Read gen Levìwo 25 Bible Online

Levìwo 25 - gen bible

Levìwo 25

¹Tɔhonɔ̀ gblɔ̃ na Mosè, lè Sinaì be ètoa ji be:

²“Gblɔ̃ na Izràɛlviwo be: Ne mì ɖo ànyigbã kè mù sɔ le na mìa jia, mì la nɔ na ànyigbãa la nɔ gbɔ̃jɛ̃, na Tɔhonɔ̀.

³Mì la nɔ sɔ èpè àdɛ̃, sɔ nɔ do ènu ɖo mìabe àgblè mè; mì la nɔ sɔ èpè àdɛ̃, la sɔ nɔ kpà mìabe vɛ̃-gblè be àmàkpawo, la nɔ yà nukuwo.

⁴Èpè adrɛ̃gɔ̃ a, ànyigbãa la sɔ gbɔ̃jɛ̃; e la nyi hùenu kè ànyigbãa la sɔ gbɔ̃jɛ̃ na Tɔhonɔ̀a. Mì mu la ɖo ènu ɖekpe ɖo àgblè mè ò. Mì mu la kpà vɛ̃-gble be àmàkpawo ò.

⁵Mì mu la yà nuku kèwo la mìɔ̃, lè woa ɖokoe sinu, so gà kè mè mì yà nuku va yìa ò; mì mu la kɛ̃ vɛ̃-kpo kèwo la sɛ̃ ɖo mìabe vɛ̃-gblè kèwo la to àvea mè ò. Hùenu ŋua la nyi èpè kè mè ànyigbãa la gbɔ̃jɛ̃a.

⁶Vɔ̀a, mì la ɖù ènu kè la mìɔ̃, lè ye ɖokoe sinu, lè ànyigbãa ji, lè èpè ŋua mèa, mìa ku mìabe sumɔ̃viwo, mìabe kòsìwo[81], àmè kèwo le wɔ̀ àpàdɔ lè mìa gbɔa, àmèjro kèwo va zɛ̃ mìa gbɔa ku àmè kèwo keŋu lè mìabe èdù mèa.

⁷Mìabe èlãhawo ku ègbemèlã kèwo ye lè mìabe ànyigbãa jia, wo la ɖù ènu kè kpata la to lè ànyigbãa jia[82].”

⁸Mì la hlɛ̃ èpè adrɛ̃, zè adrɛ̃, ekè la wɔ̀ èpè èkà ci àsiɖèkɛa.

⁹E yomè a, wètri adrɛ̃gɔ̃ a be ŋùkèkè èwogɔ̃a gbèa, mì la ku èkpɛ̃, lè ànyigbã kpata ji, la sɔ kafu Tɔhonɔ̀, na sɔsɔkè be ŋùkèkè gãa.

¹⁰Mì la kɔ̀ èpè èkà ci èwogɔ̃a ŋuti, eye mì la ɖè àblɔ̀ɖè be gbèfã na ànyigbãa ji tɔwo kpata, eye be la nyi jìjɔɛ be àzãdùɖu na mì. Mìa dòmètɔ ɖe sia ɖe la trɔ yì yebe xòmè mè, eye àmè sia àmè la gbà trɔ xɔ̀ ènu kè nyi ye tɔ̀a.

¹¹Èpè èkà ci èwogɔ̃a la nyi jìjɔɛkpɔkpɔ be èpè na mì: mì mu la do ènu ò, mì mu la yà nuku kè mìɔ̃ lè ye ɖokoe sinua ò. Mì mu la kɛ̃ vɛ̃ku kè la sɛ̃ ɖo vɛ̃ka kèwo la ɖɔ gbea ji ò.

¹²Ɖoa, jìjɔɛkpɔkpɔ be èpè kè mì la wɔ̀ kɔ̀kɔ̀ɛa ye be la nyi na mì. Mì la ɖù ènu kè la mìɔ̃ lè ye ɖokoe sinu, ɖo àgblèwo mèa.

¹³Lè jìjɔɛkpɔkpɔ be èpè kèa mèa, àmè sia àmè la trɔ yì xɔ̀ ye ŋutɔ be ànyigbã.

¹⁴Ne àjɔ ye mì dona a, ne ènu mì sà do mìabe èhavi, àlo, ènu mì plè lè e sia, mìa dòmètɔ ɖekpekpe mu gbà tafu nɔ̀via ò.

