Read gen Levìwo 14 Bible Online

Levìwo 14 - gen bible

Levìwo 14

²Èkɔ̀nu kè wo la nɔ wɔ̀ na èkpònɔ̀[23], gbè kè gbè wo la kɔ̀ e ŋutia ye nyi ekèa: ne wo kplɔ̀ ɛ̀ va hũbonɔa gbɔa,

³hũbonɔa la to lè àsàɖaa mè, la va le ŋùkuvi ɖo àmè kè le le èkpò-dɔa ŋuti, lè àsàɖaa godo, la sɔ kpɔ be èdɔ̀a vɔ̀ na ɛ̀ màa.

⁴Hũbonɔa la ɖè ègbè be wo ne sɔ xèvi àgbè àgbè èvè kèwo ŋuti kɔ̀a va, ɖo àmè kè ŋuti wo la kɔ̀a ta, woa sɔ sedàti, àvɔ jɛ̃ hɛ̀lì ku kpatima[24]

⁵Hũbonɔa la ɖè ègbè be wo ne sò èhlò na xèvi cucugbã tɔ̀a, lè èkɔgbã ɖè kè mè àgbè-si lèa, tamè.

⁶Hũbonɔa la le xèvi kè lè àgbèa, kpe ɖo sedàtia, àvɔ jɛ̃ hɛ̀lì ku kpatimaa ŋuti, e la sɔ wo nyrɔ̃ ɖo xèvi kè wo sò èhlò na, sɔ yebe èhũ kɔ̀ ɖo àgbè-si mèa be èhũ mè,

⁷hũbonɔa la sɔ wu èsìa ɖo àmè kè be ŋuti wo le kɔ̀, so èkpò-dɔ mèa ŋuti, zè adrɛ̃. E la gblɔ̃ be àmèa ŋuti kɔ̀, eye be la ɖè àsi lè xèvia ŋuti, be la zrò jo, tùtà àgblèa ji.

⁸E yomè a, àmè kè ŋuti wo le kɔ̀a la nyà yebe àwùwo, la plɔ yebe èfuwo keŋu, la lè èsì, eye yebe ŋuti la kɔ̀. E la trɔ yì àsàɖaa mè, gãkea, la wɔ̀ ŋùkèkè adrɛ̃, kè mu la ɖo yebe gòxɔ̀ mè ò a.

⁹Ŋùkèkè adrɛ̃gɔ̃ a gbèa, e la gbà plɔ èta, ŋùgazu, ègɛ̃ ku yebe èfuwo keŋu, e la gbà nyà yebe àwùwo, la lè èsì. Ekèa yomè a e ŋuti la kɔ̀.

¹⁰Ŋùkèkè ènyigɔ̃a gbèa, àmèa la le àlɛ̃vi èvè kèwo ŋuti èdɔ̀lele ɖekpe mu lè ò a, àlɛ̃-nɔvi ɖèka kè xɔ̀ èpè ɖèkaa, èwɔ meme, jijenu efà ɖèka be mamã èwogɔ̃a be tèpe ètɔ̃, wo la blù ì ku àmì, eye wo la sɔ àmì ègò ɖèka kpe ɖo e ŋuti, va savɔ.

¹¹Hũbonɔ kè le wɔ̀ èkɔ̀nua la sɔ àmè kè ŋuti wo le kɔ̀a ku yebe ènu nanaawo ɖo Tɔhonɔ̀ be ŋùmè, lè Ègòdodo be Gòxɔa mɔnu.

¹²Hũbonɔa la sɔ àlɛ̃-suvi kè wo la sɔ wɔ̀ èvuɛ̃ sɔsɔkè be èkɔ̀nua ku àmì-goa, la sɔ wɔ̀ èkɔ̀nua lè Tɔhonɔ̀ be ŋùkɔ̀.

¹³E la sò èhlò na àlɛ̃-suvia lè fikè wo wùnà èvuɛ̃ sɔsɔkè be vɔsa-lãwo ku ènumème vɔsa-lãwo lè, ekè nyi Tèpe Kɔ̀kɔ̀ɛa, ɖoa, èvuɛ̃ sɔsɔkè be vɔsa ku ènumème vɔsa keŋu nyi vɔsa kɔ̀kɔ̀ɛwo na Tɔhonɔ̀, ekèa ŋutia, hũbonɔa ye la xɔ̀ wo.

