Read gen Yeremìa 13 Bible Online

Yeremìa 13 - gen bible

Yeremìa 13

¹Tɔhonɔ̀ gblɔ̃ na mù be: “Yì plè àlɛ̃ŋudà be ègojiblakà, ne wòa sɔ bla àlì ji, vɔ̀a, mù gbà na bèa jè èsì mè ò.”

²Mù zɔ̃ ɖo Tɔhonɔ̀ be ègbèa ji, eye mù yì plè ègojiblakà, sɔ bla àlì ji.

³Ekèa yomè a, Tɔhonɔ̀ be ègbè gbà ɖì na mù, ze èvègɔ̃a be:

⁴“Sɔ ègojiblakà kè wò plè, eye wò sɔ bla àlì jia; fifìa, yì kaka Peràt, ne wòa yì wla ɛ̀ ɖo àkpã tòtro mè.”

⁵Mù so sɔ zɔ̃ ɖo Tɔhonɔ̀ be ègbèa ji, yì wla ɛ̀ lè Peràt.

⁶Ŋùkèkè fuu yomè a, Tɔhonɔ̀ gblɔ̃ na mù be: “Gbà yì Peràt, ne wòa yì sɔ ègojiblakà kè mù to na wò be wòa yì wla ɖo funua”.

⁷Mù gbà so jè èmɔ̃ yì Peràt, yì kãkã àfi kè mù wla ègojiblakàa ɖoa, eye mù sɔ ɛ̀, vɔ̀a, kpɔɖa, fifìa, e nyìnyɔ̀, àleke be wɔ̀na ɖekpe mu gbà le e ŋuti ò.

⁸E yomè a, Tɔhonɔ̀ be ègbè ɖì na mù be:

⁹“Lekèa ke ye mù la gbã Yudàviwo be ègòyiyi ku Yèruzàlɛmtɔwo be jajra kè lòlò kaka gloa.

¹⁰Dùkɔ̃ jɔ̀vuɛ̃ kèa, kè gbe be yè mu la sè àpe ègbè òa, dùkɔ̃ kèa kè be ye ŋutɔ yebe èjì tìtri nu kpò yè la zɔ̃ ɖo, eye be le kplɔ̀ àmè buwo be vòduwo do, le do èta gũ na wo, eye be le sɛ̃ woa, dùkɔ̃ kèa la nɔ̀ sìgbè ègojiblakà kèa nène, eye mu la gbà nyɔ na ènu ɖekpe ò.”

¹¹Tɔhonɔ̀ gblɔ̃ be: “Sìgbè lekè ŋusù sɔna ègojiblakà blana ègo ji nènea, nènea ke ye mù sɔ Izràɛl be àxue bliboa kù Yudà be àxue blibloa bla ɖo ɖokoe nyè ŋuti, ne woa nyi dùkɔ̃ nyè, woa ɖè nyikɔ na mù, woa kafu mù eye woa nyi gogo na mù. Gãkea, wo mu sè àpe ègbè ò.”

¹²Tɔhonɔ̀ gblɔ̃ be: “To na wo be, “Ènyà kè Tɔhonɔ̀, Izràɛl be Mawu a gblɔ̃a ye nyi be: Wo la kù vɛ̃ ɖɔ èlãgbàzegò ɖe sia ɖe.” Eye ne wo biɔ wò be: “Mi nya nyuɛ̃ ɖe be vɛ̃ la ɖɔ èlãgbàzegò ɖe sia ɖe tututua.”

¹³Eŋuã, wò la ɖo e ŋuti na wo be: “Ènyà kè Tɔhonɔ̀ gblɔ̃a ye nyi be: 'Kpɔɖa, mù la sɔ àhàmumu ɖɔ ànyigbã kèa ji nɔ̀tɔwo keŋu, kaka va jè èfìɔ kèwo ye lè David be èfìɔzìkpea jiawo ji, va jè hũbonɔwo ji, va jè gblɔ̃ɖɛtɔwo ku àmè kèwo lè Yèruzàlɛm be èdùawo mèa ji.

¹⁴Mù la sɔ wo xla ɖo woa nɔ̀nɔwo ŋuti, ètɔwo cã, èviwo cã, woa kpata! Eye nyè mu la ku ŋuzĩzĩ, àlo, la sè veve na àmè ɖe ku xòmèfa, ne nyè mu gbà crɔ̃ wo ò.” Tɔhonɔ̀ ye gblɔ̃ ɛ̀.

¹⁵Mì ɖo èto, ne mìa sè. Mì mu gbà sɔ ègòyiyi ɖo e mè ò, ɖoa, Tɔhonɔ̀ ye le pò nupo.

