Read gen Levìwo 23 Bible Online

Levìwo 23 - gen bible

Levìwo 23

¹Tɔhonɔ̀ gblɔ̃ na Mosè be:

²“Pò nupo na Izràɛlviwo, ne wòa gblɔ̃ na wo be: Tɔhonɔ̀ be àzã tɔ̀xɛwo ye nyi àzãɖùɖu kèwo ji mì la nɔ kpe Izràɛlviwo na bɔ̀bɔ kɔ̀kɔ̀ɛwo lèa. Bɔ̀bɔ kɔ̀kɔ̀ɛ be àzãɖùɖuawo ye nyi ekèawo:

³Ŋùkèkè àdɛ̃ ye mì la nɔ wɔ̀dɔ, vɔ̀a, ŋùkèkè adrɛ̃gɔ̃ a gbèa nyi jɛ̃gbɔ̃zãgbè; mì la wɔ̀ bɔ̀bɔ tɔ̀xɛ lè ŋùkèkè ŋua ji; mì mu la wɔ̀ èdɔ ɖekpe ò. Tɔhonɔ̀ be jɛ̃gbɔ̃zã ye be nyi, lè àfi ɖekpekpe kè mì lèa[68].

⁴Tɔhonɔ̀ be àzã kèwo gbè mì la nɔ wɔ̀ bɔ̀bɔ tɔ̀xɛwo, lè ŋùkèkè ɖoɖɛwo jiawo ye nyi ekèawo:

⁵Wètri cucugbãa be ŋùkèkè woènègɔ̃a gbè, lè fìɛ̃si mèa ye nyi Tɔhonɔ̀ be Toŋutivayì[69].

⁶Wètri kèa ke be ŋùkèkè woeàtɔ̃gɔ̃a gbè ye nyi kpɔ̃nɔ àkpiti be àzãa na Tɔhonɔ̀. Mì la ɖù kpɔ̃nɔ àkpiti, ŋùkèkè adrɛ̃.

⁷Àzãa be ŋùkèkè cucugbãa gbèa, mì la wɔ̀ bɔ̀bɔ kɔ̀kɔ̀ɛ, ne mìa sɛ̃ mù. Mì mu la wɔ̀ èkluvi be èdɔ ɖekpe ò.

⁸Gbè sia gbè, lè ŋùkèkè adrɛ̃ ŋuawo mèa, mì la wɔ̀ ènumème vɔsa na Tɔhonɔ̀. Ŋùkèkè adrɛ̃gɔ̃ a gbèa, mì la wɔ̀ bɔ̀bɔ kɔ̀kɔ̀ɛ; mì mu la wɔ̀ èdɔ sɛ̃ŋu ɖekpe ò.”

⁹Tɔhonɔ̀ pò nupo na Mosè, eye be gblɔ̃ na ɛ̀ be:

¹⁰“To na Izràɛlviwo be: Ne mì va yì ɖo ànyigbã kè mù sɔ le na mìa jia, ne mì yà nukuwoa, mì la sɔ èlù kè mì la bla cucugbãa va na hũbonɔa, eye be la nyi mìabe ènuŋɛ̃ŋɛ̃ cucugbãa.

¹¹Hũbonɔa la sɔ èlù bablaa na, lè Tɔhonɔ̀ be ŋùkɔ̀, àleke be Tɔhonɔ̀ ne xɔ̀ mìabe ènu nana. Hũbonɔa la wɔ̀ ènu nana vɔsa kèa, jɛ̃gbɔ̃zãa be ŋùkè gbè.

¹²Gbè kè gbè mì la sɔ èlù bablaa savɔa, mì la sɔ èpè ɖèka be àlɛ̃vi kè ŋuti èdɔ̀lele ɖekpe mu lè ò a wɔ̀ ènumème vɔsa na Tɔhonɔ̀.

¹³Mì la sɔ èwɔ, efà be jijenu be mamã èwogɔ̃a tèpe èvè, la blù ì ku àmì, la sɔ wɔ̀ ènumème vɔsa kè la hɔ̃ɛ gbligbli do Tɔhonɔ̀, ne bèa fa àkɔ na ɛ̀. Mì la sɔ vɛ̃, hɛ̃ be jijenu be mamã ènègɔ̃a kpe ɖo e ŋuti, na èsìkɔ̀ɖɛ.

¹⁴Mì mu la ɖù nukuyàya kèa be ènu ɖekpe kè nyi kpɔ̃nɔ, èlù mème, èbli yeye, jè ŋùkɔ̀ na gbè kè gbè mì la sɔ mìabe Mawu be ènu nana a va ò. Èse kòkòɖàbì be nyi na mì, so jìjimè, yì jìjimè, lè àfi ɖekpekpe kè mì la nɔ̀a.”

