Read gen Levìwo 2 Bible Online

Levìwo 2 - gen bible

Levìwo 2

¹“Ne àmè ɖe sɔ àgblèmè-nuku la va savɔ na Tɔhonɔ̀a, ènu nana a ɖo la nyi èwɔ kè ji wo la kɔ̀ àmì ɖo, la sɔ lifi ɖo e jia.

²Wo la sɔ yì na hũbonɔ, Arɔ̀n be ŋusùviawo, eye wo la kù èwɔ, àlɔ̀gògoe ɖèka, àmì ku lifia kpata; e yomè a, hũbonɔa la tɔzò è, lè vɔsakpea ji, sìgbè ŋùkuɖojinu nène. E nyi ènu ɖùɖu kè la bìzò, eye be la na àzìzɔ kè la jè ŋùmè na Tɔhonɔ̀a.

³Ènu nana kè la kpɔ̀tɔ̀a, la nyi Arɔ̀n ku èviawo tɔ̀; àkpa kɔ̀kɔ̀ɛ tɔ̀xɛ ɖe ye be nyi, ɖo, e so Tɔhonɔ̀ be ènu ɖùɖua mè.

⁴Ne ènu nana wòa nyi èlù be ènu kè wo la mè lè èkpo mè, sìgbè kpɔ̃nɔ nènea, ne e nyi èkpomè klàkoa, wo ɖo la sɔ èwɔ kè mè wo mu la do mawɛhuãnu ò a, la blù ku àmì, àlo èkpomè-cɔ̃mɔ̀ kè ŋuti wo lìlì àmì ɖoa.

⁵Ne e nyi èkpeji klàko ye wò la hɛ̃ vaa, wo la blù èwɔa ku àmì, vɔ̀a, wo mu la do e mè mawɛhuãnu ò.

⁶Ne wo hɛ̃ ɛ̀ va, wo la kã ɛ̀, la gbà kɔ̀ àmì ɖo kãkãwo ji, na vɔsaa.

⁷Ne wo la ɖà ènu nana a lè èze mè ye à, èwɔa ɖo la yì àmìa mè.

⁸Wò la sɔ ènu nana kè wò ɖà na Tɔhonɔ̀a va na hũbonɔa, eye hũbonɔa la sɔ ɛ̀ va vɔsakpea gbɔ.

⁹Hũbonɔa la ɖè ŋùkuɖojinua lè ènu nana a ŋuti, la tɔ ɛ̀ èzò, lè vɔsakpea ji. E nyi ènu ɖùɖu kè la bìzò, eye be la na àzìzɔ kè la jè ŋùmè na Tɔhonɔ̀a.

¹⁰Ènu nana kè la kpɔ̀tɔ̀a la nyi Arɔ̀n ku èviawo tɔ̀; àkpa kɔ̀kɔ̀ɛ gã ɖe ye be nyi, ɖoa, e so Tɔhonɔ̀ be ènu ɖùɖu mè.

¹¹Mì mu la sɔ ènu nana ɖe kè wo sɔ mawɛ huãhuã ɖàa va na Tɔhonɔ̀ ò. Mì mu la tɔzò mawɛhuãnu, àlo, ànyisi, sɔ savɔ na Tɔhonɔ̀ ò[1].

¹²Mì la sɔ mìabe nuku cucugbãawo va na Tɔhonɔ̀, vɔ̀a, mì mu la tɔ wo èzò, lè vɔsakpea ji ò.

¹³Wò la nɔ sɔ èjè[2] ɖo ènu nana ɖekpekpe kè wò la sɔ va na Tɔhonɔ̀a ji. Wò mu la sɔ ènu nana ɖekpe va na Tɔhonɔ̀, kè ji wò mu la sɔ Tɔhonɔ̀, àpo Mawu be Zòɖùɖua be èjè ɖo ò. Èjè ɖo la bɔ̀ ɖo àpo ènu nana ɖe sia ɖe ŋuti.

¹⁴Ne wò hɛ̃ àpo nuku cucugbãa va Tɔhonɔ̀ be ŋùkɔ̀a, ne leke be nukua nyi èlù, èlì, àlo, èblia, wò ɖo la mè ɛ̀, lè èzò nu, eye wò la glì nuku yeye kèa.

¹⁵Wò la kɔ̀ àmì ɖo e ji, eye wò la sɔ lifi ɖo e ji.

¹⁶E yomè a, hũbonɔa la tɔzò yebe ŋùkuɖojinu kè la nyi èlù, èlì, àlo èbli gìglia viɖe, àmì viɖe ku lifia keŋu-keŋu. Ènuɖùɖu be nyi, wo tɔzò na Tɔhonɔ̀.”