¹⁵Ne mì la plè ènu lè mìabe èhavi sia, mìa le ŋùkuvi ɖo èpè nène kè va yì, so jìjɔɛkpɔkpɔ be èpèa jia ŋuti; eye, nènea kea, ne mì la sà ènu do mìabe èhavia, mìa le ŋùkuvi ɖo nukuyàya be èpèwo ŋuti.

¹⁶Ne èpè sùgbɔ kpɔ̀tɔ̀a, ènu pèple be àsìawo la zɔ̃ ɖo e ji, la yìji; ne èpè sùgbɔ mu kpɔ̀tɔ̀ ò a, ènu pèple be àsìawo la zɔ̃ ɖo e ji, la ɖiɖi. Ɖoa, ènu kè wo la sàa le so nukuyàya nenè ɖe mè.

¹⁷Mìa dòmètɔ ɖekpe mu gbà tafu nɔ̀via ò, vɔ̀a, mì vɔ̃ mìabe Mawu. Ɖoa, ènyè ye nyi Tɔhonɔ̀, mìabe Mawu.

¹⁸Mì wɔ̀ ɖo èse nyèwo ji; mì le èkɔ̀do nyèwo ɖo àsi, ne mìa zɔ̃ ɖo woa ji, àleke be mìa nɔ̀ ànyigbã kè mù sɔ le na mìa ji lè ɖàgbè mè.

¹⁹Ànyigbã a la na yebe nukuwo, mì la ɖùnu, la ɖɔpò, eye mì la nɔ̀ ànyigbãa ji, lè ɖàgbè mè.

²⁰Mì la biɔ mìa ɖokoewo sè be: “Nukɛ ye mi la ɖù, lè èpè adrɛ̃gɔ̃ a mè, ne mi mu do ènu, ne mia yà ènu ò?”

²¹E nyɔ! Mù la ɖo àpe sìtu ɖoɖa mìa ji, lè èpè àdɛ̃gɔ̃ a mè, àleke be, e la na, nukuyàya kè la sù ɖo èpè ètɔ̃ nu na mìa.

²²Èpè ènyigɔ̃a mèa, mì la do ènu, gãkea, ènu kèwo mì yà va yìawo ke ye mì la gbà ɖù, kaka sɔyì èpè àsiɖèkɛgɔ̃a mè, wàlɛbɛ kè wo la wu èpè ŋua mè be nukuyàya nua, mì la gbà teŋu ɖù nuku xoxowo.

²³Èdùa mè be ànyigbãa, wo mu la sà ɛ̀ gbidi ò, ɖoa, tɔ̀ nyè ye nyi ànyigbãa. Àmèjrowo ku èmɔzɔ̃tɔwo kpò mì nyi, lè gbɔ nyè.

²⁴Ekèa ŋutia, lè mìabe ànyigbã bliboa jia, èmɔɖèɖe lè be wo ne gbà teŋu xɔ̀ ànyigbã plè.

²⁵Ne mìa nɔ̀vi ɖe jè àkui, eye be ɖo la sà yebe ànyigbã be àkpa ɖe a, àmè kè la xɔ̀ àwòba-nua plè, eye be la so ye ŋutɔ be xòmèa, la va xɔ̀ ènu kè nɔ̀via sàa plè.

²⁶Ne àmè ɖe mu ɖo àmè ɖekpe kè la teŋu xɔ̀ àwòba-nua plè ò, vɔ̀a, ye ŋutɔ kpɔ èmɔnu kè be la sɔ xɔ̀ àwòba-nua plèa,

²⁷e la hlɛ̃ èpè nenè kè va yì, so gà kè mè be sà ènua, la tu èpè kè to lè e mèa be èfɛ̃ na ènuplètɔa, eye be la gbìgbɔ̀ xɔ̀ yebe ènua.

²⁸Ne ye ŋutɔ mu ɖo èmɔnu, la sɔ plè ènu kèa ò a, ènu kè be sàa la ci àmè kè plè èa si, kaka sɔ na jìjɔɛkpɔkpɔ be èpèa mè. Èpè ŋua mèa, wo la jo ènua, eye be la gbìgbɔ̀ trɔ nyi àmè kè sà ɛ̀a tɔ̀.

²⁹Ne àmè ɖe sà àxue ɖe kè mè àmè nɔ̀nà, lè àgbògbò be èdù ɖe mèa, kaka na èpè kè mè wo sà àxuea lèa be ènuwuwua, wo gbà teŋu xɔ̀ ɛ̀ plè ke. Xɔ̀xɔ plè be jènaa lè na hùenu viɖe kpò.