¹⁵Mì la hlɛ̃ kuasiɖa adrɛ̃, so jɛ̃gbɔ̃zã be ŋùkè gbè ji, ekè nyi so gbè kè gbè mì sɔ èlù bablaa va ɖo Tɔhonɔ̀ be ŋùkɔ̀a ji, mì la hlɛ̃ kuasiɖa ɖɔɖɔ adrɛ̃;

¹⁶kaka va ɖo jɛ̃gbɔ̃zã adrɛ̃gɔ̃ a be ŋùkè gbè ji, eŋuã, mì la hlɛ̃ ŋùkèkè èkà ci èwo, eye mì la sɔ nukuyàya be ènu nana va Tɔhonɔ̀ be ŋùkɔ̀.

¹⁷Àfi ɖekpekpe kè mì lèa, mì la hɛ̃ kpɔ̃nɔ kè wo sɔ èwɔ jijenu efà be mamã èwogɔ̃a tèpe èvè wɔ̀a, wo la mè è, be la nyi kpɔ̃nɔ kè hɔ̃a: ekèa la nyi Tɔhonɔ̀ be nuku cucugbãa, eye mì la sɔ va ɖo ŋùkɔ̀ na ɛ̀.

¹⁸Sɔ kpe ɖo kpɔ̃nɔa ŋutia, mì la sɔ èpè ɖèka be àlɛ̃vi adrɛ̃ kèwo ŋuti èdɔ̀lele ɖekpe mu lè ò a, ènyì-su ɖèka ku àgbò èvè, la wɔ̀ ènumème vɔsa na Tɔhonɔ̀, eye mì la sɔ ènu ɖùɖu vɔsa be ènuwo ku woabe èsìkɔ̀ɖɛ be àhàwo, ne woa nyi vɔsa kè la hɔ̃ɛ gbligbligbli, la fa èjì na Tɔhonɔ̀a.

¹⁹Mì la sɔ ègbɔ-su ɖèka, sɔ wɔ̀ vɔsa ɖo èvuɛ̃ ta, ku èpè ɖèka be àlɛ̃vi èvè, sɔ wɔ̀ ŋuti fàfa be vɔsa.

²⁰Hũbonɔa la sɔ wo ɖo Tɔhonɔ̀ be ŋùmè, àlɛ̃vi èvèawo ku nuku cucugbãa be kpɔ̃nɔawo ɖodu. Ènu nana kɔ̀kɔ̀ɛ wo nyi na Tɔhonɔ̀, eye, e yomè a, wo la nyi Hũbonɔa tɔ̀.

²¹Àzã ŋua gbèa, mì la wɔ̀ bɔ̀bɔ kɔ̀kɔ̀ɛ; mì mu la wɔ̀ kluvi be èdɔ ɖekpe ò. Èse kòkòɖàbì be nyi na mì, so jìjimè, yì jìjimè, lè àfi ɖekpekpe kè mì lèa[70].

²²Ne mì yà nuku, lè mìabe ànyigbãwo jia, mì mu la ŋɛ̃ nukuawo kaka sɔ yì àgblèa be ètomè ò, eye mì mu la lɔ nuku kèwo hlɛ̃ ɖo ànyigbãa ò; mì la gble wo ɖɛ na wɔ̀amènɔ̀ ku àmèjrowo. Ènyè ye nyi Tɔhonɔ̀, mìabe Mawu[71].”

²³Tɔhonɔ̀ gblɔ̃ na Mosè be:

²⁴“To na Izràɛlviwo be: Wètri adrɛ̃gɔ̃ a be ŋùkèkè cucugbãa la nyi jɛ̃gbɔ̃zã na mì; e la nyi ŋùkuɖoji be àzã ku àyosòso, àsikpepòpo ku kafu be àzã na mì.

²⁵Mì mu la wɔ̀ èdɔ sɛ̃ŋu ɖekpe ò; mì la wɔ̀ ènumème vɔsa na Tɔhonɔ̀[72].

²⁶Tɔhonɔ̀ gblɔ̃ na Mosè be:

²⁷“Wètri adrɛ̃gɔ̃ kèa be ŋùkèkè èwogɔ̃a gbè kè le nyi sɔsɔkè be ŋùkèkè gãa, mì la wɔ̀ bɔ̀bɔ kɔ̀kɔ̀ɛ, mì la blanu, eye mì la wɔ̀ ènumème vɔsa na Tɔhonɔ̀.

²⁸Mì mu la wɔ̀ èdɔ sɛ̃ŋu ɖekpe lè ŋùkèkè kèa ji ò. Ɖoa, sɔsɔkè be ŋùkèkè gã kè gbè wo la wɔ̀ èvuɛ̃ sɔsɔkè be èkɔ̀nu na mì, lè Tɔhonɔ̀, mìabe Mawu be ŋùmè a ye be nyi.

²⁹Àmè ɖekpekpe kè mu la blanu lè ŋùkèkè ŋua ji ò a, wo la ɖè è jo lè yebe xòmètɔwo dòmè;

³⁰eye, àmè ɖekpekpe kè la wɔ̀dɔ lè ŋùkèkè ŋua jia, mù la bu ŋùmè na ɛ̀, lè yebe dùkɔ̃a dòmè.

³¹Mì mu la wɔ̀ èdɔ ɖekpekpe ò: èse kòkòɖàbì be nyi na mì, lè àfi ɖekpekpe kè mì la nɔ̀a, so jìjimè, yì jìjimè.

