Read gen Levìwo 18 Bible Online

Levìwo 18 - gen bible

Levìwo 18

¹Tɔhonɔ̀ pò nupo na Mosè, eye be gblɔ̃ na ɛ̀ be:

²“Gblɔ̃ na Izràɛlviwo be: Ènyè ye nyi Tɔhonɔ̀, mìabe Mawu.

³Mì mu la gbà wɔ̀ ènu kè wo wɔ̀nà lè Ejiptè-nyigbã ji, àfi kè mì nɔ̀ sãa ò; mì mu la wɔ̀ ènu kèwo wo wɔ̀nà lè Kanàn-nyigbã kè ji mù kplɔ̀ mì le yìa ò; mì mu gbà zɔ̃ ɖo woabe èsewo ji ò[27].

⁴Èkɔ̀nu kèwo mù do àsi na mìawo ji ye mì la nɔ zɔ̃ ɖo, ne mìa nɔ wɔ̀ ɖo àpe èsewo ji, ɖoa, ènyè ye nyi Tɔhonɔ̀, mìabe Mawu.

⁵Mì le èse nyèwo ku ɖoɖo nyèwo [28] ɖo àsi: àmè kè le zɔ̃ ɖo woa jia ye la ɖo àgbè. Ènyè ye nyi Tɔhonɔ̀, mìabe Mawu.

⁶Mìa dòmètɔ ɖekpe mu la gogo yebe xòmètɔ, ne bèa kpɔ àma mè[29] na ɛ̀ ò. Ènyè ye nyi Tɔhonɔ̀.

⁷Wò mu la kpɔ àma mè na ètɔ wò ò, eye wò mu la kpɔ àma mè na ènɔ̀ wò ò; kè e nyi be e ye jì wòa, wò mu la kpɔ àma mè na ɛ̀ ò.

⁸Wò mu la kpɔ àma mè na ètɔ wò be èsrɔ̃ ɖe ò[30], ɖoa ètɔ wò ŋutɔ tɔ̀ be nyi.

⁹Wò mu la kpɔ àma mè na nɔ̀vi wò nyɔ̃nù, ne e nyi ètɔ wò be èvi, àlo ènɔ̀ wò be èvi[31] kè wo hɛ̃ lè àxomè, àlo kè wo mu hɛ̃ lè àxomèa ò.

¹⁰Wò mu la kpɔ àma mè na èvi wò ŋusù, àlo èvi wò nyɔ̃nù be nyɔ̃nùvi ò; wò ŋutɔ àpo àma ye be nyi.

¹¹Wò mu la kpɔ àma mè na ètɔ wò be èsrɔ̃ ɖe be nyɔ̃nùvi ò; kè e do xòmè ku ètɔ wòa, nɔ̀vi wò ye be nyi.

¹²Wò mu la kpɔ àma mè na ètɔ wò be nɔ̀vi nyɔ̃nù ò; ɖoa ètɔ wò be ŋutilã ye be nyi.

¹³Wò mu la kpɔ àma mè na ènɔ̀ wò be nɔ̀vi nyɔ̃nù ò; ɖoa ènɔ̀ wò be ŋutilã ye be nyi.

¹⁴Wò mu la kpɔ àma mè na àtàvi wò, àlo àtàgã wò be èsrɔ̃ ò, ɖo nàvi wò, àlo nàgã wò ye be nyi[32].

¹⁵Wò mu la kpɔ àma mè na ètoyɔvi wò nyɔ̃nù ò, ɖoa èvi wò ŋusù be èsrɔ̃ ye be nyi, ekèa ŋutia, wò mu la dɔ̃ e gbɔ ò[33].

¹⁶Wò mu la kpɔ àma mè na nɔ̀vi wò ŋusù be èsrɔ̃ ò[34]; nɔ̀vi wò ŋutɔ be àma ye be nyi.

¹⁷Wò mu la kpɔ àma mè na nyɔ̃nù ɖe, la gbà kpɔ àma mè na èvia nyɔ̃nùvi ò; wò mu la kpɔ àma mè na èvia ŋusù be nyɔ̃nùvi, àlo, èvia nyɔ̃nù be nyɔ̃nùvi ò; ye ŋutɔ be ŋutilã ye wo nyi; ne wò wɔ̀ ɛ̀a[35], ènu nyɔŋu ye be nyi.