¹⁶Mì na gogo Tɔhonɔ̀, mìabe Mawu, gbɔ̀xue bèa hɛ̃ vìvìti va mia ji, gbɔ̀xue mìa klɛ̃ àfɔ̀ lè ètokɔ̃ɛ do vìvìtiawo ji. Mì le kpɔ èmɔ̃ na kɛ̃klɛ̃, vɔ̀a, e la trɔ ɛ̀ zũ vìvìti kpɛ̃kpɛ̃ cricri, eye be la trɔ ɛ̀ zũ hèhèdodo be àkpɔ̃.

¹⁷Vɔ̀a, ne mì gbe be yèwo mu la ɖo èto òa, eŋuã, èkla nyè la fã àvi lè wawla mè. Ɖoa, mìabe jajra glo! Ŋùkuvi nyèwo la fã àvi ku vevesèse, eye wo la kplɔ̀ àɖàsì yòyòyò, ɖoa wo la kplɔ̀ Tɔhonɔ̀ be èlãhaa jo, wo la kplɔ̀ ɛ̀ jo àhùale.

¹⁸Tɔhonɔ̀ gblɔ̃ be: “Gblɔ̃ na èfìɔa ku èfìɔ-srɔ̃a be: “Mi sitè lè èfìɔzìkpeawo ji, ɖoa, mìabe gogo be èfìɔkukuawo la gɛ̃ lè èta na mì.

¹⁹Wo la tu àpùgo be èdùwo be àgbowo, eye àmè ɖekpe mu lè kè la hũ wo ò. Wo la kplɔ̀ Yudà-nyigbã jitɔwo keŋu yì àmèjrowo de.” Wo la kplɔ̀ woa keŋu-keŋu jo gbidi-gbidi.”

²⁰“Mì kɔ ŋùmè yìji, ne mìa kpɔ àmè kèwo ye gbãnà so èvègo lɔ̀geawo ɖa! Fikɛ ye àpo èlãha kè wo sɔ do àsi na wòa lè ò? Àlɛ̃ha kè be àdã wò kãnaa ɖe?

²¹Ènyà kɛ ye wò la gblɔ̃, wàlɛbɛ kè Tɔhonɔ̀ la sɔ àmè kèwo wò sɔ wɔ̀ èxlɔ̃ wòwoa, ɖo àmèjikpɔtɔwo ɖo nu wò ò? Àkpɔ̃ mu la ɖɔ wò, wu nyɔ̃nù kè le le èkua be vevesèsewo òa?

²²Eye, ne wò biɔ ɖokoe wò sè be: “Nukɛ ŋuti ekèa le jɔ̀ ɖo ji nyè ɖo ò?” Ɛ̃ɛ, àpo nuvuɛ̃wɔ̀wɔ sùgbɔa ŋuti ye wo klo àvɔ lè ŋuti wò, eye wo ɖè àpo àfɔ̀kpoji fiɔ ɖo.

²³Àmè yìbɔ, so Kusì-nyigbã ji la teŋu trɔ yebe àgbàzea? Àlo, èkpɔ̃ la teŋu ɖè jèsì tàm tàm jo lè yebe èfuwo mèa? Èwò kè ènu vuɛ̃wɔ̀wɔ ma do a, èwò cã, wò mu la teŋu wɔ̀ ènu nyuɛ̃ ò.

²⁴Mù la kã mì hlɛ̃, sìgbè èbè kè zògbè be àya pò le ɖìsàa nène.

²⁵Ekèa ye nyi tɔ̀ wò, mamã kè mù jije ɖɛ na wòa, ɖoa, wò ŋlɔ̀be mù, eye wò ɖoŋù ɖo àjè vòduwo ŋuti!” Tɔhonɔ̀ ye gblɔ̃ ɛ̀.

²⁶Mù la klo àvɔ lè ŋuti wò, cɔ̃ ŋùmè na wò, ne àpo ŋùkpɛ̃ ne ze.

²⁷Àpo àhasìwɔ̀wɔwo, àpo vivisèse be ŋɛ̃ŋɛ̃wo, àpo ŋùmàkpɛ̃ be gbòlòwɔ̀wɔwo, mù kpɔ wo keŋu ku àpo àfɛ̃nuwo, lè ètowo tamè, ku àgblèwo ji. Aò, Yèruzàlɛm, bàbà na wò! Kaka na hùe kɛ nu ye wò la pòɖi ò?” Tɔhonɔ̀ ye gblɔ̃ ɛ̀.