³²Jɛ̃gbɔ̃zã be nyi na mì, ŋùkèkè kè ji mì la gbɔ̃jɛ̃ lè, la blanua. So wètria be ŋùkèkè àsiɖèkɛgɔ̃a gbè be fìɛ̃si mè, so yebe ŋùkè gbè be fìɛ̃si mè, mì la zɔ̃ ɖo jɛ̃gbɔ̃zã kèa ji[73].”

³³Tɔhonɔ̀ gblɔ̃ na Mosè be:

³⁴“To na Izràɛlviwo be: Wètri adrɛ̃gɔ̃ kèa be ŋùkèkè woeàtɔ̃gɔ̃a gbèa, la nyi Gòxɔ̀wo be àzã kè la xɔ̀ ŋùkèkè adrɛ̃, na Tɔhonɔ̀ be gogo.

³⁵Ŋùkèkè cucugbãa gbèa, mì la wɔ̀ bɔ̀bɔ kɔ̀kɔ̀ɛ, eye mì mu la wɔ̀ èdɔ ɖekpe ò.

³⁶Ŋùkèkè adrɛ̃awo be gbè sia gbèa, mì la wɔ̀ ènumème vɔsa na Tɔhonɔ̀. Ŋùkèkè ènyigɔ̃a gbèa la nyi àzãa be ènuwuwu; mì mu la wɔ̀ èdɔ ɖekpe gbè ŋua gbè ò.

³⁷Àzã ŋuawo ye nyi Tɔhonɔ̀ be àzã tɔ̀xɛ kèwo ŋuti bùbu la nɔ̀, àzã kèwo ji mì la wɔ̀ bɔ̀bɔ kɔ̀kɔ̀ɛ lè, ne mìa wɔ̀ ènumème vɔsa na Tɔhonɔ̀, mìa wɔ̀ ŋuti fàfa be vɔsa, àlo, èsìkɔ̀ɖɛ be èkɔ̀nu, sɔ zɔ̃ ɖo gbè sia gbè be èkɔ̀nu ji.

³⁸Mì la nɔ zɔ̃ ɖo e ji, kpe ɖo Tɔhonɔ̀ be jɛ̃gbɔ̃zãwo ku ènu nana kudo èjro nyuɛ̃ be vɔsa gbàkudo vɔsa kèwo keŋu mì la wɔ̀ na Tɔhonɔ̀a ŋuti.

³⁹Sɔ kpe ɖo ekèa ŋutia, wètri adrɛ̃gɔ̃ a be ŋùkèkè woeàtɔ̃gɔ̃a, ne mì yà àgblèmè nukuwo vɔ̀a, mì la wɔ̀ èmɔzɔ̃zɔ̃, la sɔ ɖù àzã na Tɔhonɔ̀, ŋùkèkè adrɛ̃. Ŋùkèkè cucugbãa la nyi jɛ̃gbɔ̃zã, eye ŋùkèkè ènyigɔ̃a, cã la nyi jɛ̃gbɔ̃zã.

⁴⁰So àzãa be ŋùkèkè cucugbãa gbèa, mì la ji àtikusɛ̃sɛ̃ nyakpɔkpɔwo, mì la ji èdebàyà, àti be àlɔ̀zɛ̃ kèwo do àmà nyuɛ̃ ɖe a, àlo, ètɔ̀to be àtivi kèwo vũ nyuɛ̃ ɖeawo ɖo àsi, la nɔ sò àyo lè Tɔhonɔ̀, mìabe Mawu be ŋùkɔ̀, ŋùkèkè adrɛ̃ sɔ̃ŋu[74].

⁴¹Mì la nɔ wɔ̀ èmɔzɔ̃zɔ̃ kèa, la sɔ ɖù àzã na Tɔhonɔ̀, ŋùkèkè adrɛ̃ sɔ̃ŋu, lè èpèa mè. Èse kòkòɖàbì be nyi na mì, eye mì la nɔ zɔ̃ ɖo e ji, so jìjimè, yì jìjimè. Mì la nɔ wɔ̀ èmɔzɔ̃zɔ̃ kɔ̀kɔ̀ɛ kèa, lè wètri adrɛ̃gɔ̃ a mè.

⁴²Mì la nɔ dɔ̃ gòxɔ mè, ŋùkèkè adrɛ̃; Izràɛlvi jìji ɖe sia ɖe la nɔ dɔ̃ gɔ̀xɔ mè,

⁴³àleke be, so jìjimè yì jìjimè, mìa nya be mù na Izràɛlviwo nɔ̀ gòxɔ mè kpɔ, wàlɛbɛ kè mù ɖè wo to so Ejiptè-nyigbã jia. Ènyè ye nyi Tɔhonɔ̀, mìabe Mawu[75].”

⁴⁴Ekèa yomè a, Mosè gblɔ̃ leke wo la dogò Tɔhonɔ̀, lè àzãɖùɖu kɔ̀kɔ̀ɛwo mè ɖoa na Izràɛlviwo.