Read gen Yeremìa 10 Bible Online

Yeremìa 10 - gen bible

Yeremìa 10

¹Mì, Izràɛl be àxuea, mì sè ènyà kè Tɔhonɔ̀ le gblɔ̃ na mìa.

²Ènyà kè Tɔhonɔ̀ gblɔ̃a ye nyi ekèa: “Mì mu gbà srɔ̃ dùkɔ̃wo be wɔ̀nawo ò! Jiŋùkusi be jèsìwo mu gbà sò àdìka na mì ò! Jèsìdo kèawoa, vòdu sumɔtɔwo ye wo sònà àdìka na.

³Ɖoa, dùkɔ̃wo be èkɔ̀nuwo nyi ènu gbalowo. Àti ye wo sònà lè àve mè, eye àɖàŋùdɔwɔ̀tɔ trɔna àsi so e ŋuti, sɔna kàkla kpànà ɛ̀ ku àcã,

⁴Wo sɔna klòsalò ku sìka dona àcã na ɛ̀, sɔna àplɛ̃ŋugò ku hãmà kana ɛ̀, ne mu gbà nɔ hũhũ ò.

⁵Sìgbè xèvi-nyànu lè àgbìsã-gble mè nènea, woabe àtikpàkpawo mu pònà nupo ò. Ɖe ye wo kɔna wo, ɖoa, wo mu la teŋu zɔ̃ ò. Mì mu gbà vɔ̃ wo ò, ɖoa, wo mu la teŋu wɔ̀ èvuɛ̃ ɖekpe ku àmè ò. Nène a ke, wo mu la teŋu wɔ̀ ènyuɛ̃ cã ò.”

⁶Aò, Tɔhonɔ̀, wò lòlo! Àmè ɖekpe mu teŋu sɔ̀ ku wò ò, Eye nyikɔ wò be ŋusɛ̃a be èvè mu lè ò!

⁷Àmè kɛ ye mu la jè èɖɛ̀ na wò ò, Oò, èdùwo keŋu be èfìɔ? Èwò kpò ye be jè na. Àmè ɖekpe mu lè sìgbè èwò nène, lè dùkɔ̃wo keŋu be àmè jè àɖàŋùwo dòmè, lè woabe èfìɔduwo keŋu mè ò[21].

⁸Leke woawo keŋu, wo lèa, wo flù keŋu, ɖoa, susu ɖekpe mu lè woa si ò. Legba kèwo nyi àtikpàkpawoa, be nunya màɖìnu ye wo le kpla.

⁹Klòsalò meme wo nyi, wo hɛ̃ so Tarsìs va. Sìka wo nyi, wo hɛ̃ so Ufàz va. Àɖàŋùdɔwɔ̀tɔ be èdɔwɔ̀wɔ sɔ̃ŋu ku gosìmitì be àlɔ̀nudɔ ye wo nyi, wo do àwù jɛ̃ hɛli na. Vɔ̀a, woa kpata, wo nyi àɖàŋùdɔwɔ̀tɔ be ènuwɔ̀wɔwo.

¹⁰Vɔ̀a, Tɔhonɔ̀ ye nyi Mawu àdodoea, E ye nyi Mawu àgbèagbè, èfìɔ kòkòɖàbìa. Ne e do àdɔ̀mèzea, ànyigbã bliboa hũhũna. Eye dùkɔ̃wo mu teŋu kpena yebe èjìbibi ji ò.

¹¹“Mì gblɔ̃ ènyà kèa na wo be: “'Vòdu kèawo, kèwo mu wɔ̀ jiŋùkusi ku ànyigbãa òa, nu la va yì, lè ànyigbã ji ku jiŋùkusi gɔ̃mè.”

¹²Ɖoa, Mawu ye sɔ yebe ŋusɛ̃ wɔ̀ ànyigbãa, e sɔ yebe àɖàŋù li xixea be dodoewo, eye be sɔ yebe ènunya vlũ jiŋùkusi ɖɛ.

¹³Ne e ɖè ègbèa, èsìwo jènàgo, va bɔ̀nà, lè jiŋùkusi, e yɔna lilikpowo va, so ànyigbã be ènukpòpewo, e ɖona èjikèzòwo àlo bìɖàwo ku èjijàja ɖoɖa, eye be hũnà èhɔ̃ na àyapòpo sɛ̃sɛ̃wo, so yebe fòtrowo mè.

