Read gen Levìwo 20 Bible Online

Levìwo 20 - gen bible

Levìwo 20

¹Tɔhonɔ̀ gblɔ̃ na Mosè be:

²“Gblɔ̃ na Izràɛlviwo be: “Ne àmè ɖekpekpe, Izràɛlvi, àlo, àmèjro kè lè Izràɛl-nyigbã jia sɔ èvia ɖe na vòdu Mɔ̀lɛka, wo la wù ì: èdùamèviwo la pò èkpe è wù.

³Nyè ya, mù la sitè ɖo ŋusù kèa ŋuti, eye mù la ɖè è, jo lè yebe dùkɔ̃a dòmè, ɖoa, e sɔ èvia na vòdu Mɔ̀lɛk, sɔ le pòɖi kɔ̀kɔ̀ɛpe nyèa, eye be le ɖìgbɔ nyikɔ nyè.

⁴Ne mìabe dùkɔ̃a mu jro la wù ì ò, eye be jro la miɔ̃ ŋùkuvi pu e ji, wàlɛbɛ kè ŋusùa sɔ èviawo dòmètɔ ɖèka na be wo ne sɔ savɔ na vòdu Mɔ̀lɛk kpòa,

⁵eŋuã, nyè ŋutɔ ye la trɔ kpã ŋùkɔ̀ ŋusù kèa ku yebe hɛ̃nu, la crɔ̃ wo, jo lè woabe dùkɔ̃ dòmè, ŋusù ŋua ku àmè kèwo keŋu la wɔ̀ àhasì kplɔ̀ Mɔ̀lɛk do a.

⁶Àmè kè la wɔ̀ àhasì, la kã àfãa, mù la trɔ kpã ŋùkɔ̀ ɛ̀, eye mù la crɔ̃ ɛ̀, jo lè yebe dùkɔ̃ dòmè.

⁷Mì lè mìa ɖokoewo ɖì, ne mìa nɔ̀ kɔ̀kɔ̀ɛ, ɖoa, ènyè ye nyi Tɔhonɔ̀, mìabe Mawu.”

⁸“Mì le ɖoɖo nyèwo ɖo àsi, ne mìa wɔ̀ ɖo woa ji. Ènyè ye nyi Tɔhonɔ̀ kè le kɔ̀ mìa ŋutia.

⁹Àmè kè la zũ ètɔa, àlo ènɔa, wo la wù ì. Yebe èhũ la trɔ kɔ̀ ɖo ye ŋutɔ ji, ɖoa, e sɛ̃kpɛ̃ na yebe àjìtɔwo.

¹⁰Ne àmè ɖe wɔ̀ àhasì ku yebe èhavi be èsrɔ̃a, wo la wù wo, ŋusù àhasìtɔa ku nyɔ̃nù àhasìtɔa cã.

¹¹Ne ŋusù ɖe dɔ̃ ku ètɔa be èsrɔ̃ ɖe a, e kpɔ àma mè kè nyi ètɔa tɔ̀a. Wo la wù wo àmè èvèawo, eye woabe èhũ la kɔ̀ ɖo woa ŋutɔwo ji.

¹²Ne ŋusù ɖe dɔ̃ ku èvia be èsrɔ̃a, wo la wù wo àmè èvèawo, ɖoa, wo wɔ̀ ènu nyɔŋu, eye woabe èhũ la trɔ kɔ̀ ɖo woa ji.

¹³Ne ŋusù ɖe dɔ̃ ku ŋusù, sìgbè lekè wo dɔ̃na ku nyɔ̃nù nènea, wo àmè èvèawo wɔ̀ ènu nyɔŋu. Wo la wù wo, eye woabe èhũ la trɔ kɔ̀ ɖo woa ŋutɔwo ji.

¹⁴Ne ŋusù ɖe ɖè nyɔ̃nù ɖe ku nyɔ̃nùa be ènɔa, wo la tɔzò ŋusùa ku nyɔ̃nùawo, ɖoa, wo wɔ̀ èvlodonu. Nène a ye mì la ɖè ènu nyɔŋuwo jo lè mìa dòmèa yeŋu.

¹⁵Ne ŋusù ɖe dɔ̃ èlã ɖe gbɔa, mì la wù ŋusùa, eye mì la wù èlãa cã.

¹⁶Ne nyɔ̃nù ɖe gogo èlã ɖe, eye be dɔ̃ ku ìa, mì la wù nyɔ̃nùa, eye mì la wù èlãa cã. Woabe èhũ la trɔ kɔ̀ ɖo woa ji.

