Read gen Levìwo 27 Bible Online

Levìwo 27 - gen bible

Levìwo 27

¹Tɔhonɔ̀ gblɔ̃ na Mosè be:

²“To na Izràɛlviwo be: Ne àmè ɖe fìã àjɔ̀gbè be yè la sɔ àgbètɔ na Tɔhonɔ̀a,

³àmèa teŋu xɔ̀ àjɔ̀gbèa plè ku ègà ɖe: Ne àmè kè be àjɔ̀gbè wo fìãa ɖo so èpè èwì ji sɔ yì èpè èkà takpo jia, wo la na mawuxɔa mè be ègà sekɛ̀l èkà ci èwo, ne àmèa nyi ŋusùa;

⁴ne àmèa nyi nyɔ̃nùa, wo la na mawuxɔa mè be ègà, sekɛ̀l ègbã.

⁵Ne àmèa ɖo so èpè àtɔ̃ ji, sɔ yì èpè èwì jia, ne e nyi ŋusùvia, wo la na mawuxɔa mè be ègà, sekɛ̀l èwì; ne e nyi nyɔ̃nùvia, wo la na mawuxɔa mè be ègà, sekɛ̀l èwo.

⁶Ne àmèa ɖo so wètri ɖèka ji, sɔ yì èpè àtɔ̃ jia, ne e nyi ŋusùvia, wo la na mawuxɔa mè be ègà, sekɛ̀l àtɔ̃; ne e nyi nyɔ̃nùvia, wo la na sekɛ̀l ètɔ̃.

⁷Ne àmèa ɖo èpè èkà-takpo, àlo, ɖo to e ŋutia, ne àmèa nyi ŋusùa, wo la na mawuxɔa mè be ègà, sekɛ̀l woeàtɔ̃; ne àmèa nyi nyɔ̃nùa, wo la na mawuxɔa mè be ègà, sekɛ̀l èwo.

⁸Ne àmè kè fìã àjɔ̀gbèa nyi wɔ̀amènɔ̀, àleke be mu la teŋu tu ègà kè àmè kè fìã àjɔ̀gbè kèa ɖo la tu òa, e la kplɔ̀ àmèa va ɖo hũbonɔa be ŋùkɔ̀, ne hũbonɔ bèa do àsì na ɛ̀. Nène a, hũbonɔa la le ŋùkuvi ɖo àmè kè fìã àjɔ̀gbèa be èhiã jèjea ŋuti, la sɔ do àsì na àmè kè ta wo fìã àjɔ̀gbèa ɖoa.

⁹Ne àjɔ̀gbèa kã èlã ɖe kè wo sɔ, lè ekèwo wo sɔ sanavɔ na Tɔhonɔ̀a dòmèa, eŋuã èlã ɖekpekpe kè wo sɔ na Tɔhonɔ̀a, trɔna zũ ènu kɔ̀kɔ̀ɛ.

¹⁰Àmè ɖe mu gbà kpɔ èmɔ, la sɔ èbu, sɔ ɖɔ̀lì ì, àlo, la sɔ ɖo e tèpe ò. Wo mu la gbà teŋu sɔ ɖekpekpe kè wo kpɔ be e nyɔ wua ŋutɔ cã, sɔ ɖo e tèpe ò. Ne e va va e mè be, wo la va dɔ̀lì ì kpò ye à, eŋuã, èlã kè wo sɔ le ɖo èbu tèpea cã trɔ zũ ènu kɔ̀kɔ̀ɛ, sìgbè ekè tèpe wo sɔ le ɖoa ke nène.

¹¹Ne èlã nyi èlã màkɔ̀ màkɔa, ne àjɔ̀gbèa lè èlã ɖe kè wo mu la teŋu sɔ savɔ na Tɔhonɔ̀ ò a, wo la sɔ èlãa sɔ ɖo hũbonɔa be ŋùkɔ̀;

¹²hũbonɔa la do àsì ɖo leke be nyɔ, àlo mu nyɔ ò a nu, eye wo la sɛ̃ àsìdodo kèa ji.

¹³Ne àmè kè tɔ̀ ye nyi èlãa jro be yèa xɔ̀ ɛ̀ plèa, àmèa la sɔ àsì kè hũbonɔa do na èlãa be ècia be mamã àtɔ̃gɔ̃a kpe èci kè hũbonɔa na a, la sɔ xɔ̀ èlãa plè.

¹⁴Ne àmè ɖe kɔ̀ yebe àxue ŋuti na Tɔhonɔ̀a, hũbonɔa la do àsì na àxuea, ɖo lekè be nyɔ ɖo, àlo, mu nyɔ ɖo òa nu, eye, àsì kè hũbonɔa do na àxuea nu ye ji wo la sɔ ɛ̀ ɖo.

¹⁵Ne àmè kè kɔ̀ yebe àxue ŋuti na Tɔhonɔ̀a jro la xɔ̀ ɛ̀ plèa, eŋuã, e la sɔ èci kè hũbonɔa do a be mamã àtɔ̃gɔ̃a kpe è.

¹⁶Ne àmè ɖe kɔ̀ yebe ànyigbã be àgblè ɖe ŋuti na Tɔhonɔ̀a, yebe ècia nyi ènu kè wo teŋu do ɖo àgblèa mèa be èci; ekèa ye nyi sekɛ̀l èkà ci èwo na jijenu homer ɖèka be èlù dodo.

¹⁷Ne wo kɔ̀ àgblèa ŋuti, so jìjɔɛkpɔkpɔ be èpèa mè kea, èci xɔ̀xɔ kèa ye be la nyi[89].

