Read gen Yeremìa 11 Bible Online

Yeremìa 11 - gen bible

Yeremìa 11

¹Ènyà kè Tɔhonɔ̀ gblɔ̃ na Yeremìaa ye nyi be:

²“Mì ɖo èto ènyà kè lè zòɖùɖu kèa mèa, ne mìa gblɔ̃ ɛ̀ na Yudàviwo ku àmè kèwo ye lè Yèruzàlɛm be èdùa mèa.

³Mì to na wo be Tɔhonɔ̀, Izràɛl be Mawu a gblɔ̃ be: Hèlu na àmè kè mu zɔ̃ ɖo èse kèwo ye lè zòɖùɖu kèa mèa ji òa!

⁴Èse kèawo ye mù do na mìa tɔgbe-tɔ̀gbèwo, wàlɛbɛ kè mù kplɔ̀ wo to so Ejitpè-nyigbã jia, so ègàsèsre be àdòkpo ŋua mèa. Mù le gblɔ̃ be mìa ɖo èto mù, ne mìa wɔ̀ ɖo èse ɖe sia ɖe kè mù do na mìa ji. Nène a ye mì la nyi dùkɔ̃ nyè, eye nyè cã, mù la nyi mìabe Mawu.

⁵Ekèa yomè a, mù la wɔ̀ ɖo àjɔ̀gbè kè mù fìã na mìa tɔgbe tɔ̀gbèwoa ji be, mù la sɔ ànyigbã kè ji nyìnɔsi ku ànyisì lè srà lèa na wo, ànyigbã kèa ye nyi mìa tɔ̀, egbèa” Mù ɖo e ŋuti be: “Ɛ̃ɛ, Tɔhonɔ̀”.

⁶Tɔhonɔ̀ gbà gblɔ̃ na mù be: “Gblɔ̃ ènyà kèawo keŋu kãkã lè Yudà be èdùwo mè ku Yèruzàlɛm be èmɔ̃wo ji be: “Mì ɖo èto zòɖùɖu kèa be èsewo, ne mìa zɔ̃ ɖo woa ji.

⁷Ɖoa, so kaka gbè kè gbè mù kplɔ̀ mìa tɔgbe-tɔ̀gbèwo so Ejiptè, kaka va na egbèa, mù sìanà wo, eji-eji be: 'Mì ɖo èto àpe ègbè!'

⁸Gãkea, wo mu ɖo èto, kaka la va kè ènu do mè na mù ò. Bòhũa, wo zɔ̃ ɖo woabe èjì vuɛ̃ be èkãsĩsĩa ji. Ekèa ŋuti, mù kɔ̀ kpɛ̃sɛ̃ kèwo keŋu kplɔ̀ zòɖùɖu kè ŋuti mù ɖè ègbè na wo be wo ne zɔ̃ ɖoa do, gbɔ̀xue wo gbea, ɖo woa ji.”

⁹Ekèa yomè a, Tɔhonɔ̀ gbà gblɔ̃ na mù be: “Sebla ɖe lè Yudàviwo ku Yèruzàlɛmtɔwo dòmè.

¹⁰Wo gbìgbɔ̀ trɔ yì woa tɔgbe-tɔ̀gbè kèwo gbe be yèwo mu la ɖo èto àpe ègbè òa be nuvuɛ̃ ji. Wo kplɔ̀ èdù bu mètɔwo be vòduwo do, eye wo sɛ̃ wo. Izràɛl be àxuea cã, Yudà be àxuea cã, woa kpata, wo gble èkɔ̀do na èzò kè mù ɖù ku woa tɔgbe-tɔ̀gbèwoa.

¹¹Ekèa ŋuti Tɔhonɔ̀ gblɔ̃ be: “Kpɔɖa, mù la hɛ̃ jɔ̀gbèvuɛ̃ kè nu wo mu la teŋu si lè òa, va woa ji. To e gbɔ be wo la fã yɔ mù cã a, nyè mu la ɖo èto wo ò.

¹²Yudà-nyigbã ji be èdùwo mètɔwo ku Yèruzàlɛmtɔwo la yì fã yɔ vòdu kèwo wo tɔnazò lifi naawo, gãkea, vòduawo mu la teŋu kpe ɖo woa ŋuti krua, wàlɛbɛ kè jɔ̀gbèvuɛ̃ a la jè woa jia ò.

