Read gen Yeremìa 12 Bible Online

Yeremìa 12 - gen bible

Yeremìa 12

¹Aò, Mawu, jɔ̀jɔɛ kpò wò nɔ̀nà, wè sia wè, ne mù hɛ̃ ènyà ɖe va gbɔ wòa. Gãkea, mù la hɛ̃ ènyà ku wò, so àpo jɔ̀jɔɛwɔ̀wɔa ŋuti: Nukɛ ŋuti ye àmèvuɛ̃wo be èmɔ̃wo jènà e ji na wo ɖo ò? Nukɛ ŋuti ye àmè mà-ɖo xɔ̀sewo keŋu be àgbènɔ̀nɔ mè fana ɖo ò?

²Wò ŋutɔ wò ɖo wo ànyi, eye wo likè, wo mìɔ̃, sĩ, eye wo sɛ̃ èku. Wò sɔ̀ lè ènu gbɔ na wo, vɔ̀a, wò dìdì lè woabe èjì gbɔ.

³Gãkea, Tɔhonɔ̀, wò jèsi mù. Wò ŋutɔ wò le kpɔ mù, eye wò jrò susu kèwo mù ɖo, so ŋuti wòawo mè kpɔ. Dɔ̃ wo jo sìgbè àlɛ̃ kèwo wo la yì wùawo nène! Ɖè wo ɖɛ, na àmè wùwu be àzã gbè!

⁴Kaka va ɖo hùe kɛ nu ye ànyigbã a la lòfũ sɛ̃ ò? Kaka va ɖo hùe kɛ nu ye ègbe la pu lè àgblèta bliboa ò? Àmè kèwo ye lè ànyigbãa jiawo be èvuɛ̃jɔ̀jɔ na be èlã ku xèviwo ku keŋu, lè ànyigbã ji. Sɔ yì e jia, àmèawo ya, le gblɔ̃ be: “Mawu mu jèsi miabe èsɔ̀ mè ò.”

⁵Tɔhonɔ̀ ɖo e ŋuti be: “Ne ènu tìkɔ̀ na wò, wàlɛbɛ kè wò le pudù ku àfɔ̀tɔwoa, leke wò la wɔ̀, la kpe èsɔwo be èdùpupu ji ò? Ne wò hiã èdù kè mè faa, ne wòa ɖo ètù jè ànyi a, leke wò la wɔ̀, le Yɔrdàn be ètɔ̀a be àve mumua mè ò?

⁶Wò ŋutɔ nɔ̀vi wòwo, wò ŋutɔ àpo xòmètɔwo ŋutɔ cã le sà wò, eye wo le blase ku àmèwo fuu, lè àpo ŋùgbedòmè. Ne wo le gblɔ̃ ènyà viviwo so ŋuti wò ŋutɔ cã a, mù gbà dojì ɖo woa ŋuti ò.”

⁷“Fifìa, mù la gble àxue nyèa ɖɛ. Mù la gble àpe ècrɔ̃nua ɖɛ. Mu la gble èkla nyè be lɔ̃lɔ̃tɔa ɖo yebe èkɛ̃tɔwo simè.

⁸Ècrɔ̃nu nyèa va lè na mù, sìgbè jãŋùta, lè àve mè nène. Ekè be le ɖè ègbè ɖo ŋuti nyèa, ŋuti ye fifìa, mù crì ì.

⁹Mu nyi be ècrɔ̃nu nyèa jo trɔ zũ xèvi kè be èfuwo ɖo èsìmè vòvòvòwo na mù, xèvi nyuɛ̃ kè àmlakoewo trɔ do gòdò, eye wo lũ ɖo e jia? Mì yɔ ègbemèlãwo keŋu bɔ̀. Mì yɔ wo va, ne woa ɖùnu!

¹⁰Èlãkplɔ̀tɔ sùgbɔwo, va gble vɛ̃-gble nyèa. Wo ɖo àfɔ̀ àpe àgblè mènuwo ji. Àgblè nyuɛ̃ kè jènà ŋùmè na mù a, wo kãkã ɛ̀, be trɔ zũ zògbè sɔ̃ŋu.

¹¹Wo na be trɔ zũ zògbè pupu. Wo gbìdì ì, be trɔ zũ ègbegbàji. Ànyigbã a keŋu trɔ zũ ègbegbàji, ɖoa, àmè ɖekpe mu gbà le kpɔ e gbɔ ò.”

¹²Ènugbãtɔwo le lɔ cɔ̃ zògbè be èto pɔplɔwo keŋu tamè, ɖoa, Tɔhonɔ̀ be èwui la vũvũ àmè, so ànyigbã a be ènukpòpe ɖe, sɔ yì ènukpòpe bu, eye àmè ɖekpe mu la to lè e mè ò.

¹³Àmèwo la do èbli, vɔ̀a, àŋùja ye wo la yà. Wo la wɔ àvũ, la wɔ̀ èdɔ, vɔ̀a, mu la ɖè àlè na wo ò. Ekèa ŋutia, mìabe nukuyàya ne kpɛ̃ŋù na mì, ɖoa Tɔhonɔ̀ do àdɔ̀mèze ŋutɔ.

¹⁴Tɔhonɔ̀ gblɔ̃ be: “Sɔ kù ɖo àpe àxuekɔ̀tɔ bàɖà kèwo keŋu ɖo àsi ècrɔ̃nu kè mù sɔ ɖɛ na dùkɔ̃ nyè Izràɛl ŋutia, mù la hɔ̃ wo jo lè woabe ànyigbãwo ji. Nène a ke ye mù la hɔ̃ Yudàviwo cã jo lè woa dòmè.

¹⁵Gãkea, ne mù hɔ̃ wo jo vɔ̀a, mù la gbà ku ŋuzĩzĩ na wo, eye mù la gbà kplɔ̀ woa dòmètɔ ɖe sia ɖe, gbɔ̀ va ye ŋutɔ be ècrɔ̃nua gbɔ, ècrɔ̃nu kè la nyi yebe ànyigbãa ji.

¹⁶Eye, ne wo kpla dùkɔ̃ nyè be wɔ̀nawo nyuɛ̃ ɖe, eye wo fìã àjɔ̀gbè, lè àpe nyikɔ mè, sìgbè lekè wo fiɔ dùkɔ̃ nyè, be tà Baal be nyikɔ nènea be: “'Mù tà Tɔhonɔ̀ be àgbèa,” eŋuã, mù la na, wo la gbìgbɔ̀ nɔ̀ dùkɔ̃ nyèa dòmè.

¹⁷Tɔhonɔ̀ gbà gblɔ̃ be: 'Gãkea, ne dùkɔ̃ ɖe gbe be yè mu la sè àpe ègbè òa, mù la hɔ̃ ɛ̀ jo, eye mù la crɔ̃ ɛ̀ gbidi-gbidi.'” Tɔhonɔ̀ ye gblɔ̃ ɛ̀.