Read gen Levìwo 15 Bible Online

Levìwo 15 - gen bible

Levìwo 15

¹Tɔhonɔ̀ gblɔ̃ na Mosè ku Arɔ̀n be:

²“Mì gblɔ̃ na Izràɛlviwo be: Ne èdɔ̀lele na be èsì le kɔ̀ lè ŋusù ɖe ŋutia, èsì kèa la na be àmèa ŋuti mu la kɔ̀ ò.

³Ènu kè la na be èsì kè le to lè àmèa ŋutia la na be àmèa ŋuti mu la kɔ̀ ò a, ye nyi ekèa: ne èsì le kɔ̀ lè e ŋuti, àlo, ŋusù mè tɛ̃ na ɛ̀a:

⁴Àba ɖekpekpe kè ji àmè kè be ŋusù mè èsì le kɔ̀ lèa la mlɔ̃ a, la trɔ màkɔ̀ màkɔ. Ènu ɖekpekpe kè ji be la nɔ̀a, la trɔ màkɔ̀ màkɔ.

⁵Àmè ɖekpekpe kè la tɔ àsi àba a ŋutia la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

⁶Àmè kè nɔ̀ ènu kè ji, àmè kè ŋuti èsì le kɔ̀ lèa nɔ̀a, la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

⁷Àmè kè tɔ àsi àmè kè ŋuti èsì le kɔ̀ lèa la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

⁸Ne àmè kè ŋuti èsì le kɔ̀ lèa tu ètã ɖo àmè ɖe kè ŋuti kɔ̀a ŋutia, àmè kèa ɖo la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

⁹Èsɔ be àzìkpe ɖekpekpe kè ji àmè kè ŋuti èsì le kɔ̀ lèa nɔ̀, sɔ yì èmɔjia ŋuti mu kɔ̀ ò.

¹⁰Àmè ɖekpekpe kè tɔ àsi ènu ɖe kè nɔ̀ ŋusù kèa gɔ̃mèa, la nɔ̀ màkɔ̀ màkɔ kaka na wètrɔ mè. Àmè kè kɔkɔ leke be ènua la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

¹¹Àmè ɖekpekpe kè ŋusù kè ŋuti èsì le kɔ̀ lèa tɔ àsi, kè mu klɔ àsi gbɔ̀xue ò a, la nyà yebe àwùwo, la lè èsì, eye e la nɔ̀ màkɔ̀ màkɔ kaka na wètrɔ mè.

¹²Ne ŋusù kè ŋuti èdɔ̀ lèa tɔ àlɔ̀ èkɔ-gbã, àlo èkɔ-ze ɖe a, wo la gbã èkɔ-gbã, àlo, èkɔ-zea. Ne àti-gbã, àlo, àti-ze ŋuti be tɔ àlɔ̀ a, wo la klɔ àti-gbã, àlo, àti-zea.

¹³Ne èsì kè le kɔ̀ lè àmèa ŋutia nɔ̀tèa, àmèa la tɔtè ŋùkèkè adrɛ̃, la nyà yebe àwùwo, la lè èsì, eye yebe ŋuti la kɔ̀.

¹⁴Ŋùkèkè ènyigɔ̃a gbè, e la sɔ àhɔ̃ne èvè, àlo, peplelu èvè, eye be la yì Tɔhonɔ̀ be ŋùkɔ̀, lè Ègòdodo be gòxɔa mɔnu, e la sɔ wo na hũbonɔa.

¹⁵Hũbonɔa la sɔ ɖèka wɔ̀ èvuɛ̃ sɔsɔkè be èkɔ̀nu, eye be la sɔ èvègɔ̃a wɔ̀ ènumème vɔsa. E yomè a, hũbonɔa la wɔ̀ èvuɛ̃ sɔsɔkè be èkɔ̀nu na ɛ̀, lè Tɔhonɔ̀ be ŋùkɔ̀, ɖo èsì kè to lè e ŋutia ŋuti.

¹⁶Ne ŋusù ɖe na àfɔ̀a, e la lè yebe àmèti bliboa ɖì, eye e la nɔ̀ màkɔ̀ màkɔ, kaka na wètrɔ mè.

¹⁷Àwù ɖekpekpe, àlo àgbàze ɖekpekpe kè ji àfɔ̀naa la kɔ̀ ɖoa, wo ɖo la nyà ɛ̀, eye wo la nɔ̀ màkɔ̀ màkɔ, kaka na wètrɔ mè.

¹⁸Ne nyɔ̃nù ɖe dɔ̃ ku ŋusùa, wo àmè èvèawo la lè èsì, eye wo la nɔ̀ màkɔ̀ màkɔ, kaka na wètrɔ mè.”