³⁰Ne, lè èpè ɖèka mèa, wo mu xɔ̀ àxuea plè ò a, eŋuã, àxue kè lè àgbògbò be èdùa mèa la trɔ zũ àmè kè plèa tɔ̀ gbidi. Eye be la nyi yebe jìjimèviwo tɔ̀, lè e yomè. Lè jìjɔɛkpɔkpɔ be èpèa mèa, wo mu la gbà teŋu xɔ̀ ɛ̀ plè lè e si ò.

³¹Wo la sɔ kɔpe kèwo mu nyi àgbògbò be èdù ò a be àxuewo sìgbè ànyigbãa ji be àgblèwo nène. Wo teŋu xɔ̀ wo plè, lè jìjɔɛkpɔkpɔ be èpèa mè, eye wo la jo àxueawo.

³²Levìwo kpɔ èmɔ la gbìgbɔ̀ xɔ̀ woabe àxuewo plè, wè sia wè, lè Levìwo be èdù kèwo nyi woa tɔ̀awo mè[83].

³³Ne e nyi be Levì ɖe ye plè è ŋutɔ cã a, àxue, àlo, èdù kè nyi Levìwo tɔ̀a, ne jìjɔɛkpɔkpɔ be èpèa vaa, e la trɔ ɛ̀ sɔ na, ɖo Levì be èdù mè be àxue ye be nyi. Levìwo be ènu wo nyi, lè Izràɛlviwo dòmè.

³⁴Vɔ̀a, wo mu kpɔ èmɔ la sà àgblè kèwo trɔ do Levìwo be èdùwo ò. Ɖoa, Levìwo be ènuɖoɖo kòkòɖàbì ye wo nyi.”

³⁵Ne nɔ̀vi wò jè àkui, eye mu la teŋu tu èfɛ̃ kè be ɖù do wòa, na wò ò a, ne e nyi àmèjro kè va le yì, àlo, àmèjro kè va zɛ̃ gbɔ wòa, wò ɖo la do è àlɔ̀, ne bèa teŋu nɔ̀ àgbè, lè àxàda mè na wò.

³⁶Wò mu la ɖù àlè lè e ji, àlo la xɔ̀ àjɔ̀ lè e si ò. Nène a ye wò la wɔ̀, la sɔ vɔ̃ àpo Mawu, eye nɔ̀vi wòa la teŋu nɔ̀ àgbè, lè àxàda mè na wò.

³⁷Wò mu la do àpo ègà na ɛ̀, ne wòa sɔ kpɔ àlè ò; wò mu la sɔ ènu ɖùɖu na ɛ̀, ne wòa sɔ kpɔ àlè, lè e ji ò[84].

³⁸Ènyè ye nyi Tɔhonɔ̀, mìabe Mawu kè kplɔ̀ mì to lè Ejiptè-nyigbã ji, àleke be ma sɔ Kanàn-nyigbãa sɔ na mì, ne ma nyi mìabe Mawu.”

³⁹“Ne nɔ̀vi wò ɖù èfɛ̃ do wò, eye be sɔ ye ɖokoe sà na wòa, wò mu la sɔ ɛ̀ wɔ̀ kluvi ò.

⁴⁰Wò la hɛ̃ ɛ̀, sìgbè èdɔwɔ̀tɔ kè la xɔ̀ èfɛ̃tua nène, àlo, sìgbè àmèjro nène. E la nyi àpo sumɔ̃vi, kaka ɖo àmèjojo be èpèa mè.

⁴¹Wàlɛbɛ ŋua, e la jo lè gbɔ wò ku èviawo, eye be la trɔ yì yebe hɛ̃nu mè. E la trɔ yì ècrɔ̃nu kè ètɔawo gble ɖɛ na ɛ̀a mè.

⁴²Nyàwo be nyi be àmè kèwo mù kplɔ̀ to lè Ejiptè-nyigbã jiawo nyi sumɔ̃vi nyèwo. Àmè ɖe mu kpɔ èmɔ, la sà wo, ne woa nyi kluviwo ò.

⁴³Wò mu la sɔ àkpasɛ̃sɛ̃ sɔ zĩ woa ji ò. Nène a ye wò la vɔ̃ àpo Mawu a yeŋu.

