Read gen Levìwo 24 Bible Online

Levìwo 24 - gen bible

Levìwo 24

¹Tɔhonɔ̀ gblɔ̃ na Mosè be:

²“Ɖè ègbè na Izràɛlviwo be wo ne hɛ̃ àmìti be àmì kè wo mu zã kpɔ ò a, kè mè kɔ̀ ceke cekea va, ne woa sɔ nɔ sũ kãligbɛ̃ ɖɛ tɛ̀gbɛ̀,

³ɖo zòɖùɖu be èxɔ̀mèsɔ̀vɔa be ŋùkɔ̀, lè Ègòdodo be gòxɔa mè. Arɔ̀n la ɖo kãligbɛ̃ a ɖɛ, àleke be ne nɔ bì, lè Tɔhonɔ̀ be ŋùkɔ̀, so fìɛ̃si mè, kaka na ŋùdekɛ̃nyɛ mè, kaka sɔyì. Èse kòkòɖàbì be nyi na mì.

⁴E la sɔ kãligbɛ̃awo ɖo kãligbɛ̃ti kè wo sɔ sìka àku-àku wɔ̀a ji, àleke be woa nɔ̀ bì, lè Tɔhonɔ̀ be ŋùkɔ̀, kaka sɔyì.

⁵Wò la sɔ èwɔ, la sɔ mè èkpomè-klàko woèvè; wò la sɔ èwɔ jijenu efà be mamã èwogɔ̃a be tèpe èvè, sɔ wɔ̀ klàko ɖè sia ɖe.

⁶Wò la ɖo wo, lè àgbà èvè mè, àdɛ̃ àdɛ̃, èɖe lè èɖe ji, ɖo èkplɔ̃ kè ŋuti wo kɔ̀a ji, lè Tɔhonɔ̀ be ŋùkɔ̀[76].

⁷Wò la sɔ lifi àku-àku ɖo àgbà ɖe sia ɖe ji, ne bèa nyi ŋùkuɖojinu lè kpɔ̃nɔ tèpea. E la nyi vɔsa numème na Tɔhonɔ̀.

⁸Wo la nɔ sɔ wo ɖo Tɔhonɔ̀ be ŋùkɔ̀, lè Izràɛlviwo be nyikɔ mè, jɛ̃gbɔ̃zã ɖe sia ɖe gbè, kaka sɔ yì, eye be la nyi èzòɖùɖu kòkòɖàbì.

⁹E la nyi Arɔ̀n ku yebe ŋusùviwo tɔ̀. Wo la ɖù kpɔ̃nɔ kèa lè Tèpe Kɔ̀kɔ̀ɛ, ɖoa, ènu kɔ̀kɔ̀ɛ ŋutɔ be nyi ye wo ɖè lè Tɔhonɔ̀ be ènu ɖùɖu ŋuti na wo. Àjɔ̀ kòkòɖàbì be nyi na wo[77].”

¹⁰Izràɛl nyɔ̃nù ɖe be ŋusùvi kè be jì na Ejiptè ŋusù ɖe a ɖo Izràɛlviwo dòmè, lè àsàɖaa mè; ye ku Izràɛl ŋusù ɖe kpe àkɔ;

¹¹Izràɛl nyɔ̃nùa be ŋusùvia dovlo Mawu be nyikɔa[78]; ekèa ŋutia, wo kplɔ̀ ɛ̀ va Mosè gbɔ. Ènɔ̀a be nyikɔ ye nyi Selomit; e nyi Divri kè so Dàn be jìjimèa be nyɔ̃nùvi.

¹²Wo le è dà ɖo ɖiatɔwo gbɔ, wàlɛbɛ kè wo le nɔ̀tè kpɔ Tɔhonɔ̀ be ɖoɖo, so e ŋutia.

¹³Ekèa yomè a, Tɔhonɔ̀ gblɔ̃ na Mosè be:

¹⁴“Ɖè àmè kè zũ àmèa to lè àsàɖaa mè; àmè kèwo keŋu sè èzũawo ne vlũ àlɔ̀ ɖo èta ji na ɛ̀, eye àmèha bliboa ne pò èkpe è wù.

¹⁵Ekèa yomè a, wò la gblɔ̃ na Izràɛlviwo be: 'Ne àmè ɖe zũ yebe Mawu a, àmèa la dro yebe èvuɛ̃ be àgbã;

¹⁶ekèa ŋutia, àmè kè dovlo Tɔhonɔ̀ be nyikɔa, wo la wù ì: àmèha bliboa la pò èkpe è wù. Ne e nyi àmèjro, àlo, àxuevia, wo la wù ì, ɖoa, e dovlo Mawu be nyikɔa.

¹⁷Ne àmè ɖe wù àgbètɔa, àmè ɖe kpekpe kè be nyia, wo la wù ye cã.

¹⁸Ne e wù èlã ɖe a, e la sɔ èlã ŋua be èbu ɖo e tèpe, àgbè ɖo àgbè tèpe.

¹⁹Ne àmè ɖe do àfɔ̀ku yebe èdùmèvi, sɔ gble ènu lè e ŋutia, wo la trɔ wɔ̀ nène be ènua na ye cã.

²⁰Ne e ŋɛ̃ èpu na àmèa, wo la ŋɛ̃ èpu ŋua ke, na ye cã; ne ŋùkuvi be gbã na àmèa, wo la gbã ŋùkuvi ŋua ke na ye cã. Ne àɖu ye be ŋɛ̃a, wo la ŋɛ̃ àɖu na ye cã. Wo la wɔ̀ ènu kè be wɔ̀ ku àmè bua ku ye ŋutɔ cã[79].

²¹Àmè kè wù èlã ɖe a, la na èbu ɖo e tèpe; àmè kè wù àmèa, wo la wù ye cã.

²²Èse ɖèka kpò ye la kplɔ̀ mìa kpata; àmèjro cã, mìawo ŋutɔ cã, èse ɖèka ye la kplɔ̀ mì, ɖoa, ènyè Tɔhonɔ̀ ye nyi mìabe Mawu[80].”

²³Ekèawo ye Mosè gblɔ̃ na Izràɛlviwo. Wo ɖè àmè kè zũ àmèa to lè àsàɖaa mè, eye wo pò èkpe è, be ku. Nène ye Izràɛlviwo wɔ̀ ɖo ɖoɖo kè Tɔhonɔ̀ sɔ do àsi na Mosè a jia yeŋu.