¹³Ɖoa, mìa Yudà-nyigbã jitɔwo yaa, mìabe vòduwo sùgbɔ sìgbè mìabe èdùawo ke nène, eye vɔsakpe kèwo mì li, ne mìa sɔ nɔ tɔzò lifi na ŋùkpɛ̃ be vòdu Baal ŋua sùgbɔ sìgbè Yèruzàlɛm be èmɔ̃wo nène.”

¹⁴Èwò yaa, mù gbà fãkue ɖo dùkɔ̃ kèa ta, wòa blìbɔ̀, àlo, wòa ɖèkuku ɖe ɖo woa ta ò. Ènyè yaa, nyè mu la ɖo èto, ne wo fã yɔ mù, wàlɛbɛ kè wo la nɔ̀ xaxa mèa ò.”

¹⁵“Nukɛ ye lɔ̃lɔ̃tɔ nyè va le wɔ̀, lè àxue nyè mè, ekè be wɔ̀ àyèmènu nyɔŋuwo, ku àmè gbogbo ɖewo vɔ̀a ò? Ne vɔsa-lã kè ŋuti wo kɔ̀a la teŋu tutu ètodɔ̃ wòa joa, wò la kpɔ jìjɔɛ.

¹⁶Tɔhonɔ̀ ɖo nyikɔ na wò be: “Àmìti do àmà kè èkusɛ̃sɛ̃ nyuɛ̃wo ɖo àcɔ na a.” Gãkea, lè zigìdi ɖìɖi gã ɖe mèa, e la tɔ ɛ̀ èzò, eye àmìti kèa be àlɔ̀zɛ̃wo la ŋɛ̃.”

¹⁷Tɔhonɔ̀ Ŋusɛ̃kpatatɔ kè do èkè ègũ na wòa, ye ɖè èvuɛ̃ be èse to, ɖo ŋuti wò, ɖo ènuvuɛ̃ kè Izràɛlviwo ku Yudàviwo wɔ̀a ŋuti. Wo jè àgɔ̀ do è, ekè wo tɔzò lifi na vòdu Baal va yìa.

¹⁸Ekè Tɔhonɔ̀ ɖè woabe èseblaa fiɔ mù a, mù sè e gɔ̃mè; ɖo gà ŋua mèa, e sɔ ènu kè wo le wɔ̀a fiɔ mù.

¹⁹Mù nɔ̀ sìgbè àlɛ̃vi kè bɔ̀bɔ̀ ye ɖokoe, eye wo kplɔ̀ ɛ̀, la yì wùa nène. Nyè mu nya be wo blase ɖo ŋuti nyè be: “Mia crɔ̃ àtia ku yebe sɛ̃sɛ̃wo. Mia sò è jo lè àgbè-àgbèawo be ànyigbã ji, àleke be àmè ɖekpe mu gbà ɖoŋù yebe nyikɔ ò.”

²⁰Vɔ̀ aò, Mawu, Ŋusɛ̃kpatatɔ, èwò kè sònà jɔ̀jɔɛ, eye wò kùnà àmè be èjì ku susuwo[22] mè kpɔa, na, ma kpɔ leke wò biɔ wo èhlɔ̃ ɖoa, ɖoa, èwò simè ye mù sɔ àpe ènyàa do.”

²¹Ekèa ŋutia, ènyà kè Tɔhonɔ̀ gblɔ̃ so Ànatɔt[23] be èdùmètɔ kèwo ye le ji la crɔ̃ àpo àgbè, wàlɛbɛ kè wo le gblɔ̃ be: “Mù gbà gblɔ̃ ènyà ɖɛ lè Tɔhonɔ̀ be nyikɔ mè ò. Ne mu nyi nène òa, wò la ku ci miabe àsi mèa!” Ye nyi be:

²²“Kpɔɖa, mù la dɔ̃ èto na wo. Woabe ɖèkajɛwo la ci èwui nu. Woabe ŋusùviwo ku woabe nyɔ̃nùviwo la ku àdɔ̀-ku.

²³Epè kè mè mù la hɛ̃ jɔ̀gbèvuɛ̃ va woa ji, la sɔ dɔ̃ èto na woa, àmè kui ɖèka tigɔ̃ mu la gbà kpɔ̀tɔ̀ lè Ànatɔt be ŋusùwo dòmè ò.”