Read gen Levìwo 19 Bible Online

Levìwo 19 - gen bible

Levìwo 19

¹Tɔhonɔ̀ gblɔ̃ na Mosè be:

²“Gblɔ̃ na Izràɛlviwo be àmèha a kpata be: Mì nɔ̀ kɔ̀kɔ̀ɛ, ɖoa ènyè Tɔhonɔ̀, mìabe Mawu a, mù lè kɔ̀kɔ̀ɛ[40].

³Mìa dòmètɔ ɖe sia ɖe ɖo la nɔ bù ènɔa ku ètɔa, eye mì ɖo la nɔ zɔ̃ ɖo àpe jɛ̃gbɔ̃zãwo ji[41]. Ènyè ye nyi Tɔhonɔ̀, mìabe Mawu.

⁴Mì mu gbà trɔ jè ŋùkɔ̀ vòduwo ò, eye mì mu gbà wɔ̀ àtikpàkpa be vòduwo na mìa ɖokoewo ò[42]. Ènyè ye nyi Tɔhonɔ̀, mìabe Mawu.

⁵Ne mì le wɔ̀ ènumème vɔsa kè nyi ŋuti fàfa be vɔsa na Tɔhonɔ̀a, mì wɔ̀ ɛ̀, àleke be Tɔhonɔ̀ ne xɔ̀ vɔsaa na mì.

⁶Mì la ɖù ì, gbè kè gbè mì wɔ̀ vɔsaa ku yebe èŋù kè gbè. Ènu kè la kpɔ̀tɔ̀ ŋùkèkè ètɔ̃gɔ̃a gbèa, mì la tɔ ɛ̀ èzò.

⁷Ne mì gbà ɖù ì kpò ye, ŋùkèkè ètɔ̃gɔ̃a gbèa, èlã gbegble kè nyè mu la lɔ̃ ò a, ye be la nyi.

⁸Àmè kè la ɖù ìa, la nɔ̀ yebe àgɔ̀jèjea nu, ɖoa, e gble èkɔ̀do na ènu kè ŋuti wo kɔ̀ na Tɔhonɔ̀a. Wo la ɖè àmè ŋua, jo lè yebe xòmètɔwo dòmè.

⁹Ne wò le yà nukuwo lè àpo àgblè mèa, wò mu la ŋɛ̃ nukuawo yì ɖo kaka àgblèa be tomè ò, eye wò mu la cã nuku wò kèwo hlɛ̃ ɖo ànyigbãa ò.

¹⁰Wò mu la kɛ̃ vɛ̃-kpò kèwo la kpɔ̀tɔ̀ ɖo vɛ̃-kàwo ŋutia ò, eye wò mu la cã vɛ̃-ku kèwo hlɛ̃ ɖo ànyigbãa cã ò. Wò la gble wo ɖɛ na wɔ̀amènɔ̀wo ku àmèjrowo. Ènyè ye nyi Tɔhonɔ̀, mìabe Mawu[43].

¹¹Mì mu gbà nɔ fìfĩ ò; mì mu gbà nɔ ɖà àjè ò, mì mu gbà nɔ bà àmè ò, àlo, mìa nɔ̀ ɖà àjè ɖo mìa nɔ̀vi si ò[44].

¹²Mì mu gbà nɔ sɔ nyikɔ nyè nɔ tà ènu ɖo àjèɖàɖa ji ò[45]. Ne mì wɔ̀ ekèa, mì le dovlo mìabe Mawu be nyikɔ. Ènyè ye nyi Tɔhonɔ̀, mìabe Mawu.

¹³Mù gbà tafu èhavi wò ò, eye mù gbà fĩ ì ò. Àpo èdɔwɔ̀tɔ be èfɛ̃tu mu gbà ci gbɔ wò, èŋù ne kè ɖo ji ò[46].

¹⁴Mù gbà zũ ètokunɔ̀ ò, eye mù gbà sɔ àfɔ̀klɛ̃nu ɖo ŋùkɔ̀ na ŋùkuvigbãgbãnɔ̀ ò[47]. Nène ye wò la ɖè è fiɔ be wò vɔ̃na àpo Mawu a yeŋu. Ènyè ye nyi Tɔhonɔ̀, àpo Mawu.