¹⁴Hũbonɔa la sɔ vɔsa-lãa be èhũ, sɔ ɖo ɖùsimè be ètoa ŋuti, ɖùsi-lɔ be dèglèfèsu ji, ku ɖùsi-fɔ be dèglèfèsu ji na àmè kè ŋuti wo lè kɔ̀a.

¹⁵Hũbonɔa la sɔ àmì-goa, la kù viɖe ɖo èmìɔ̃-lɔ mè;

¹⁶e la sɔ ɖùsimè be àlɔ̀vi èvègɔ̃a tɔ e mè, la sɔ wu, zè adrɛ̃, ɖo Tɔhonɔ̀ be ŋùkɔ̀.

¹⁷Hũbonɔa la sɔ àmì kè kpɔ̀tɔ̀a tɔ ɖùsimè be ètoa ŋuti na àmè kè ŋuti wo le kɔ̀a, la sɔ ɖo ɖùsi-lɔ be dèglèfèsu ji ku ɖùsi-fɔ be dèglèfèsu ji na ɛ̀, lè fikè be sɔ èhũa ɖo sãa.

¹⁸Àmì kè kpɔ̀tɔ̀a, e la sɔ kɔ̀ ɖo èta ji na àmè kè ŋuti wo le kɔ̀a, eye be la wɔ̀ sɔsɔkè be èkɔ̀nua ɖo àmèa ji, lè Tɔhonɔ̀ be ŋùkɔ̀.

¹⁹Hũbonɔa la wɔ̀ vɔsa ɖo èvuɛ̃wo ta, la wɔ̀ èvuɛ̃ sɔsɔkè be èkɔ̀nua na àmè kè ŋuti wo le kɔ̀a. E yomè a, e la sò èhlò na ènumème vɔsa be èlãa.

²⁰E la tɔ ɛ̀ èzò keŋu-keŋu ku èwɔ be ènu nana a, lè vɔsakpea ji. Eye hũbonɔa la wɔ̀ èvuɛ̃ sɔsɔkè be èkɔ̀nua na àmèa. E yomè a, yebe ŋuti la kɔ̀.”

²¹“Ne àmè kè jè èkpòa nyi wɔ̀amènɔ̀ kaka be mu la teŋu kpɔ ènu kèawo keŋu ò a, e la sɔ àlɛ̃vi ɖèka, ne bèa sɔ ɖo Tɔhonɔ̀ be ŋùkɔ̀, ne woa wɔ̀ èvuɛ̃ sɔsɔkè be èkɔ̀nua na ɛ̀; e la sɔ èwɔ meme, efà be jijenu be mamã èwogɔ̃a ɖèka, la blù ì ku àmì, na vɔsaa, e la sɔ àmì ègò ɖèka,

²²e la sɔ àhɔ̃ne èvè, àlo, peplelu èvè, ekè be la gbe kpɔ lè woa dòmè kpòa; wo la sɔ ɖèka savɔ ɖo èvuɛ̃ ta, eye wo la sɔ èvègɔ̃a wɔ̀ ènumème vɔsa.

²³Ŋùkèkè ènyigɔ̃a gbèa, e la sɔ wo va na hũbonɔa, lè Ègòdodo be gòxɔa mɔnu, ne woa sɔ wɔ̀ ŋutikɔ̀kɔ be èkɔ̀nua na ɛ̀, lè Tɔhonɔ̀ be ŋùmè.

²⁴Hũbonɔa la sɔ ènujràɖo be àlɛ̃via ku àmì-goa, eye be la sɔ wo wɔ̀ èkɔ̀nu, ɖo Tɔhonɔ̀ be ŋùmè.

²⁵E la sò èhlò na vɔsa-lãa, la sɔ yebe èhũ ɖo ɖùsimè be ètoa ŋuti na àmè kè ŋuti wo le kɔ̀a, la sɔ ɖo yebe ɖùsi-lɔ be dèglèfèsu ji, ku yebe ɖùsi-fɔ be dèglèfèsu ji.

²⁶E la kù àmì viɖe ɖo yebe èmìɔ̃-lɔ mè;

²⁷E la sɔ yebe ɖùsi-lɔ be àlɔ̀vi èvègɔ̃a tɔ àmì kè lè yebe èmìɔ̃-lɔ mèa mè, la sɔ wu, zè adrɛ̃, lè Tɔhonɔ̀ be ŋùkɔ̀.

