Read gen Levìwo 9 Bible Online

Levìwo 9 - gen bible

Levìwo 9

¹Ŋùkèkè ènyigɔ̃a gbèa, Mosè yɔ Arɔ̀n ku yebe ŋusùviwo kudo Izràɛl be àmèsĩsĩwo.

²E gblɔ̃ na Arɔ̀n be: “Ji ènyìvi, na èvuɛ̃ sɔsɔkè be vɔsa ku àgbò ɖèka na ènumème vɔsa, èlã kèwo ŋuti èdɔ̀lele ɖekpe mu lè ò a, ne wòa sɔ wo va Tɔhonɔ̀ be ŋùkɔ̀.

³E yomè a, wò la gblɔ̃ na Izràɛlviwo be: 'Mì sɔ ègbɔsu ɖèka, na èvuɛ̃ sɔsɔkè be vɔsa ku ènyìvi ɖèka kudo èpè ɖèka be àlɛ̃vi ɖèka kèwo ŋuti èdɔ̀lele ɖekpe mu lè ò a, na ènumème vɔsa,

⁴gbàkudo ènyìsu ɖèka ku àgbò ɖèka, na ŋuti fàfa be vɔsa kè mì la wɔ̀ lè Tɔhonɔ̀ be ŋùmè a. Mì la wɔ̀ ènu ɖùɖu be vɔsa kè la nyi èwɔ meme kè wo la blù ku àmìa, ɖoa, egbèa, Tɔhonɔ̀ la ɖè ye ɖokoe fiɔ mì.'”

⁵Wo hɛ̃ ènu kèwo Mosè biɔawo va Ègòdodo be gòxɔa mɔnu, eye àmèha bliboa dɔ̃ va nɔ̀tè ɖo Tɔhonɔ̀ be ŋùkɔ̀.

⁶Mosè gblɔ̃ be: “Ènu kè be ègbè Tɔhonɔ̀ ɖè na mì, be mìa wɔ̀, ne yebe gogoa ne ze na mìa ye nyi ekèa.”

⁷Eye Mosè gblɔ̃ na Arɔ̀n be: “Dɔ̃ gogo vɔsakpea, ne wòa wɔ̀ àpo èvuɛ̃ sɔsɔkè be vɔsaa ku àpo ènumème vɔsa, ne wòa wɔ̀ sɔsɔkè be èkɔ̀nua ɖo ɖokoe wò ta, ku ɖo dùkɔ̃a ta, ne e yomè a, wòa sɔ dùkɔ̃a be ènu nana a na Tɔhonɔ̀, ne wòa gbà wɔ̀ sɔsɔkè be èkɔ̀nua ɖo e cã ta, sìgbè lekè Tɔhonɔ̀ ɖè ègbèa nène[14].”

⁸Arɔ̀n dɔ̃ gogo vɔsakpea, eye be sò èhlò na ènyìvi kè be la sɔ wɔ̀ èvuɛ̃ sɔsɔkè be vɔsaa, ɖo ye ŋutɔ be èvuɛ̃wo ta.

⁹Arɔ̀n be ŋusùviwo sɔ èhũa va ɖo ŋùkɔ̀ na ɛ̀; e sɔ àlɔ̀vi tɔ èhũa mè, sɔ ɖo àzò kèwo ye lè vɔsakpea be èto mèawo ji. E sɔ èhũ kpɔ̀tɛa kɔ̀ ɖo vɔsakpea be gɔ̃mè.

¹⁰E sɔ èlãa be àmìa, àyìkuawo ku àgòa ɖo èzòa nu, lè vɔsakpea ji, sìgbè lekè Tɔhonɔ̀ ɖè ègbè na Mosè a nène.

¹¹Wo sɔ èlã kpɔ̀tɛa ku àgbàzea yì do èzò mè, lè àsàɖaa godo.

¹²Arɔ̀n sò èhlò na ènumème vɔsa be èlãa; èviawo sɔ èlãa be èhũa na ɛ̀, eye be wu ì trɔ do vɔsakpea.

¹³Wo flì ènumème vɔsa be èlãa ɖo tèpe ènè, sɔ ɛ̀ na ɛ̀ ku ètaa, eye be sɔ ɖo èzò nu, lè vɔsakpea ji.

¹⁴E klɔ àdɔ̀mènuawo ku àfɔ̀awo, eye be sɔ wo ɖo èzòa nu ku ènumème vɔsaa.

¹⁵Arɔ̀n sɔ dùkɔ̃a be ènu nana a ɖo Tɔhonɔ̀ be ŋùmè: e le dùkɔ̃a be èvuɛ̃ sɔsɔkè be ègbɔsua, sò èhlò na ɛ̀, eye be sɔ wɔ̀ vɔsa be èlã cucugbãa.

¹⁶E sɔ ènumème vɔsaa ɖo Tɔhonɔ̀ be ŋùmè, ɖo ɖoɖo a nu.

¹⁷E sɔ ènu ɖùɖu be ènu nana a ɖo Tɔhonɔ̀ be ŋùmè: e kù èwɔa, àlɔ̀gògoe ɖèka, sɔ kpe ɖo ŋùdekɛ̃nyɛ be ènumème vɔsaa ŋuti, lè èzòa nu, lè vɔsakpea ji.

¹⁸E wù ènyìsu ku àgbò kè dùkɔ̃ na a, sɔ wɔ̀ ŋuti fàfa vɔsa; Arɔ̀n be èviwo sɔ èhũa na ɛ̀, eye be wu ì, trɔ do vɔsakpea.

¹⁹Ènyìsua ku àgbòa be àfi kèwo do àmì, ekèwo nyi àsike, àmì kè cɔ̃ àdɔ̀mènuawoa, àyìkuawo ku àgòa,

²⁰Arɔ̀n be èviwo sɔ wo ɖo àkɔtawo ji, eye wo sɔ wo ɖo èzòa nu, lè vɔsakpea ji.

²¹Arɔ̀n sɔ àkɔtawo ku ɖùsi mè be àtawo ɖo Tɔhonɔ̀ be ŋùmè, ɖo ɖoɖo a nu, sìgbè lekè Mosè ɖè ègbè na ɛ̀a nène.

²²E yomè a, Arɔ̀n kɔ àlɔ̀ yìji, ɖo dùkɔ̃a ji; Arɔ̀n tusì na dùkɔ̃a[15], eye, kè be wu èvuɛ̃ sɔsɔkè be vɔsaa, ènumème vɔsaa ku ŋuti fàfa vɔsaa nu vɔ̀a, e trɔ ɖì.

²³Mosè ku Arɔ̀n ɖo Ègòdodo be gòxɔa mè, gbìgbɔ̀ to va, tusì na dùkɔ̃a. E yomè a Tɔhonɔ̀ be gogo ze, na dùkɔ̃a kpata.

²⁴Èzò ɖe to lè Tɔhonɔ̀ be ŋùkɔ̀, eye be bì ènumème vɔsaa ku àmìawo lè vɔsakpea ji. Kè dùkɔ̃ bliboa kpɔ ɛ̀a, wo do àpa ku jìjɔɛ, eye wo sɔ ŋùmè cɔ̃ ànyi, sumɔ Tɔhonɔ̀.