¹⁷Ne ŋusù ɖe sɔ nɔ̀via, kè nyi ètɔa be èvi, àlo, ènɔa be èvia sɔ wɔ̀ èsrɔ̃, eye wo kpɔ àma mè na woa nɔ̀nɔwoa, ènu nyɔŋu be nyi, wo la crɔ̃ wo, lè woabe dùkɔ̃mèviwo be ŋùmè. Ekè ŋusùa kpɔ àma mè na nɔ̀viaa, e la dro ye ŋutɔ be àgɔ̀jèje be àgbã[58].

¹⁸Ne ŋusù ɖe dɔ̃ ku nyɔ̃nù kè le ɖo àsi ànyi, eye be kpɔ yebe àmaa, ekè be kpɔ àfi kè èhũa le soa, eye nyɔ̃nùa ŋutɔ klo àvɔ lè àfi kè èhũa le soa ŋutia, wo la crɔ̃ wo àmè èvèawo jo lè woabe dùkɔ̃a dòmè.

¹⁹Wò mu la kpɔ àma mè na ènɔ̀ wò be nɔ̀vi àlo, ètɔ wò be nɔ̀vi ò. Ne ŋusùa kpɔ àma mè na nyɔ̃nù kè nyi ŋutilã ɖèka ku ìa, wo àmè èvèawo la nɔ̀ woabe èvuɛ̃a nu.

²⁰Ne ŋusù ɖe dɔ̃ ku tasia, àlo, nàviaa, e kpɔ àma mè na nyìnea, na àtàvia, àlo, àtàgãa; ye ku nyɔ̃nùa, wo la nɔ̀ woabe èvuɛ̃a nu[59].

²¹Ne ŋusù ɖe sɔ fòfoa, àlo, nɔ̀via be èsrɔ̃, sɔ ɖèa, e wɔ̀ ènu nyɔŋu. Kè be kpɔ àma mè na nɔ̀via, àlo, fòfoa, èvi mu la nɔ̀ woa ku nyɔ̃nùa dòmè ò.

²²Mì le èse nyèwo ku èkɔ̀do nyèwo keŋu ɖo àsi, ne mìa zɔ̃ ɖo woa ji, àleke be ànyigbã kè ji mù le kplɔ̀ mì le yì, ne mìa yì nɔ̀ e jia, mu gbà tru mì kɔ̃ ŋùgbe ò.

²³Mì mu gbà kplɔ̀ èdù kè mètɔwo mù le nyà lè ŋùkɔ̀ na mìa be èsewo do ò. Ènu ŋuawo ye wo wɔ̀, eye ŋuti wo nyɔŋu na mù ɖo.

²⁴Ekèa ŋuti mù gblɔ̃ na mì be: “Mìa tɔ̀ ye la nyi woabe ànyigbãa, ènyè ye sɔ ɛ̀ le do àsi na mì, ɖoa, ànyigbã kè ji nyìnɔsi ku ànyisi bɔ lèa ye be nyi!”[60] Ènyè ye nyi Tɔhonɔ̀, mìabe Mawu kè cã mì lè dùkɔ̃ kpɔ̀tɛawo dòmè.

²⁵Ekèa ŋutia, mì do vòvòtoto èlã kèwo ŋuti kɔ̀a ku kèwo ŋuti mu kɔ̀ ò a dòmè, xèvi kèwo ŋuti kɔ̀a ku kèwo ŋuti mu kɔ̀ ò a dòmè, àleke be mì mu gbà va sɔ èlã kèawo, xèvi kèawo ku ènu kèwo kpata le zɔ̃ lè ànyigbãa jia hɛ̃ kpɛ̃sɛ̃ va mìa ɖokoewo ji ò. Kèwo ji mù tɔ àsi na mìawo ne nɔ̀ màkɔ̀ màkɔ na mì.

²⁶Mì nyi tɔ̀ nyè, eye mì nɔ̀ kɔ̀kɔ̀ɛ na mù, ɖoa, ènyè, Tɔhonɔ̀a, mù lè kɔ̀kɔ̀ɛ. Mù cã mì lè dùkɔ̃wo dòmè, àleke be mìa nyi tɔ̀ nyè ye.

²⁷Ne ŋusù ɖe ku nyɔ̃nù ɖe le kã àfãa, wo la wù wo; wo la pò èkpe wo wù, eye woabe èhũ la trɔ kɔ̀ ɖo woa ŋutɔwo ji.