Read gen Levìwo 17 Bible Online

Levìwo 17 - gen bible

Levìwo 17

¹Izràɛl be kɔ̀kɔ̀ɛ nɔ̀nɔ Tɔhonɔ̀ gblɔ̃ na Mosè be:

²“Pò nupo na Arɔ̀n ku yebe ŋusùviwo, kudo Izràɛlviwo kpata, ne wòa gblɔ̃ na wo be: Ègbè kè Tɔhonɔ̀ ɖèa ye nyi ekèa:

³Ne ŋusù ɖe so Izràɛl be àxomè, wù ènyì, àlɛ̃, àlo ègbɔ, lè àsàɖaa mèa, àlo, ne e wù ì, lè àsàɖaa godo ŋutɔ cã a,

⁴eye mu sɔ ɛ̀ va Ègòdodo be gòxɔa mɔnu, ne bèa sɔ ɖo Tɔhonɔ̀ be ŋùkɔ̀, sɔ wɔ̀ ènu nana na Tɔhonɔ̀ ò a, àmèa la nɔ̀ èhũ kè be kɔ̀ ɖɛa nu, eye wo la crɔ̃ àmèa jo lè yebe àmèha a dòmè.

⁵Èse kèa la na be Izràɛlviwo mu la gbà nɔ wù èlã, la sɔ nɔ savɔ, lè àgblèji ke ò. Wo la nɔ sɔ vɔsa be èlãa va nɔ na hũbonɔa, lè Ègòdodo be gòxɔa mɔnu, ne woa sɔ wɔ̀ ŋuti fàfa be vɔsa na Tɔhonɔ̀.

⁶Hũbonɔa la sɔ èhũa wu ɖo Tɔhonɔ̀ be vɔsakpea ji, lè Ègòdodo be gòxɔa mɔnu, eye be la tɔzò àmìa, ne bèa hɔ̃ɛ gbligbli, la sɔ fa èjì na Tɔhonɔ̀.

⁷Nène a, Izràɛlviwo mu la gbà nɔ savɔ na legba kèwo ɖo gbɔgbɔɛ be nɔ̀nɔmè, kèwo wo wɔ̀nà àhasì, va yì sɛ̃nàa ke ò. Ekèa la nyi èse kòkòɖàbì na Izràɛlviwo.

⁸Wò la gblɔ̃ na wo be: Ne àmè ɖe nyi Izràɛlvi, àlo, àmèjro kèwo ye va lè Izràɛlviwo dòmèawo dòmètɔ ɖèka, le wɔ̀ ènumème vɔsa, àlo, e le wɔ̀ vɔsa bu,

⁹eye mu sɔ va Ègòdodo be gòxɔa mɔnu, ne bèa sɔ savɔ na Tɔhonɔ̀ ò a, wo la crɔ̃ àmè ŋua jo lè yebe xòmètɔwo dòmè.

¹⁰Ne ŋusù ɖe kè so Izràɛl be àxomè, àlo, so àmèjro kèwo va lè Izràɛlviwo dòmèawo dòmètɔ ɖèka ɖù èhũa, mù la trɔ kpãŋùkɔ̀ àmè kè ɖù èhũa, eye mù la crɔ̃ ɛ̀, jo lè yebe dùkɔ̃a dòmè,

¹¹ɖoa, ènu àgbè àgbè ɖekpekpe be àgbè lè yebe èhũ mè, eye nyè ya, mù sɔ àgbèa ɖo vɔsakpe ji na mì, ne mìabe àgbè be èvuɛ̃ sɔ kè. Ɛ̃ɛ, èhũ ye nana èvuɛ̃ sɔ kè, ɖoa èhũa, àgbè ye be nyi[26].

¹²Ekèa ŋuti mù gblɔ̃ na Izràɛlviwo be: “Mìa dòmètɔ ɖekpe mu la ɖù èhũ ò, eye àmèjro kèwo va lè mìa dòmèawo dòmètɔ ɖekpe mu la ɖù èhũ ò.”

¹³Ne àmè ɖe kè nyi Izràɛlvia, àlo àmèjro kèwo va lè Izràɛlviwo dòmèa dòmètɔ ɖe yì àdègbe, eye be le èlã ɖe, àlo xèvi ɖe kè wo ɖùnàa, e la sìɔ̃ yebe èhũa kɔ̃ŋùgbe, eye be la kù èkɔ kɔ̀ ɖo e ji.

¹⁴Kaka kè ènu àgbè àgbè ɖe gbe lè àgbè kpòa, yebe àgbèa lè yebe èhũ mè. Ekèa ŋuti ye mù gblɔ̃ na Izràɛlviwo be: “Mì mu la ɖù ènu àgbè àgbè ɖekpe be èhũ ò, ɖoa, ènu àgbè àgbè ɖekpekpe be àgbèa, yebe èhũ ye. Àmè ɖekpekpe kè la ɖù ìa, wo la crɔ̃ ɛ̀.”

¹⁵“Èsea be èbu ye nyi be: Ne àmè ɖekpekpe, èdùmèvi, àlo, àmèjro ɖù èlã ɖe kè ku, àlo kè wo vũvũa, àmèa ɖo la nyà yebe àwùwo, la lè èsì, eye ye ŋuti la kɔ̀ kaka na fìɛ̃si; ekèa yomè a, e ŋuti la kɔ̀.

¹⁶Ne mu nyà yebe àwùwo, ne bèa lè èsì ò a, yebe èvuɛ̃wo be àgbã la nɔ̀ e ji.”