Read gen Yeremìa 1 Bible Online

Yeremìa 1 - gen bible

Yeremìa 1

¹Yeremìa nyi Hilkiyà, hũbonɔ kèwo lè Ànatɔt, lè Bɛnyamìn be ànyigbã jiawo dòmètɔ ɖèka be èvi. Yeremìa be ènyàwo ye nyi ekèawo:

²Tɔhonɔ̀ be ègbè va na Yeremìa, wàlɛbɛ kè Yosìas kè nyi Yudà be ànyigbã a be èfìɔ, Amɔ̀n be èvia, lè yebe èfìɔɖùɖu be èpè woètɔ̃gɔ̃a mè.

³Tɔhonɔ̀ gbà pò nupo na ɛ̀ ke, so wàlɛbɛ kè Yosìas, Yudà be èfìɔa be èvi Yòyakìm le ɖùfìɔa kaka va na Yudà be èfìɔ Yosìas be èvi bu, Sedekìa be èfìɔɖùɖu be èpè woeɖèkagɔ̃a be wètri àtɔ̃gɔ̃a mè, wàlɛbɛ kè wo kplɔ̀ Yèruzàlɛmviwo yì gàtɔnugbea.

⁴Tɔhonɔ̀ be ègbè ɖì na mù be:

⁵“Gbɔ̀xue mù la wɔ̀ wò, ɖo ènɔ̀ wò be àdɔ̀ mèa, mù jèsi wò. Gbɔ̀xue wo la jì wòa, mù ɖè wò ɖo vò. Mù ɖo wò gblɔ̃ɖɛtɔ na dùkɔ̃wo”.

⁶Eye mù ɖo e ŋuti be: “Aò, Tɔhonɔ̀ Mawu! Kpɔɖa, nyè mu nya nupo pòpo ò, ɖoa, nyè mu sĩ ò!”

⁷Vɔ̀a, Tɔhonɔ̀ ɖo e ŋuti na mù be: “Mù gbà gblɔ̃ be: “Ɖèvi kpò mù gbà nyi ò.” Wò la yì àmè ɖekpekpe àmè kè gbɔ mù la dɔ̃ wò ɖoɖaa gbɔ, eye wò la do àŋɛ̀ ɖekpekpe àŋɛ̀ kè mù la do wòa.

⁸Mù gbà vɔ̃ wo ò, ɖoa, mù lè kù wò, ne ma hlùɛ̃ wò gã.” Tɔhonɔ̀ ye gblɔ̃ ɛ̀.

⁹Ekèa yomè a, Tɔhonɔ̀ drɛ̃ àlɔ̀, tɔ àsi ènu na mù, eye be gblɔ̃ na mù be: “Kpɔɖa, mù sɔ ènyà nyèwo le do ènu mè na wò.

¹⁰Kpɔɖa, so egbè jia, mù sɔ wò ɖo, dùkɔ̃wo ku èfìɔduwo nu, àleke be wò la hɔ̃ ènu, wò la kãkã ènu, wò la gbã ènu, ne wòa mù ènu pu ànyi, ne wòa tù ènu, ne wòa do ènu.”

¹¹Tɔhonɔ̀ be ègbè gbà ɖì na mù be: “Yeremìa, nukɛ wò le kpɔ ò?” Mù ɖo e ŋuti be: “Mù le kpɔ àcãŋùti[1] be àlɔ̀zɛ̃.”

¹²Eye Tɔhonɔ̀ gblɔ̃ na mù be: “Wò kpɔ ɛ̀ nyuɛ̃ ɖe, ɖoa, mù la kpɔ e gbɔ be ènyà kè mù gblɔ̃a, ne va e mè kaba.”

¹³Tɔhonɔ̀ be ègbè gbà ɖì na mù, zè èvègɔ̃a be: “Nukɛ wò le kpɔ ò?” Mù ɖo e ŋuti be: “Mù le kpɔ èze ɖe kè le fìɔ lè àdòkpo ɖe kè kpãŋùkɔ̀ èvègoa ji.”

¹⁴Eye Tɔhonɔ̀ gblɔ̃ na mù be: “Àvego ye jɔ̀gbèvuɛ̃ la so, la jè àmè kèwo keŋu lè ànyigbã kèa jiawo ji.

¹⁵Mù la yɔ èvègo be èfìɔduwo be hɛ̃nuwo keŋu. Tɔhonɔ̀ ye gblɔ̃ ɛ̀. Woabe èfìɔwo la va li woabe èfìɔzìkpewo ɖo Yèruzàlɛm be àgbowo nu keŋu, wo la li woabe èfìɔzìkpewo pòxla Yèruzàlɛm be èglìkpawo keŋu, wo la li woabe èfìɔzìkpewo pòxla Yudà-nyigbãa be èdùwo keŋu.

¹⁶Mù la dohùɛ do dùkɔ̃ nyèa, ɖo yebe àgɔ̀jèjewo ŋuti, ekè wo trɔ ŋùgbe do mù, ekè wo le tɔzò lifi, le savɔ na ènusɛ̃sɛ̃ buwo, ku ekè wo le sɛ̃ ènu kèwo woa ŋutɔ, wo sɔ woabe àlɔ̀wo wɔ̀a ŋuti.

¹⁷Vɔ̀a, èwò yaa, bla àlì ji! So, ne wòa ɖè ègbè ɖe sia ɖe kè mù do àsi na wòa, na wo! Wo mu gbà do ŋùklɛ̃ na wò ò, ne mu nyi nène òa, nyè ŋutɔ ye la do ŋùklɛ̃ na wò, le woabe ŋùkɔ̀.

¹⁸Kpɔɖa, so egbè jia, nyè ŋutɔ mù sɔ wò ɖo àgbògbò. Mù sɔ wò wɔ̀ gàyìbɔ be sɔti, mù sɔ wò wɔ̀, gàjɛ̃ be èglì kè la sitè ɖo ànyigbã a jitɔwo keŋu ŋuti, kè la sitè, ɖo Yudà be èfìɔa ŋuti, kè la sitè ɖo yebe àgbònùglawo ŋuti, kè la sitè ɖo yebe hũbonɔwo ku yebe èdùmèviwo ŋutia.

¹⁹Wo la wɔ̀ àvũ ku wò, vɔ̀a, wo mu la kpe ji wò ò. Ɖoa, mù lè ku wò, eye mù la nɔ xɔ̀ na wò.” Tɔhonɔ̀ ye gblɔ̃ ɛ̀.