¹⁸Ne jìjɔɛkpɔkpɔ be èpèa va yì gbɔ̀xue wo kɔ̀ àgblèa ŋuti na Tɔhonɔ̀a, hũbonɔa la bù ègà, zɔ̃ ɖo èpè nenè kè kpɔ̀tɔ̀, kaka sɔ na jìjɔɛkpɔkpɔ be èpè kè la gbà vaa mè, eye àsì kè wo do a la ɖiɖi.

¹⁹Ne àmè kè kɔ̀ yebe àgblè ŋutia jro la xɔ̀ ɛ̀ plèa, e la sɔ àsìa be mamã àtɔ̃gɔ̃a sɔ kpe è, eye be la trɔ xɔ̀ yebe àgblèa.

²⁰Ne mu xɔ̀ àgblèa plè ò, vɔ̀a, sɔ ɛ̀ sà do àmè bua, eŋuã, ye ŋutɔ mu gbà kpɔ èmɔ, la jro be yèa gbà xɔ̀ ɛ̀ plè ò.

²¹Ekèa yomè a, ne jìjɔɛkpɔkpɔ be èpè va, eye wo la ɖè àsi lè àgblèa ŋutia, e la nyi ènu kè ŋuti kɔ̀ na Tɔhonɔ̀a. Sìgbè lekè wo dona èse ɖo bùsunu ŋuti nènea, àgblèa la trɔ zũ hũbonɔa tɔ̀ gbidi-gbidi.

²²Ne wo kɔ̀ àgblè ɖe kè wo plè, ekè mu nyi tɔgbewo be ècrɔ̃nu na àmè ò a ŋuti na Tɔhonɔ̀a,

²³hũbonɔa la bù nenè kè yebe àsì la nyia, kaka sɔ na jìjɔɛkpɔkpɔ be èpèa mè, eye wo la sɔ yebe ègà na, gbè ŋua gbè ke; è trɔ zũ ènu kɔ̀kɔ̀ɛ na Tɔhonɔ̀.

²⁴Vɔ̀a, ne jìjɔɛkpɔkpɔ be èpè ɖoa, àgblèa la gbà trɔ nyi àmè kè plè àgblèa sãa tɔ̀, e la trɔ yì na àmè kè be ènu be nyia.

²⁵Mawuxɔa mè be ègà sekɛ̀l ye wo la sɔ do àsìawo keŋu. Sekɛ̀l ɖèka nyi gerà èwì[90]

²⁶Àmè ɖèka mu la sitè, la kɔ̀ yebe èlãhaa mè be èvi cucugbãa ɖe ŋuti na Tɔhonɔ̀ ò, ɖoa, sìgbè èvi cucugbãa nènea, wo nyi Tɔhonɔ̀ tɔ̀ xoxo, ènyì, àlo àlɛ̃ ku ègbɔwo keŋu.

²⁷Ne e nyi èlã màkɔ̀-màkɔ̀ ɖe a, wo teŋu xɔ̀ ɛ̀ plè, ne wo sɔ yebe ècia be mamã àkpa àtɔ̃gɔ̃a kpe àsì kè wo do na ɛ̀a be ècia.

²⁸Sɔ kpe èa, ènu kèwo keŋu lè àmè si, sìgbè àgbètɔ, èlã, àlo, àgblè kè lè àmè be ànyigbã jia nènea, ne èse kù ì, na Tɔhonɔ̀a, wo mu la teŋu sà ɛ̀, kaka la va xɔ̀ ɛ̀ plè ò: ènu ɖekpekpe kè èse kù, na Tɔhonɔ̀a, trɔ zũ ènu kè lè kɔ̀kɔ̀ɛ ŋutɔa na Tɔhonɔ̀[91];

²⁹eye, ne àgbètɔ ŋutɔ cã ye èse kù, eye wo do èse ɖo e ŋutia, wo mu la gbà teŋu xɔ̀ ɛ̀ plè ò, wo la crɔ̃ ɛ̀.

³⁰Ènu be mamã èwogɔ̃ ɖekpekpe kè wo dè lè ànyigbãa ji be àgblèmè nukuwo, àlo, lè àtiku sɛ̃sɛ̃wo ŋutia nyi Tɔhonɔ̀ tɔ̀; ènu kè ŋuti kɔ̀ ŋutɔa ye be nyi na Tɔhonɔ̀.

³¹Ne àmè ɖe ji la xɔ̀ yebe ènu be mamã èwogɔ̃a plèa, e la sɔ mamã èwogɔ̃a be mamã àtɔ̃gɔ̃a kpe è.

³²Èlãha be mamã èwogɔ̃ ɖekpekpe kè nyi ènyì, àlɛ̃, àlo ègbɔa, èlã èwogɔ̃ ɖekpekpe kè wo sɔ èlãkplɔ̀-kpò sɔ hlɛ̃a nyi ènu kɔ̀kɔ̀ɛ na Tɔhonɔ̀.

³³Àmè kè tɔ̀ ye nyi èlãa, mu kpɔ èmɔ, la ji èlã kè nyɔ, àlo kè mu nyɔ ò a ò; mu kpɔ èmɔ la ɖɔ̀lì èɖe, lè woa dòmè ò. Ne e ji be yè la ɖɔ̀lì ì kpò ye à, eŋuã, èlã kè wo le ɖɔ̀lìa ku kè wo sɔ le ɖɔ̀lì ìa cã, èvèawo keŋu trɔ zũ ènu kɔ̀kɔ̀ɛwo na Tɔhonɔ̀. Wo mu la teŋu xɔ̀ wo plè ò.”

³⁴Ekèawo ye nyi èse kèwo Tɔhonɔ̀ sɔ do àsi na Mosè, lè Sinaì be ètoa ji, ne bèa sɔ na Izràɛlviwo.