¹⁹“Ne nyɔ̃nù le kpɔ wètri, eye èhũ le to lè e ŋutia, e ŋuti mu la kɔ̀ ò, kaka na ŋùkèkè adrɛ̃. Àmè ɖe kpekpe kè la tɔ àlɔ̀ e ŋutia mu la kɔ̀ ò, kaka na wètrɔ.

²⁰Ènu ɖekpekpe kè ji be la mlɔ̃, wàlɛbɛ kè be le kpɔ wètria, ŋuti mu la kɔ̀ ò, eye ènu ɖekpekpe kè ji be la nɔ̀a, ŋuti mu la kɔ̀ ò.

²¹Àmè ɖekpekpe kè la tɔ àsi yebe àbàti a la nyà yebe àwùwo, la lè èsì, eye e ŋuti mu la kɔ̀ ò, kaka na wètrɔ mè.

²²Àmè ɖekpekpe kè la tɔ àsi ènu kè ji be nɔ̀a, ɖo la nyà yebe àwùwo, la lè èsì, eye e ŋuti mu la kɔ̀ ò, kaka na wètrɔ mè.

²³Ne àmè ɖe tɔ àsi ènu ɖe kè lè yebe àbàti ji, àlo, kè lè ènu kè ji be nɔ̀a jia, àmèa ŋuti mu la kɔ̀, kaka na wètrɔ mè ò.

²⁴Ne, wàlɛbɛ kè ŋusù ɖe va dɔ̃ nyɔ̃nùa gbɔ, eye yebe àsi ɖo ànyi be èhũ to, kɔ̀ ɖo ŋusùa ŋutia, ŋusùa ŋuti mu la kɔ̀ ò, kaka na ŋùkèkè adrɛ̃. Àba ɖekpekpe kè ji ŋusùa la mlɔ̃ a la nɔ̀ màkɔ̀ màkɔ.

²⁵Ne èhũ le kɔ̀ lè nyɔ̃nù ɖe ŋuti, eye ŋùkèkèawo sùgbɔ wu nène kè be sɔ kpɔna wètria, nyɔ̃nùa ŋuti mu la kɔ̀, kaka kè èhũa gbà le toa ò. E la nɔ̀ màkɔ̀ màkɔ, sìgbè wàlɛbɛ kè be le kpɔ wètria ke nène.

²⁶Kaka kè èhũa gbà le toa, àba ɖekpekpe kè ji be la mlɔ̃ a, la gbà nɔ̀ sìgbè kè ji be mlɔ̃, wàlɛbɛ kè be le kpɔ wètria ke nène, eye ènu ɖekpekpe kè ji be la nɔ̀a, ŋuti mu la kɔ̀ ò, sìgbè wàlɛbɛ kè be le kpɔ wètria nène.

²⁷Àmè kè la tɔ àlɔ̀ àba a, àlo ènu kè ji be nɔ̀a, ɖo la nyà yebe àwùwo, la lè èsì, eye be la nɔ̀ màkɔ̀ màkɔ kaka na wètrɔ mè.

²⁸Ne èhũ kè le to lè e ŋutia nɔ̀tèa, e la hlɛ̃ ŋùkèkè adrɛ̃; e yomè a, e ŋuti la kɔ̀.

²⁹Ŋùkèkè ènyigɔ̃a gbèa, e la sɔ àhɔ̃ne èvè, àlo, peplelu èvè va na hũbonɔa, lè Ègòdodo be gɔ̀xɔa mɔnu.

³⁰Hũbonɔa la sɔ ɖèka savɔ ɖo èvuɛ̃ ta, eye be la sɔ èvègɔ̃a wɔ̀ ènumème vɔsa. Hũbonɔa la wɔ̀ èvuɛ̃ sɔsɔkè be èkɔ̀nua na ɛ̀, lè Tɔhonɔ̀ be ŋùkɔ̀, ɖo èhũ kè kɔ̀ lè e ŋuti, eye be na be ye ŋuti mu kɔ̀ ò a ta.

³¹Mì la gblɔ̃ na Izràɛlviwo be wo ne nɔ̀ àzɔ̀ge, wàlɛbɛ kè woa ŋuti mu kɔ̀ ò a, nènea, wo mu la ɖo mìa dòmè kè nyi àpe nɔ̀pea, ne woa dovlo è ku woabe màkɔ̀ màkɔa, ne woa va ku ò.”

³²Ekèawo ye nyi ɖoɖo kèwo kã ŋusù kè ŋuti èsì le kɔ̀ lè, eye be na be e lè màkɔ̀ màkɔa,

³³ku nyɔ̃nù kè le ɖo àsi ànyi, àlo, àmè kè ŋuti, èsì àlo, èhũ le to lèa, àlo, ŋusù kè dɔ̃ ku nyɔ̃nù kè ŋuti mu kɔ̀ ò a.