Read gen Levìwo 3 Bible Online

Levìwo 3 - gen bible

Levìwo 3

¹Ne àmè ɖe la sɔ èlã, lè yebe èlãha mè, la sɔ wɔ̀ ŋuti fàfa be vɔsaa, ne e nyi ènyìa, e ɖo la sɔ àsu, àlo, ènɔ kè ŋuti èdɔ̀lele ɖekpe mu lè ò a.

²E la sɔ àlɔ̀ ɖo èta ji na ɛ̀, eye be la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea.

³Wo la sɔ ŋuti fàfa be vɔsa kèa be àmì kè trɔ do àdɔ̀gbo a wo a ku kèwo keŋu lè àdɔ̀mènuawo jia,

⁴kpe ɖo àyìku èvèawo ku àmì kè lè woa ŋutia kudo kè lè àlìmèa ŋuti, wo la ɖè àgòa,

⁵e yomè a, Arɔ̀n be èviwo la sɔ wo ɖo èzò nu ku ènumème vɔsa kè lè èzòtiawo ji, lè èzòa nu xoxoa. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.

⁶Ne àlɛ̃, àlo, ègbɔ ye e hɛ̃ va Tɔhonɔ̀ be ŋùkɔ̀, la sɔ wɔ̀ ŋuti fàfa be vɔsaa, e la sɔ èlãa, àsu, àlo, ènɔ kè ŋuti èdɔ̀lele ɖe mu lè ò a va.

⁷Ne àlɛ̃ ye e hɛ̃ vaa, e la sɔ ɖo Tɔhonɔ̀ be ŋùmè; Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.

⁸E la sɔ àlɔ̀ ɖo èta ji na ɛ̀, eye be la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea.

⁹Wo la ɖè àfi kèwo do àmìa: àsikea kpata, wo la ɖè è lè èjìmè-pua nu, àmì kè trɔ do àdɔ̀mènuawoa ku kè lè àdɔ̀mènuawo jia[3], ne woa sɔ ɖo Tɔhonɔ̀ be ŋùmè, la sɔ wɔ̀ ŋuti fàfa vɔsa, la tɔ ɛ̀ èzò, be la fiɔ̃, na Tɔhonɔ̀.

¹⁰Wo la ɖè àyìku èvèawo ku àmì kè lè woa ŋutia, kpe ɖo àmì kè lè àlìmèa ŋuti. Wo la ɖè àgòa cã ku àyìkuawo ɖodu.

¹¹Ekèa yomè a, mawunɔa la sɔ woa kpata ɖo èzòa nu, lè vɔsakpea ji. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi.

¹²Ne ègbɔ ye wo hɛ̃ vaa, wo la sɔ è ɖo Tɔhonɔ̀ be ŋùmè;

¹³àmèa la sɔ àlɔ̀ ɖo èta ji na ɛ̀, eye e la sò èhlò na ɛ̀, lè Ègòdodo be gòxɔa mɔnu. E yomè a, hũbonɔ, Arɔ̀n be èviawo la sɔ yebe èhũa wu, trɔ do vɔsakpea.

¹⁴Wo la ɖè àmì kè trɔ do àdɔ̀mènuawoa, ekè kpata lè àdɔ̀mènuawo jia, e la nyi ènu ɖùɖu kè wo la mè, be la fiɔ̃a va na Tɔhonɔ̀.

¹⁵Wo la ɖè àyìku èvèawo ku àmì kè lè woa ŋutia kpe ɖo àmì kè lè àlìmèa ŋuti. Wo la ɖè àgòa cã ku àyìkuawo;

¹⁶ekèa yomè a, hũbonɔa la sɔ woa kpata ɖo èzòa nu, lè vɔsakpea ji. Tɔhonɔ̀ be ènu ɖùɖu kè la fiɔ̃ keŋu-keŋu, la hɔ̃ɛ gbligbli, ne bèa jè ŋùmè na Tɔhonɔ̀a ye be nyi. Àmìawo kpata nyi Tɔhonɔ̀ tɔ̀.

¹⁷Èse màdà be nyi na mì, so jìjimè yì jìjimè, lè àfi ɖekpekpe kè mì lèa: ènu kè gbe nyi àmì, àlo, èhũ kpòa, mì mu la ɖù ì ò.”