Read gen Levìwo 21 Bible Online

Levìwo 21 - gen bible

Levìwo 21

¹Tɔhonɔ̀ gblɔ̃ na Mosè be: “Pònupo na hũbonɔwo, Arɔ̀n be èviawo, ne wòa to na wo be: Hũbonɔ ɖekpe mu la gogo àmè kuku ɖe lè yebe xòmè mè, sɔ wɔ̀ ye ɖokoe màkɔ̀ màkɔ,

²ne àmè kè ku lè yebe xòmè mèa mu nyi ŋutilã ɖèka ku ì, sìgbè ènɔa, ètɔa, èvia ŋusù, èvia nyɔ̃nù, fòfoa, àlo, nɔ̀via ŋusù nène ò.

³Lè nɔ̀via nyɔ̃nù, àlo dàdaa tɔ̀ gomèa, ne e lè àxuea, ekè gɔ̃mè ye nyi be mu kpɔ nya ŋusù kaka la va nyi ɖekpe tɔ̀ ò a, hũbonɔa gbà teŋu wɔ̀ ye ɖokoe màkɔ̀ màkɔ ɖo woa ŋuti, ɖoa, wo gbà nyi yebe xòmètɔ kèwo gogo èa.

⁴Gãkea, ye ŋutɔ kè nyi xòmè-ga, lè yebe xòmètɔwo dòmèa, mu ɖo la wɔ̀ ye ɖokoe màkɔ̀ màkɔ ò; ne mu nyi nène ò a, e la gble Mawu be èkɔ̀doa.

⁵Hũbonɔwo mu kpɔ èmɔ lè ècɔ wɔ̀wɔ mèa, la kpà èɖà ò; wo mu la plɔ ègɛ̃ lè ètonu ò, eye wo mu la sɔ èlãnu sì woabe àgbàze ò[61].

⁶Wo la sɔ woabe àmèti bliboa do woabe Mawu be èdɔ mè. Ekè e nyi be woawo ye sɔna woabe Mawu be ènu ɖùɖua ɖona ŋùmè na Mawu a, wo mu la dovlo woabe Mawu be nyikɔ ò. Vɔ̀a, wo ɖo la wɔ̀ woabe àmèti bliboa kɔ̀kɔ̀ɛ.

⁷Hũbonɔ mu la ɖè nyɔ̃nù kè nyi àhasìtɔ, àlo, kè ɖìgbɔ ye ɖokoe ò. Mu la ɖè nyɔ̃nù kè èsrɔ̃a nyà lè àsuxuea ò. Ɖoa wo ɖè hũbonɔ ɖekpekpe ɖovò na nyè ŋutɔ àpe èdɔa kpò.

⁸Wò la kpɔ hũbonɔ wòa kɔ̀kɔ̀ɛ, ɖoa, e ye sɔna àpo Mawu be ènu ɖùɖu ɖona ŋùkɔ̀ na Mawu. E ɖo la nɔ̀ kɔ̀kɔ̀ɛ na wò, ɖoa, ènyè, Tɔhonɔ̀ kè le kɔ̀ mìa ŋutia, mù lè kɔ̀kɔ̀ɛ.

⁹Ne hũbonɔ ɖe be nyɔ̃nùvi le wɔ̀ àhasì, sɔ le pòɖi ye ɖokoea, ètɔa ye be le pòɖi; wo la tɔ ɛ̀ èzò, àgbè àgbè.

¹⁰Hũbonɔ gã kè be èta wo kɔ̀ àmì ɖo, sɔ do èdɔ àsi na ɛ̀, lè nɔ̀viawo be ŋùkɔ̀a, àmè kè ŋuti wo kɔ̀, ne bèa nɔ do àwù kɔ̀kɔ̀ɛwoa, mu la kãkã èɖà ɖo èta, àlo, la zɛ̃ yebe àwùwo ò[62].

¹¹Hũbonɔ gãa mu gbà gogo àmè kuku ɖekpe, ne bèa va nɔ̀ màkɔ̀ màkɔ ɖo ètɔa, àlo, ɖo ènɔa ŋuti ò.