¹⁴Àgbètɔwo keŋu flù eye ènunya hùe do wo. Gosìmitìwo keŋu ɖù ŋùkpɛ̃, ɖo woabe legbawo ŋuti. Àtikpàkpawo nyi àjè sɔ̃ŋu, ɖo àgbè gbɔ̃gbɔ̃ ɖekpe mu lè woa mè ò.

¹⁵Ènu màɖìnu kèwo nyi ènu ɖì-kokoewo, wàlɛbɛ kè woabe kòjoɖoɖo la vaa, wo la crɔ̃ keŋu-keŋu.

¹⁶Vɔ̀a, Yakɔb be Mawu a yaa, mu lè sìgbè legba ŋuawo nène ò. Ɖoa, e ye ɖo ènuwo kpata, kpe ɖo Izràɛl be xòmè kè be ɖo ye ŋutɔ be ècrɔ̃ɖùtɔa ŋuti. Tɔhonɔ̀, àhùadùwo be Èfìɔ ye nyi Mawu kèa be nyikɔ.

¹⁷Èwò Yèruzàlɛm, èdù kè wo xaa, eye wo zĩ ɖo ànyi a, fɔ̀ àgbã wòwo jò lè ànyigbã a ji.

¹⁸Ɖoa Tɔhonɔ̀ gblɔ̃ be: “Kpɔɖa, fifìa yaa, mù la sɔ ànyigbãa jinɔ̀tɔwo dãŋùgbe; mù la mimi wo, àleke be àsi ne sù woa ji.”

¹⁹“Bàbà na mù! Àfɔ̀ku kɛ ye nyi ekèa ò! Àbì nyèa trɔ zũ àbì màku gbèɖe! Ekèa ŋuti, mù le gblɔ̃ be: “Èfũkpekpe kèa ye nyi tɔ̀ nyè. Mù la dojì la sɔ ɛ̀.”

²⁰Wo kãkã gòxɔ nyèa keŋu-keŋu, wo sò yebe èkàwo keŋu-keŋu èvi nyèwo si gble mù ɖɛ, eye wo mu gbà lè ò. Àmè ɖekpe mu gbà lè, la gbà tù gòxɔ nyèa, la gbà ɖo nɔ̀pe na mù ò.”

²¹Èlãkplɔ̀tɔawo ci bòmè, ɖoa, wo mu ji Tɔhonɔ̀ be èmɔ̃ ò. Ekèa ŋutia, ènu ɖekpe mu jè e ji na wo ò, eye woabe èlãhawo keŋu kãhlɛ̃.

²²Mì pu èto ànyi, ne mìa sè è! Ènu ɖe le ɖì hòo, gbãnà. Àbòbo gã ɖe so èvègo-nyigbã ji gbãnà, ne bèa va trɔ Yudà-nyigbã ji be èdùwo zũ èglìkpowo, ne woa trɔ zũ gbètewo be nɔ̀pe.

²³Aò, Tɔhonɔ̀! Mù nya be àgbètɔ mu ɖo ŋusɛ̃ ɖekpe, ɖo ye ŋutɔ be àgbè be èmɔ̃wo ji ò. Eye èmɔ̃zɔ̃tɔ mu jɔ̀nà ye ŋutɔ be àfɔ̀ɖèɖe ò.

²⁴Tɔhonɔ̀, dɔ̃ èto na mù fàa, Gãkea, wɔ̀ ɛ̀ ku àlɔ̀ bɔ̀bɔɛ jro! Mù gbà pò mù ku àdɔ̀mèze ò. Ne mu nyi nène òa, ɖe kpò mù la crɔ̃ gbidi!

²⁵Trɔ àpo àdɔ̀mèzea kɔ̀ ɖo dùkɔ̃wo ji bòhũ! Kɔ̀ ɛ̀ ɖo dùkɔ̃ kèwo mu jèsi wò òa ji! Kɔ̀ ɛ̀ ɖo dùkɔ̃ kèwo mu yɔna àpo nyikɔ òa ji! Ɖoa, woawo ye vũvũ Yakɔb be èviwo. Wo vũvũ wo keŋu-keŋu eye wo crɔ̃ woabe èdùwo.