Read gen Levìwo 5 Bible Online

Levìwo 5 - gen bible

Levìwo 5

¹E nyi èvuɛ̃ be, ne àmè ɖe sè wo yɔ, be wo ne va ɖù ɖase so ènu kè tèpe wo kpɔa ŋuti, àlo, so ènu kè wo sè a ŋuti, vɔ̀ àmèa mu gblɔ̃ ènu kè be nya ò a, àmèa la nɔ̀ yebe àgɔ̀jèjèa nu[5].

²Àlo, ne àmè ɖe mu nya ò, vɔ̀ tɔ àsi ènu màkɔ̀ màkɔ ɖe kè nyi: ègbemèlã ɖe be kuku, àxomèlã ɖe be kuku, èlãklìvi ɖe be kukua, àmèa ŋutɔ cã trɔ màkɔ̀ màkɔ, eye be jè àgɔ̀.

³Àlo, ne àmèa mu nya ò, vɔ̀ tɔ àsi àgbètɔ be ènu màkɔ̀ màkɔ ɖe kè nyi ènu ɖekpekpe kè nana àmè ŋuti mu kɔ̀nà ò a, eŋuã, so gà kè mè àmèa gbe sè ènu kè be wɔ̀a kpòa, e jè àgɔ̀.

⁴Àlo, ne gà kè mè, àmè ɖe mu nya ò, vɔ̀ kã àtãŋu ɖe kè ŋuti mu bù kpɔ ò, eye be hɛ̃ èvuɛ̃, àlo, ènyuɛ̃ va na ɛ̀, lè ènu ɖekpe kè mè àgbètɔ la kã àtãŋu kè ŋuti mu bù kpɔ òa, ne gà kè mè e gbe sè è kpòa, e jè àgɔ̀.

⁵Ne e jɔ̀ be àmè ɖe jè àgɔ̀, lè nɔ̀nɔmè kèawo dòmètɔ ɖe mèa, e ɖo la hũ èvuɛ̃ kè be wɔ̀a mè.

⁶E yomè a, e la hɛ̃ àlɛ̃nɔ ɖèka, àlo, ègbɔnɔ ɖèka va na Tɔhonɔ̀, la sɔ savɔ, ne bèa sɔ jrà èvuɛ̃ kè be wɔ̀a ɖo. Hũbonɔa la wɔ̀ èvuɛ̃ sɔsɔkè be èkɔ̀nua na ɛ̀.

⁷Ne àmè ɖe mu ɖo èmɔnu, la plè àlɛ̃, àlo, ègbɔ ò a, àmèa teŋu hɛ̃, àhɔ̃ne èvè, àlo, peplelu èvè, va na Tɔhonɔ̀, la sɔ jrà èvuɛ̃ kè be wɔ̀a ɖo. Wo la sɔ ɖèka savɔ ɖo èvuɛ̃a ta, eye wo la sɔ èvègɔ̃a wɔ̀ ènumème vɔsa.

⁸Àmèa la sɔ wo va na hũbonɔa. Hũbonɔa la sɔ èvuɛ̃ sɔsɔkè be vɔsaa ɖo Tɔhonɔ̀ be ŋùmè, cucugbãa; e la tro èkɔ̀ na èlãa, vɔ̀a, mu la ɖè ètaa jo ò.

⁹Hũbonɔa la kɔ̀ vɔsa-lãa be èhũa, trɔ do vɔsakpea be ŋuti, eye be la hlɛ̃ èhũ kpɔ̀tɛa ɖo vɔsakpea be ègũnu. Ekèa nyi èvuɛ̃ sɔsɔkè be vɔsa.

¹⁰Hũbonɔa la sɔ èlã èvègɔ̃a wɔ̀ ènumème vɔsa, sɔ zɔ̃ ɖo ɖoɖo kè Mawu na a nu. Ne hũbonɔa wɔ̀ èvuɛ̃ sɔsɔkè be èkɔ̀nua na ɛ̀a, eŋuã, Tɔhonɔ̀ la sɔ èvuɛ̃ kè be wɔ̀a kè è.

¹¹Ne àhɔ̃ne èvè, àlo, peplelu èvè, mu lè àmè ɖe si ò a, àmèa teŋu hɛ̃ èwɔ jijenu efà be mamã èwogɔ̃a ŋutɔ cã va savɔ ɖo èvuɛ̃ ta. Wo mu la kɔ̀ àmì ɖo e ji ò; wo mu la sɔ lifi kpe è ò, ɖoa, èvuɛ̃ be vɔsa ye be nyi.

¹²Àmèa la sɔ ɛ̀ va na hũbonɔa; hũbonɔa la kù àlɔ̀gògoe ɖèka, sìgbè ŋùkuɖojinu nène, eye be la tɔ ɛ̀ èzò, lè vɔsakpea ji, kpe ɖo ènu ɖùɖu kè wo tɔzɔ̀ na Tɔhonɔ̀a ŋuti. Èvuɛ̃ sɔsɔkè be vɔsa ye be nyi.

