu ɣe ɖe kè le dàzò, to ɖo àgbàze mè na ŋusù ɖe, àlo nyɔ̃nù ɖe a,

³⁹hũbonɔa la le ŋùkuvi ɖo èdɔ̀lelea ŋuti: ne ènu kè to ɖo àgbàzea mèa ɣe, vɔ̀a mu klɛ̃ ò a, àflibata ye to ɖo àgbàzea mè. Àmèa be ŋuti kɔ̀.

⁴⁰Ne èɖà le vɔ̀ lè èta na ŋusù ɖe, eye èta plɔ na ɛ̀a, yebe ŋuti kɔ̀.

⁴¹Ne ŋùkɔ̀ ye èɖàa vɔ̀ lè, eye ŋùgonu plɔ na ɛ̀a, yebe ŋuti kɔ̀.

⁴²Vɔ̀a ne, lè èta kè plɔa ji, àlo lè yebe ŋùgo nua, ènu ɣe ɖe kè bìa viɖea toa, èkpò-dɔ ye le to ɖo ètaa ji, àlo ɖo ŋùgoa nu.

⁴³Hũbonɔa la le ŋùkuvi ɖo èdɔ̀lelea ŋuti nyuɛ̃ ɖe, eye ne àfi kè àgbàzea ŋlɔ̃ lèa ɣe, vɔ̀a bìa ɖo e mè, lè ètaa ji, àlo, lè ŋùgo nua, eye be ɖì àgbàze mè be èkpò-dɔa,

⁴⁴eŋuã, èkpònɔ̀ ye àmèa nyi. Yebe ŋuti mu kɔ̀ ò. Hũbonɔa la gblɔ̃ be yebe ŋuti mu kɔ̀ ò. Èdɔ̀lelea lè èta ŋuti na ɛ̀.

⁴⁵Leke be èkpònɔ̀a ɖo la zɛ̃ àwù lè èkɔ̀[22], la kã èɖà ɖo èta, la cɔ̃ ènu ègɛ̃, eye be la nɔ do àpa be: “Ŋuti nyè mu kɔ̀ ò lòo, ŋuti nyè mu kɔ̀ ò!”

⁴⁶Àmèa ŋuti mu la kɔ̀, kaka kè èdɔ̀lelea lè e ŋuti ò. Ekèa ŋuti, e la to lè àsàɖaa mè, la yì ci àsàɖaa godo.”

⁴⁷Ne àwù jè fufua, ne e àlɛ̃-fu, àlo, àlɛ̃ŋudà wo sɔ wɔ̀ àwùa,

⁴⁸ne e nyi àvɔ lɔ̃lɔ̃ be gɔ̃mè-wui, àlo, àlɛ̃ŋudà, àlɛ̃-fu, àgbàze, àlo àvɔ kè ŋùku mè wo sɔ tɔ̃ àwùa,

⁴⁹ne fufua be tèpea trɔ àmàmu, àlo jɛ̃, lè àwùa ji, àlo lè àvɔ lɔ̃lɔ̃ be gɔ̃mè-wùa ji, àlo ènu ɖekpekpe kè ji be jè a, eŋuã, àvɔ mè be èkpò-dɔ ye be nyi. Hũbonɔa la le ŋùkuvi ɖo e ŋuti.

⁵⁰Hũbonɔa la le ŋùkuvi ɖo fufua ŋuti, eye be la ɖè àwùa ɖovò, ŋùkèkè adrɛ̃,

⁵¹ŋùkèkè adrɛ̃gɔ̃ a gbèa, hũbonɔa la gbà le ŋùkuvi ɖo tèpea ŋuti nyuɛ̃ ɖe: ne tèpea gbà kèkè ɖo e ji kpe è lè àwùa ji, lè àvɔa ji, lè àvɔ lɔ̃lɔ̃ be gɔ̃mè-wuia ji, lè àgbàzea ji, lè ènu ɖekpe kè ji be to ɖoa, fufu ye, àvɔ àlo àgbàzea ŋuti mu kɔ̀ ò.

⁵²Ekèa ŋutia, wo la tɔzò àwù, àvɔ, àgbàze, àlo, ènu ɖekpekpe kè ji be mìɔ̃ ɖoa. Kè e nyi be fufu kèa nyi àvɔ mè be èkpò-dɔa, wo la tɔzò ènu kè mè be lèa.

⁵³Gãkea, ne hũbonɔa le ŋùkuvi ɖo ènua ŋuti, eye mu gbà kèkè ɖo e ji kpe è, lè àwùa ji, lè àvɔa mè, àlo lè àgbàzea ji ò a,

⁵⁴hũbonɔa la ɖè ègbè be wo ne nyà ènu kè ŋuti fufua lèa, eye be la gbà ɖè è ɖovò ŋùkèkè àdɛ̃.

⁵⁵Hũbonɔa la gbà le ŋùkuvi ɖo e ŋuti ke, ne wo nyà ɛ̀ vɔ̀a. Ne fufua mu trɔ nɔ̀nɔ mè ò a, ne mu kèkè ɖo e ji kpe è ò, ŋutɔ cã a, enua ŋuti mu kɔ̀ ò. Wò la tɔ ɛ̀ èzò, ne e nyi ŋùkɔ̀, àlo, ŋùgbe ye fufua lè na ɛ̀ ŋutɔ cã a.

⁵⁶Vɔ̀a, ne kè hũbonɔa le ŋùkuvi ɖo e ŋutia, tèpea wɔ̀ vĩ, kè wo nyà ɛ̀ vɔ̀a, e la ɖè è jo lè àwù, àvɔ, àlo, àgbàzea ŋuti.

⁵⁷Vɔ̀a, ne ènu ɖe gbà to ɖo àwùa mè, àvɔa mè, àgbàze, àlo ènu ɖekpekpe kè ŋuti hũbonɔa le ŋùkuvi ɖo sãa jia, fufu àlo, àvɔ mè be èkpò-dɔ ye be nyi, le mìɔ̃ ɖo e ji. Wò la tɔzò ènu kè ji fufua mìɔ̃ ɖoa.

⁵⁸Àwù, àvɔ, gɔ̃mè, wu àlo, àgbàze be ènu ɖekpe kè wo nyà, eye èɖi bu lè e jia, wo la gbìgbɔ̀ ɛ̀ nyà ke, eye yebe ŋuti la kɔ̀.”

⁵⁹Èse kèwo ye kplɔ̀ fufu, àlo, àvɔ mè be èkpò-dɔ kè to ɖo àlɛ̃-fu, àlo, àlɛ̃ŋudà be àwù ji, àlo, ɖo àvɔ ji, ɖo gɔ̃mè-wu àlo, ɖo àgbàze be ènu ɖekpekpe jia, ɖoɖo kèawo ye ji wo la zɔ̃ ɖo, la gblɔ̃ be yebe ŋuti kɔ̀ àlo, yebe ŋuti mu kɔ̀ ò.