¹²Mu gbà to lè kɔ̀kɔ̀ɛpea ò, ne mu nyi nène ò a, e la va gble èkɔ̀do na yebe Mawu be kɔ̀kɔ̀ɛpea. Ɖoa, yebe Mawu be àmì ye wo do èta na ɛ̀, sɔ kɔ̀ e ŋuti. Ènyè ye nyi Tɔhonɔ̀a.

¹³Nyɔ̃nù kè gbà lè àxuea kpò ye hũbonɔ gãa la teŋu ɖè.

¹⁴Mu gbà ɖè àhòsì, àlo, nyɔ̃nù kè wo nyà lè àsuxuea ò. Mu gbà ɖè nyɔ̃nù kè wɔ̀ àhasì, sɔ pòɖi ye ɖokoea ò. Vɔ̀ bòhũa, ne ɖè tùgbɛ̀jɛvi kè so yebe xòmè mèa.

¹⁵Nène a, mu la hɛ̃ jìjimèvi kèwo ŋuti mu kɔ̀ ò a, va yebe xòmè mè ò. Ɖoa, ènyè ye nyi Tɔhonɔ̀ kè le kɔ̀ e ŋuti.”

¹⁶Tɔhonɔ̀ gblɔ̃ na Mosè be:

¹⁷“To na Arɔ̀n be: “So jìjimè yì jìjimèa, àpo jìjimèvi ɖekpe kè nyi dɔ̀nɔ̀kplibɔa mu gbà gogo vɔsakpe nyè, be yèa sɔ ènu ɖùɖu ɖo yèbe Mawu be ŋùmè ò.

¹⁸Àmè ɖekpekpe kè ŋuti èdɔ̀lele ɖe lè, sìgbè ŋùkuvi gbãgbãnɔ̀, kpòtɛ̃nɔ̀, ŋɔ̀ti gbãgbãnɔ̀, àmè kè be àfɔ̀wo troa nènea, mu ɖo la gogo vɔsakpe nyè ò;

¹⁹àmè kè àbɔ, àlo, àta ŋɛ̃ na a,

²⁰èkpotɔnɔ̀, àmè kè lè cɛklia, àmè kè èsi lè ŋùkuvi ɖèka ji na a, àmè kè jè àkpàa, àmè kè èjì wɔ̀ ŋuti na a, àlo, àmè kè wo gbã nekuwo[63] na a, mu kpɔ èmɔ la gogo vɔsakpe nyèa ò.

²¹Hũbonɔ Arɔ̀n be jìjimèvi ɖekpe kè ŋuti èdɔ̀lele ɖe lèa mu kpɔ èmɔ, la dɔ̃ gogo vɔsakpe nyèa, ne bèa sɔ yebe Mawu be ènu ɖùɖu ɖo ŋùku mè na ɛ̀ ò. Ekè èdɔ̀lele lè e ŋutia, mu gbà dɔ̃ va vɔsakpea gbɔ, be yèa sɔ ènu ɖùɖu ɖo yebe Mawu be ŋùkɔ̀ ò.

²²E teŋu ɖù ènu ɖùɖu kè nyi vɔsa kɔ̀kɔ̀ɛ kè wo wɔ̀ na yebe Mawu a be ɖe fàa, ku vɔsa kèwo wo wɔ̀ na Mawu a, sìgbè àmè kpɔ̀tɛawo ke nène.

²³Vɔ̀a, kè èdɔ̀lele lè e ŋutia, mu ɖo la ɖo àfɔ̀ èxɔ̀mèsòvɔa gbɔ, àlo, la zɔ̃, kaka la gogo vɔsakpea ò;[64] ne mu nyi nène ò a, e la gble èkɔ̀do na kɔ̀kɔ̀ɛpea ku ènu kèwo ye lè e mèawo. Ɖoa, ènyè Tɔhonɔ̀ ye le kɔ̀ woa ŋuti.”

²⁴Ekèa yomè a, Mosè gblɔ̃ ènyà kèawo keŋu na Arɔ̀n ku yebe ŋusùviwo kudo Izràɛlviwo kpata.