¹⁵Mì mu gbà nɔ ɖo kòjo gɔ̃glɔ̃ ò: mì mu gbà nɔ ŋɛ̃ ŋùkuvi pu àmè gbɔjɔ be àgɔ̀jèje ji, àlo, mìa nɔ dɔ̃ àmè kè ɖo ŋusɛ̃a ji ò; vɔ̀a, mì nɔ sò kòjo jɔ̀jɔɛ na mìabe èdùmèvi[48].

¹⁶Mù gbà nɔ do lɛ̀gɛ̀dɛ̀ lè àpo xòmè mè ò, eye mù gbà nɔ sɔ ènyà ɖo àmè ji, ne ekèa bèa na be èhavi wò be èhũ ne kɔ̀ ɖɛ ò. Ènyè ye nyi Tɔhonɔ̀.

¹⁷Mù gbà le nɔ̀vi wò ɖo àdɔ̀mè, ne wòa nɔ ɖè àmè cìcri be susu so e ŋuti, ne wòa va wɔ̀ èvuɛ̃ ò[49], vɔ̀a, ne e jè àgɔ̀ do wòa, kã ŋùkumè na ɛ̀ bòhũ, ne wò mu gbà dro èvuɛ̃ be àgbã ɖo e ŋuti ò.

¹⁸Mù gbà biɔ èhlɔ̃ ò, eye mù gbà le èkɛ̃ àpo èdùmèvi ò; nènea ye wò la wɔ̀, la sɔ ɖè è fiɔ be wò lɔ̃ èhavi wò, sìgbè wò ŋutɔ ke nène[50]. Ènyè ye nyi Tɔhonɔ̀.

¹⁹Mì zɔ̃ ɖo àpe èsewo ji; mì mu gbà sɔ àxomèlã kèwo to vòvòawo do àsu lè woa nɔ̀nɔwo dòmè ò. Mù gbà do nuku vòvò èvè ɖo àpo àgblè mè ò. Mù gbà do àwù kè be àvɔ, wo sɔ èkà vòvò èvè, sɔ lɔ̃ ò[51].

²⁰Ne ŋusù ɖe dɔ̃ nyɔ̃nù ɖe kè nyi sumɔ̃vi nyɔ̃nù kè wo sɔ àgɔ̀ na àmè bua gbɔ, eye nyɔ̃nùa nyi àmè kè wo mu xɔ̀ plè ò a, wo mu la wù wo ò, ɖoa, wo mu xɔ̀ nyɔ̃nùa plè ò. Vɔ̀a, ŋusùa la na àjɔ̀.

²¹Ŋusùa la hɛ̃ àgbò ɖèka va Ègòdodo be gòxɔa mɔnu, la sɔ wɔ̀ ènujràɖo vɔsa na Tɔhonɔ̀.

²²Ne hũbonɔa sɔ ènujràɖo be àgbòa wɔ̀ èvuɛ̃ sɔsɔkè be èkɔ̀nua ɖo e ta, lè Tɔhonɔ̀ be ŋùkɔ̀, ɖo èvuɛ̃ kè be wɔ̀a taa, wo la sɔ èvuɛ̃ ŋua kè è.

²³Ne mì ɖo ànyigbãa ji, eye mì do àti ɖekpekpea, kaka na èpè ètɔ̃ sɔ̃ŋua, yebe èku sɛ̃sɛ̃wo ne nɔ̀ na mì, sìgbè èkusɛ̃sɛ̃ kèwo wo mu sò èvo na ò a nène. Kaka na èpè ètɔ̃a, wo la nyi bòlobòlo be èkusɛ̃sɛ̃wo na mì. Ekèa ŋutia, mì mu la ɖù yebe èkusɛ̃sɛ̃ ò.