²⁸E yomè a, hũbonɔa la sɔ àmì tɔ ɖùsimè be ètoa na àmè kè ŋuti wo le kɔ̀a, la gbà sɔ ɖo ɖùsi-lɔa be dèglèfèsu ji ku èmìɔ̃-fɔ be dèglèfèsu ji, lè àfi kèwo be sɔ ènujràɖo be vɔsa-lãa be èhũ ɖo na ɛ̀a.

²⁹Hũbonɔa la sɔ àmì kè kpɔ̀tɔ̀ lè àlɔ̀mè na ɛ̀a kɔ̀ ɖo èta ji na àmè kè ŋuti wo le kɔ̀a, eye be la wɔ̀ èvuɛ̃ sɔsɔkè be èkɔ̀nua na àmèa, lè Tɔhonɔ̀ be ŋùkɔ̀.

³⁰Hũbonɔa la sɔ àhɔ̃ne, àlo peplelu, ekè àmèa gbe hɛ̃ va kpòa, dòmètɔ ɖèka,

³¹e la sɔ xèvi kèwo àmèa hɛ̃ vaawo dòmètɔ ɖèka savɔ ɖo èvuɛ̃ ta, eye be la sɔ èvègɔ̃a wɔ̀ ènumème vɔsa kè la kpe ɖo èwɔ be ènu nana a ŋutia. E yomè a, hũbonɔa la wɔ̀ èvuɛ̃ sɔsɔkè be èkɔ̀nua na àmèa, lè Tɔhonɔ̀ be ŋùmè.”

³²Ekèawo ye nyi ɖoɖo kèwo ye lè na àmè kè le le èkpò-dɔ, eye mu la teŋu hɛ̃ ènu kèwo hiã na yebe ŋutikɔ̀kɔ be èkɔ̀nu va ò a.

³³Tɔhonɔ̀ gblɔ̃ na Mosè ku Arɔ̀n be:

³⁴“Ne mì va ɖo Kanàn-nyigbã kè mù sɔ le kè mì a ji a, ne mù sɔ èkpò-dɔ̀ be ènu ɖe ɖo àxue ɖe mè, lè ànyigbã kè la nyi mìa tɔ̀ a ji a,

³⁵àxuetɔa la yì gblɔ̃ na hũbonɔa be: 'E wɔ̀ na mù be ènu ɖe ɖè ɖo àxue nyè mè.'

³⁶Hũbonɔa la ɖè ègbè be àmè sia àmè ku ènu sia ènu ne to lè àxuea mè, gbɔ̀xue yèa va e mè, ne yèa le ŋùkuvi ɖo ènu kè ɖè ɖo àxuea mèa ŋuti. Ekèa la na be hũbonɔa mu la gblɔ̃ be ènu kèwo ye lè àxuea mèawo dòmètɔ ɖe ŋuti mu kɔ̀ ò. E yomè a, hũbonɔa la ɖo àxuea mè, ne bèa le ŋùkuvi ɖo àxuea ŋuti.

³⁷Hũbonɔa la le ŋùkuvi ɖo ènu kè ɖè ɖo àxuea mèa ŋuti: ne ènu kè lè èglìawo ŋutia kù èdo àmàmu, àlo, jɛ̃a, ne e wɔ̀ sìgbè e kù èdo ɖo èglìa mè nènea,

³⁸hũbonɔa la to lè àxuea mè, eye be la tu àxuea, ne àmè ɖe mu gbà ɖo e mè ò, ŋùkèkè adrɛ̃.

³⁹Ŋùkèkè adrɛ̃gɔ̃ a gbèa, hũbonɔa la trɔ va, la gbà le ŋùkuvi ɖo tèpea ŋuti ke: ne tèpea gbà lòlò ɖo e ji kpe è, lè èglìa mèa,

⁴⁰hũbonɔ la ɖè ègbè be wo ne ɖè èkpe kèwo ye lè àfi kè ènua lèa, ne woa sɔ wo to lè èdùa mè, yì dãŋùgbe ɖo tèpe kè lè màkɔ̀ màkɔa.

⁴¹E la na, woa kliko àxuea be èglìa ŋuti lè àdɔ̀mè keŋu-keŋu, ne woa lɔ èkɔa to lè èdùa mè, yì kɔ̀ ɖo tèpe kè lè màkɔ̀ màkɔa.