¹³Ne hũbonɔa wɔ̀ èvuɛ̃ sɔsɔkè be èkɔ̀nua na ɛ̀, ɖo èvuɛ̃ kè be wɔ̀a taa, eŋuã, Tɔhonɔ̀ la sɔ èvuɛ̃ kè be wɔ̀a kè è. Hũbonɔa la wɔ̀ èkɔ̀nua, sìgbè lekè be wɔ̀nà ènu nana tɔ̀a nène.”

¹⁴Tɔhonɔ̀ gbà pò nupo na Mosè, eye be gblɔ̃ na ɛ̀ be:

¹⁵“Ne àmè ɖe wɔ̀ bùsu-nu, eye mu nya ò, vɔ̀a wɔ̀ èvuɛ̃, sɔ pòɖi Tɔhonɔ̀ be ènu nana kɔ̀kɔ̀ɛa, e ɖo la hɛ̃ àgbò kè ŋuti èdɔ̀lele ɖekpe mu lè ò, kè be ègà nyi sekɛ̀l nenè ɖe a, mawuxɔa mè be sekɛ̀l, va na Tɔhonɔ̀, la sɔ jrà àgɔ̀ kè be jè a ɖo.

¹⁶Kpe ɖo ekèa ŋutia, e ɖo la tu èfɛ̃ kè be ɖù sãa, eye be la sɔ èfɛ̃a be mamã àtɔ̃gɔ̃a kpe ɖo e ŋuti, gbɔ̀xue la sɔ ɛ̀ na hũbonɔa. Ne hũbonɔa sɔ àgbòa wɔ̀ ènujràɖo be èkɔ̀nua na ɛ̀, eŋuã, Tɔhonɔ̀ la sɔ èvuɛ̃a kè è.”

¹⁷Ne àmèa mu nya ò, eye be dà lè Tɔhonɔ̀ be èseawo dòmètɔ ɖèka pɛ jia, e jè àgɔ̀, eye be la nɔ̀ yebe àgɔ̀jèjea nu.

¹⁸Àmèa la sɔ àgbò kè ŋuti èdɔ̀lele ɖekpe mu lè ò a ɖèka, kè be àsìxɔ̀xɔ sɔ̀ ku ènujràɖo be vɔsaa lè yebe èlãha mè, va na hũbonɔa. Ne hũbonɔa sɔ àgbòa wɔ̀ ènujràɖo be èkɔ̀nua na ɛ̀, ɖo àgɔ̀ kè be jè, lè mà-nyã mèa taa, eŋuã, Tɔhonɔ̀ la sɔ èvuɛ̃a kè è.

¹⁹Ènujràɖo be èkɔ̀nu be nyi, ɖoa, àmèa jè àgɔ̀ do Tɔhonɔ̀.”

²⁰Tɔhonɔ̀ gbà pò nupo na Mosè, eye be gblɔ̃ na ɛ̀ be[6]:

²¹“Ne àmè ɖe wɔ̀ èvuɛ̃, eye be wɔ̀ bùsu-nu ɖo Tɔhonɔ̀ ŋuti, le ɖà àjè na yebe èdùmèvi, so ènu ɖe kè wo sɔ ɖo e gbɔa ŋuti, so ènu ɖe kè be wea ŋuti, àlo, so ènu ɖe kè be fĩa ŋuti, àlo, e le tafu nɔ̀viaa,

²²ne e ɖà àjè so ènu ɖe kè àmè ɖe bu, eye be fɔ̀a ŋuti, eye, gbà wua, e ɖà àjè, le kã àtãŋu lè wɔ̀na kèawo dòmètɔ ɖe kè nyi èvuɛ̃a mèa,

²³àmè kè wɔ̀ èvuɛ̃ kèa, eye be jè àgɔ̀a, ɖo la trɔ ènu kè be fĩa na, àlo ènu kè be xɔ̀ lè nɔ̀via sia na, àlo, ènu kè wo sɔ ɖo e gbɔa na, àlo, ènu kè be fɔ̀a na,

²⁴e ɖo la trɔ ènu kè ŋuti, be ɖà àjè, sɔ kã àtãŋu ɖoa na; gbè kè gbè, e sè e gɔ̃mè be ye jè àgɔ̀a, e ɖo la trɔ ènua na, blibo, eye be ɖo la sɔ ènua be èci kè ènua xɔ̀a be mamã àtɔ̃gɔ̃a na ènutɔa.

²⁵E la gbà sɔ àgbò kè ŋuti èdɔ̀lele ɖekpe mu lè ò a ɖèka kè be àsìxɔ̀xɔ sɔ̀ ku èvuɛ̃ jràɖo vɔsaa, lè yebe èlãha mèa, va na hũbonɔa, ne bèa sɔ jrà ye ku Tɔhonɔ̀ dòmè ɖo.

²⁶Ne hũbonɔa wɔ̀ èvuɛ̃ sɔsɔkè be èkɔ̀nua na ɛ̀, lè Tɔhonɔ̀ be ŋùkɔ̀a, àgɔ̀ ɖekpekpe kè be jè a, Tɔhonɔ̀ la sɔ kè è.