²⁴Èpè ènègɔ̃a mèa, mì la sɔ yebe èkusɛ̃sɛ̃wo keŋu va savɔ na Tɔhonɔ̀, eye be la nyi kàfù-kafu be àzãɖùɖu gã ɖe.

²⁵Èpè àtɔ̃gɔ̃a mèa, mì la ɖù woabe sɛ̃sɛ̃wo. Ne mì wɔ̀ ekèa, mìabe nukuyàya la nɔ jì ɖo e ji. Ènyè ye nyi Tɔhonɔ̀, mìabe Mawu.

²⁶Mì mu gbà ɖù èlã ɖekpe, lè àfi kè mì kɔ̀ yebe èhũ ɖɛ lèa ò. Mì mu gbà wɔ̀ èbo ò; mì mu gbà kã àfã ò[52].

²⁷Mì mu gbà kpà èɖà klòbòtò ɖo èta ò, eye mì mu gbà plɔ àkpa ɖèka na mìabe ègɛ̃ ò.

²⁸Ne àmè ku na mìa, mì mu gbà sì mìa ɖokoewo be ŋuti, be yèwo sɔ le wɔ̀ ècɔ, àlo mìa ta ènu ɖo mìabe àgbàze ŋuti ò[53]. Ènyè ye nyi Tɔhonɔ̀.

²⁹Mì mu gbà na mìabe nyɔ̃nùvi ne wɔ̀ àhasì, la sɔ ɖìgbɔ ɛ̀ ò[54]. Ne mu nyi nène ò a, èdùa la va ɖɔ ku àhasìtɔ ku ènu nyɔŋu wɔ̀tɔwo ɖèɖe.

³⁰Mì nɔ zɔ̃ ɖo jɛ̃gbɔ̃zã nyèwo ji, eye mìa do bùbu kɔ̀kɔ̀ɛpe nyèa ŋuti. Ènyè ye nyi Tɔhonɔ̀.

³¹Mì mu gbà nɔ yɔ èxɔ̀ ò, eye mì mu gbà nɔ kã àfã ò[55]; ènu ŋuawo la na mì la nɔ̀ màkɔ̀ màkɔ. Ènyè ye nyi Tɔhonɔ̀, mìabe Mawu.

³²Sitè, ne wòa nɔ̀ ètènu, lè àmègã èta ɣe be ŋùkɔ̀, eye nɔ ɖo bùbu àmè sĩsĩ ŋuti. Nène ye wò la wɔ̀, la sɔ ɖè fiɔ be wo sina Mawu. Ènyè ye nyi Tɔhonɔ̀.

³³Ne àmèjro ɖe va lè mìabe èdù mèa, mì mu gbà tafu ì ò.

³⁴Leke mì nɔ̀nà ku èdùa mèviwoa kè ye mì la nɔ̀ kudo àmèjro kè va lè mìa dòmèa cã. Wò la lɔ̃ ɛ̀, sìgbè wò ŋutɔ ke nène, ɖoa mìawo ŋutɔ cã, mì nyi àmèjro kpɔ, nɔ̀ Ejiptè-nyigbã ji[56]. Ènyè ye nyi Tɔhonɔ̀, mìabe Mawu.

³⁵Mì mu gbà wɔ̀ ènu màjɔ̀ màjɔ ku jijenu kèwo mì sɔ jijena ànyigbã, àlo, àvɔ; kèwo mì sɔ jijena ènu be kpɛ̃kpɛ̃ mèa, ku kèwo mì sɔ jijena àmì, àlo, àhàa ò.

³⁶Mìabe àgbãdànuwo ne nyi ènu kèwo sɔ̀gbèa, kpɛ̃kpɛ̃dànuwo ne sɔ̀gbè, àmì, àlo, àhà jijenuwo cã ne sɔ̀gbè[57]. Ènyè ye nyi Tɔhonɔ̀, mìabe Mawu, kè kplɔ̀ mi to so Ejiptè-nyigbã jia.

³⁷Mì le èse ku èkɔ̀do nyèwo ɖo àsi, ne mìa wɔ̀ ɖo woa ji, ɖoa, ènyè ye nyi Tɔhonɔ̀.”