⁴²E yomè a, wo la sɔ èkpe buwo ɖɔ̀lì ekèwo wo ɖè joawo, eye wo la nyà ànyikɔ bu sɔ tre wo, la sɔ lìlì àfi kèwo wo klikoawo.

⁴³Ne ènu kè mìɔ̃ ɖo èblìa ŋutia gbà gbìgbɔ̀ tɔ mìɔ̃-mìɔ̃ lè àxuea mè, kè wo ɖè èkpeawo jo vɔ̀, eye wo kliko àxuea mè, gbìgbɔ̀ sɔ ànyikɔ lìlì ɖo e ŋutia,

⁴⁴hũbonɔa la gbà yì, la le ŋùkuvi ɖo e ŋuti: ne ènu kè to ɖo èglìa ŋutia gbà lòlò ɖo e ji kpe è, lè àxuea mèa, èkpò-dɔ kè wo mu la teŋu dà ò a ye be nyi. Àxuea ŋuti mu kɔ̀ ò.

⁴⁵Wo la gbã àxuea, la lɔ ènu kè gbe nyi èkpe, àti, ku àxuea be gbãgbã kpòa, to lè èdùa mè, sɔ yì kɔ̃ŋùgbe ɖo tèpe kè ŋuti mu kɔ̀ ò a.

⁴⁶Àmè kè gbe ɖo àxuea mè, wàlɛbɛ kè hũbonɔa tu ì kpòa, be ŋuti mu la kɔ̀, kaka na wètrɔ mè ò.

⁴⁷Àmè kè la mlɔ̃ àxuea mèa ɖo la nyà yebe àwùwo; àmè kè la ɖùnu lè àxuea mèa ɖo la nyà yebe àwùwo.

⁴⁸Vɔ̀a, ne gà kè mè hũbonɔa ɖo àxuea mè, le ŋùkuvi ɖo tèpea ŋuti, eye tèpea mu lòlò ɖo e ji, lè àxuea mè, kè wo gbìgbɔ̀ lìlì ànyikɔ ɖo e ŋuti ò a, hũbonɔa la gblɔ̃ be àxuea ŋuti kɔ̀, ɖoa, èdɔ̀a vɔ̀.

⁴⁹Ne hũbonɔa la kɔ̀ àxuea ŋutia, wo la sɔ xèvi èvè, sedàti, àvɔ jɛ̃ hɛ̀lì ku kpatima.

⁵⁰Hũbonɔa la sò èhlò na xèvi ɖèka, lè èkɔgbã ɖe kè mè àgbè-si lèa tamè.

⁵¹E la sɔ sedàtia, kpatimaa, àvɔ jɛ̃ hɛ̀lìa ku xèvi kè lè àgbèa; e la sɔ wo do xèvi kè wo wùa be èhũa mè, eye be la gbà sɔ wo nyrɔ̃ ɖo àgbè-sia mè. E la sɔ wu èsìa, zè adrɛ̃ ɖo àxuea ji.

⁵²Nène a ye hũbonɔa la wɔ̀, ku xèvi kè wo wùa be èhũ kudo àgbè-sia, gbàkudo xèvi àgbè àgbèa, sedàtia, kpatimaa gbàkudo àvɔ jɛ̃ hɛ̀lìa, la sɔ ɖè èvuɛ̃ jo lè àxuea ŋuti.

⁵³E la ɖè àsi lè xèvi àgbè àgbèa ŋuti, be la zrò jo, lè èdùa mè, tùtà àgblè ji. Hũbonɔa la wɔ̀ èvuɛ̃ sɔsɔkè be èkɔ̀nua ɖo àxuea ji. Nène a ye àxuea ŋuti la kɔ̀a yeŋu.”

⁵⁴Ekèawo ye nyi ɖoɖo kèwo lè èdɔ̀lele kèwo keŋu nyi èkpò-dɔ kè ye hatiwo, àbaɖà,

⁵⁵àwù mè be èkpò-dɔ, àlo àxue be èkpò-dɔ,

⁵⁶àgbàze mè be dudrũ, èjì ku àgbàze mè dàzò.

⁵⁷Ɖoɖo kèawo nana ènu kèwo wo la wɔ̀, ne àmè be ŋuti, àlo ènu ɖe ŋuti la kɔ̀, àlo, mu kɔ̀ ò a.