⁴⁴Ne mì hiã kluvi ku kòsìwoa, mì la plè wo lè dùkɔ̃ kèwo trɔ do mìa gbɔ.

⁴⁵Mì gbà teŋu plè wo lè àmèjro kèwo va zɛ̃ mìa gbɔawo be èviwo dòmè, àlo lè woabe hɛ̃nu kèwo va ci mìabe ànyigbã jia dòmètɔ ɖe mè. Wo la nyi mìabe ènuɖoɖowo.

⁴⁶Gbè ɖèkaa, mì la gble wo ɖɛ, eye wo la nyi ècrɔ̃nuwo na mìabe jìjimèviwo. Woawo yaa, mì teŋu zĩ woa ji, kaka sɔ yì. Vɔ̀a, mìa nɔ̀vi Izràɛlviwoa, mìa dòmètɔ ɖekpe mu kpɔ èmɔ, la zĩ mìa nɔ̀vi ɖe ji ku àkpasɛ̃sɛ̃ ò[85].

⁴⁷Ne ègà lè àmèjro ɖe, àlo àmè ɖe kè va zɛ̃ mìa gbɔa si, eye nɔ̀vi wò ɖù èfɛ̃ do è, eye nɔ̀vi wòa sɔ ye ɖokoe sɔ sà do è, àlo sɔ sà do àmèjrowo be kɔ̀ta mè vi ɖe a,

⁴⁸ne wo plè nɔ̀vi wòa vɔ̀ ŋutɔ cã a, wo gbà teŋu xɔ̀ nɔ̀vi wòa plè: nɔ̀viawo dòmètɔ ɖe teŋu xɔ̀ ɛ̀ plè.

⁴⁹Àtavia ɖe, àtàgãa ɖe, nyìnea ɖe, àlo woa dòmètɔ ɖe be èvi teŋu xɔ̀ nɔ̀vi wòa plè, àlo xòmèa mètɔ kè so ye ŋutɔ be hɛ̃nu mèa teŋu xɔ̀ ɛ̀ plè, àlo ne àlɔ̀mè lè e sia, ye ŋutɔ teŋu xɔ̀ ye ɖokoe plè.

⁵⁰Ne e la nyi nènea, ye ku àmè kè plè èa, wo la hlɛ̃ èpè nenè kè va yì, so gà kè mè wo plè èa ku jìjɔɛkpɔkpɔ be èpèa dòmè, àleke be, ne wo sɔ ɛ̀ ɖo èdɔwɔ̀tɔ be gbè sia gbè be èfɛ̃tu ji, lè èpè ŋuawo mèa, xɔ̀xɔplè be ècia ne sɔ̀ ɖo e nu.

⁵¹Ne èpè sùgbɔ gbà kpɔ̀tɔ̀a, e la sɔ xɔ̀xɔplè be èfɛ̃a be àkpa ɖe kè la sɔ̀ ku ègà kè wo sɔ plè èa na ɖo e nu.

⁵²Ne èpè viɖe kpò ye kpɔ̀tɔ̀, kaka sɔyì jìjɔɛkpɔkpɔ be èpèa mèa, e la hlɛ̃ èpè kè kpɔ̀tɔ̀a, eye be la tu xɔ̀xɔplè be èfɛ̃ kè sɔ̀ ku kpɔ̀tɛa.

⁵³Ne èpè le jè èpèwo jia, àmèa la nyi èdɔwɔ̀tɔ xɔ̀ èfɛ̃tu, lè àmè kè plè èa gbɔ, vɔ̀a, àpetɔa mu kpɔ èmɔ la nɔ sɛ̃ ètamè ɖo e ŋuti ò.

⁵⁴Ne àmè kè wo plèa mu to èmɔ vòvò kèwo mù gblɔ̃ va yìawo dòmètɔ ɖe nu, sɔ kpɔ àblɔ̀ɖè ò a, eŋuã, ne jìjɔɛkpɔkpɔ be èpèa va ɖoa, wo la ɖè àsi lè ye ku èviawo ŋuti ne woa jo.”

⁵⁵“Ɛ̃ɛ, ènyè ye Izràɛlviwo nyi sumɔ̃viwo na; sumɔ̃vi nyèwo ye wo nyi. Woawo kè mù kplɔ̀ to, jo lè Ejiptè-nyigbã jia. Ènyè ye nyi Tɔhonɔ̀, mìabe Mawu.”