¹⁸Wò mu la sɔ èsrɔ̃ wò be yomètɔ̀ nyɔ̃nù sɔ ɖè, ne wòa kpɔ àma mè na ɛ̀, ne wòa do ŋuhuã be èzò, wàlɛbɛ kè èsrɔ̃ wòa gbà lè àgbèa ò.

¹⁹Wò mu la gogo nyɔ̃nù kè le ɖo àsi ànyi, ne wòa kpɔ àma mè na ɛ̀, wàlɛbɛ kè yebe àsi ɖo ànyia na be yebe ŋuti mu kɔ̀ ò[36].

²⁰Wò mu la dɔ̃ ku àpo èdùmèvi be èsrɔ̃ ò, ne wò wɔ̀ nènea[37], wò la sɔ pòɖi ɖokoe wò.

²¹Wò mu la sɔ èvi wò do àsi, ne woa sɔ wɔ̀ ènumème vɔsa na vòdu Mɔ̀lɛk[38], la sɔ dovlo àpo Mawu be nyikɔ ò. Ènyè ye nyi Tɔhonɔ̀, àpo Mawu.

²²Wò mu la dɔ̃ ŋusù gbɔ, sìgbè leke wo dɔ̃na nyɔ̃nù gbɔa nène ò[39], ɖoa ènu nyɔŋu ye be nyi.

²³Wò mu la dɔ̃ ku èlã ɖekpe, la sɔ gble èkɔ̀do na ɖokoe wò ò; nènea ke ye nyɔ̃nù ɖekpe mu kpɔ èmɔ la na èlã ne dɔ̃ e gbɔ ò, èvlodonu nyɔŋu ye be nyi.

²⁴Mì mu gbà sɔ wɔ̀na nyɔŋu kèawo dòmètɔ ɖekpe pòɖi mìa ɖokoewo ò; leke be wɔ̀nawo ŋuti ye mù le nyà dùkɔ̃ kèwo ye wɔ̀nà woa jo lè ŋùkɔ̀ na mì ɖo.

²⁵Ànyigbã va trɔ ènu nyɔŋu, eye mù dɔ̃ èto na ɛ̀ ɖo yebe èvuɛ̃ ta; ekèa na be ànyigbãa tru è ji nɔ̀tɔ kɔ̃ŋùgbe.

²⁶Mìawo ya, mì le èse nyèwo ku èkɔ̀nu nyèwo ɖo àsi; mì mu gbà wɔ̀ ènu nyɔŋu kèawo dòmètɔ ɖekpe ò; àxuevi ɖekpe, àlo, àmèjro kè va lè mìa dòmèa cã mu la wɔ̀ ɛ̀ ò.

²⁷Àmè kèwo ye nɔ̀ ànyigbã kèa ji, jè ŋùkɔ̀ na mìawo wɔ̀nà ènu nyɔŋu kèawo kpata, àleke be èvlododo va ɖùfìɔ ɖo ànyigbãa ji.

²⁸Ne mì lè èse nyèwo ku èkɔ̀do nyèwo ɖo àsia, ànyigbãa mu la tru mì kɔ̃ŋùgbe, sìgbè lekè be tru àmè kèwo nɔ̀ e ji, jè ŋùkɔ̀ na mìawo, be mì do yè vlo ò.

²⁹Vɔ̀a, àmè ɖekpekpe àmè kè la wɔ̀ èvlodonu kèawo dòmètɔ ɖe a, wo la ɖè è to lè yebe dùkɔ̃ dòmè.

³⁰Mì le ɖoɖo nyèwo ɖo àsi, ne mì mu gbà zɔ̃ ɖo ènu nyɔŋu kèwo wo wɔ̀nà, gbɔ̀xue mìawo ya mìa vaa ji ò. Mì mu gbà ɖè àfɔ̀ kèawo, la sɔ dovlo mìa ɖokoewo ò. Ènyè ye nyi Tɔhonɔ̀, mìabe Mawu.